LAMTLUANG ZINGKAR CHANCHINTHAR LAWRKHAWM *Vawiin hian Union cabinet tih len a ni dawn a, minister thar 20 lakluh anni dawn nia sawi a ni. Hei hi Narendra Modi Prime Minister a nih hnua cabinet a sawidanglam na hmasaber tu a ni. *6.11.2014 chawhnu dar 2:00 khan Tuikhuahtlang Presbyterian Kohhran Hall-ah ‘Pavalai pawl tobul leh a than zel dan’ tih lehkhabu chu Rev. Lalramliana Pachuau, Executive Secretary in a tlangzarh. Lehkhabu tlangzarh inkhawm hi Upa K. Lalthakima, Chairman, Pavalai Joint Committee-in a kaihruai a, lehkhabu thlir lawkna Upa Lungngailova Colney, Secretary, Pavalai Joint Committee in a nei a, Upa C. Lalnghakliana, Vice Chairman, Pavalai Joint Committee-in lawmthu sawina a nei bawk. Pavalai Pawl hi July 21, 2004 khan Tuikhuahtlang Kohhranah din a ni a, hemi hnu hian Presbyterian Kohhran hrang hrangin anmahni mamawh leh remchan dan angin an din chho zel a, tunah chuan Presbyterian Kohhran tam zawk te chuan Pavalai pawl hi an din tawh a ni. Pavalai Pawl hi kum 2012 atang khan Synod-in a rawngbawl leh enkawl hna hi a la tan a. He lehkhabu-ah hian Pavalai Pawl din a nih chhoh dan leh Synod-in a enkawl hma thlenga rawng an lo bawl tawh dan chanchin chipchiar taka tarlan a ni. *November 4 - 7, 2014 chhung hian Evangelical Fellowship of India buatsaih North East India Congress on Church in Mission, CBCNEI Mission Compound, Pan Bazar, Guwahati-ah neih mek a ni a, thupuiah ‘Come over to Macedonia and help us’ (Acts. 16:9) an hmang. He programme-ah Rev. Lalchhuanmawia, Secretary, Synod Mission Board a tel a, ministry report session-ah Synod Mission Board Strategy & Achievements chungchang a sawi a ni. *Nimin khan Sap Upa leh Pu Buanga Hall, BCM Office, Serkawnah Lunglei ‘N’ ABC huam chhunga Pastor Bial pali – Rahsiveng, Bazar, Serkawn leh Zotlang Pastor Bial huapin Mission Consultation buatsaih a ni dawn a. He Consultation-ah hian Bial Executive Committee Mamber, Bial Mission Committee member leh Tualchhung Mission Committee Office Bearers te an tel a ni.Consultation hi Rev. Dr.K.Lalrinthanga, Associate General Secretary i/c Mission-in a kaihruai a, Upa HS Lalhmingthanga, Mission Promoter leh Rev. B. lalrinawma, Mission Co-ordinator ten Paper an present a ni. Mission lama hmasawnna tur kawng hrang hrang te sawihona hun an hmang nghal bawk. *Nakkum-a Mizoram Baptist Kohhran Hmeichhe Pawl (MBKHP) Inkhawmpui, Hnahthiala lo awm tur atan inbuatsaihna pakhat-ah Hnahthial khawpui chhunga Kohhran hrang hrangah a rualin November 15-23, 2014 hian Mass Evangelism Programme buatsaih a ni dawn a. He hun hmang tura Evangelist team tel tur zawng zawngte chu November 15 (Inrinni) chawhnu dar 2-ah Hnahthial Bazar Biak inah inhmuhkhawm an tum. *Mizoram State Sport Council leh Mamit Tennis Association hmalakna hnuaiah mipa leh hmeichhia kum 6-18 inkar te tana ni 28th October - 7th November 2014 chhunga Mamit Tennis Court-a Catch Them Young Policy kalpui chu niminpiah tlai khan Pu Mickey R. Lalenkawla, Secretary, Mamit District Sport Committee in kharna hun a nei. *Nimin khan Information Communication Technology (ICT) Minister Pu Lal Thanzara chuan 5th e-North East Summit 2014 zulzuia Mizoram Legislative Assembly Conference Hall-a 5th e-North East Award 2014 programme buatsaih chu khuallian niin a hmanpui a. He Summit-a IT hman tangkaina, Category hrang hranga ti tha te hnenah lawmman a hlan nghal a ni. *Champhai District chhunga BRTF hnuaia kawng siam hnathawh chungchangah nimin khan Champhai DC Pu Zoengsanga hovin 74th RCC BRTF hotute leh PWD SDO bakah tlawmngai pawl hotute leh Champhai District chhhunga VCP-te Champhai DC Conference Hall-ah an inhmukhawm. *Nimin khan India President Pranab Mukherjee an nihnih cham a Bhutan a tlawh hnuin dam takin Delhi a lo let leh a ni. *Jammu and Kashmira Kupwara district chhung (LoC hnaih) ah vur tawlh in India sipai 4 leh Civil mi 1 a delh. *Vawiin hian Germany chuan East Germany leh West Germany daidang tu bang Berlin wall an tih chhiat kum 25-na an lawm dawn. Kum 1989 November ni 9 khan he bang hi chhut chhiat niin Germany ram hmun hnih a inthen thin chu hmunkhat ah an in chhungkhawm ta a ni.Tunhma chuan East Germany hi Russia thlawp Communist sorkar anni thin a, West Germany chu khawtlang ram UK, US, France etc te thlawp democracy sorkar anni thin bawk a ni. *World Chess Championship 2014 Sochi, Russia khelh mek ah India chess khelthiam World Champion vawi 5 lo ni tawh Viswanathan Anand chuan Champion lai Magnus Carlsen (Norway) chu game hmasaber ah a hneh, championship match hi game 12 la khelh tur a ni. *Lamtluang member zawng zawng te Pathianni hman nuam vek ule, news kan post te hi in chhiar zawh ah comment lo dah ve thin ula nuam kan ti ve a nia. I comment hlu tak kha kan lo ngaichang ve reng e.
Posted on: Sun, 09 Nov 2014 00:45:01 +0000
Trending Topics
Recently Viewed Topics
© 2015