LO DAWN VE MAH TEH Tlawmngaihna : Tlawmngaihna hi a tlahniam tial tial a, chhuanlam erawh a pung tulh tulh thung. Mualpho kan hlauh avangin mi zawng zawng tlawmngai turin kan insawm leh zauh thin. Nimahsela, tlawmngaihna hian tumah phut a nei tur a ni lo kan ti leh bawk si a. Inphut deuh loh lahin kan tlawmngai duh leh mang bawk si lo. Kan beidawng em ? Sakhuana : Pathian thu han sawi ila, sermon hnih thum daih sawi tur kan hre deuh vek. A sawi kan inchuh a ni ber mai. Zu leh damdawi ngawlveite thlengin Pathian thu tha tak tak sawi tur kan hre vek. Miin i piangthar lo mi tih phei phei chuan kan haw hle. Mi sualnate kan hre thei bawk. Nimahsela kan nitin nunah hian kan kristianna a lang leh si lo. Biak inah bak kristian kan ang lo. Kan beidawng em ? Fanau Enkawl : Khawvel a changkang tawlh tawlh a, sualna a pung tulh tulh a, kan tu leh fate enkawl kan thiam lo hlawm si a, an duh duhin an tal a ni ber mai. Kan inthunun hlei thei tawh lo. Duh hun hunah ngaihzawng an nei a, duh hun hunah kawppui an nei a, duh hun hunah an inthen leh a, fahrahkan pung tual tual mai. KS, pawngsual leh rukruk te pawh he thil kaihhnawihvek niin a sawi theih. Suihlung mawl leh dawn tawi, chun leh zua kan tam si. Kan beidawng em ? Faina : Fai nawmzia kan hria. Fai theih dan pawh kan hria. Nimahsela fai turinbawlhhlawh bawm tak ngial pawh kan hmang tangkai hlei thei lo. Remchang lai apiangah bawlhhlawh te ber atanga lian ber thlengin kan paih leh mai thin. Kan beidawng em ? Zu Leh Ruihhlo : Zu kan khap a, ruihhlo kan do bawk. Nimahsela, nitin man tur kan nei reng mai. Khap loh doloh chi lah ni bawk si lo. Thupui bera nei kan tam si. Kan beidawng em ? Gas : Gas a harsa tial tial a, a man erawh a to tulh tulh thung. Chutih lai karah a phurtuten an duham luatah anlo tichingpen leh thin a, a buk a zang thei khawp mai. A man a to a nih paw’n a buk tal hi chu tling se zia deuh tur. Inven reng theih ni bawk si lo. Kan beidawng em ? Petrol : Petrol pawh a man to tulh tulh a, nimahsela a dal tulh tulh thung. An duham leh sum duh luatah a phurtuten an lo pawlhdal leh thin a, kan lirthei ten an tuar nasa thei khawp mai. Check reng theih a nih lohavangin an lo pawlhdal leh thin. Tih vak ngaihna a awm lo. Kan beidawng em ? Buhfai : Hei pawh a phurhna atanga a dahna hmun thlenga tihchingpena hralh ruk a ni fo. Buhfai eiruk suma in ropui tak tak sa kan tam tawh viau maithei ! Sorkar hian tichingpentu thenkhat man leh zeuh thin mah se a check reng theih bik loh avangin an lotichingpen leh thin. Ven vak ngaihna awm lo. Kan beidawng em ? Vai : Kan rama vai tamzia kan hria. Gas,buhfai, tui, kawlphetha, chini leh thil dang tam tak min tawmpui a, kan indaih loh phah nasa tih pawh kan hria. Kan thawh theih hna tam tak minthawh khalh bawk. Nimahsela, kan sum duh luatah in luahtu atan te kan la duh ber a, sumdawn nana hming lo hawhtir duhte pawn kan awm. Tawng thei tak tak kan tam si a, hma lak a har.Kan beidawng em ? Thil Man : Lumeh man cheng 20 atangin cheng 30 ah a pung a, kuhva man pawh a pung a, sa man a pung zelbawk. Bazara chawhmeh chi hrang hrangte lah chu duh zat zatin an zuar a, thil man mumal taka control a ni bawk hek lo. Kan beidawng em ? Bumna : Hmun danga hna thawk turin kan inkawhhmuh a, kan chhuak fo. Mahse a hnu lawkah kan buai leh thin.Bank lem tam thu pawh kan hre ngun tawh a, kan inzirtir nasa hle bawk. Mahse kan inhrilhfing hlei thei lo. Inhambuai kan awm leh thin. Kan beidawng em ? Lungrualna : Political party leh kohhranah bak kan inlungrual hlei thei lo. Hnam dang pasal neih leh sumdawnpui chungchangah phei phei chuan inlungrual lo tak kan ni. Kawppui atana nei kan awm nual bawk nen, kan ngaih dan a inang vek thei tawh lo. Kan beidawng em ? Political Induhsakna : Tlin leh thiam vang pawh ni hran lo-in hna kan inpe leh mai thin hman atang tawh khan. Nimahsela mipui rilru-ah chuan “ annite chu, an party an lo vahvaihpui rei tawh em alawm, a awm alawm ” kan tileh mai thin. Hei hian political induhsakna a nasatzia a tichiang khawp mai. Lehkha thiam tak tak party ruihchilh ve lo tan engtin nge nita ang ? Kan beidawng em ? Moral Reformation : Kan ram damna leh hmasawnna tura kan mamawh bermoral reform kawngah hma kan sawn hlei thei lo. Kan rilru a kalsual nasa tawh. Rilru Cancer (Stage 3) vei kan tam em a, hei vang hian hma kan sawn hlei thei tawh lo. Kan beidawng em ? Tlipna : Hengte hi kan beidawng em tia zawhna mai a ni a, beidawnthlak ti te pawh kan awm thei a, beidawng miah lo te pawh kan awm thei bawk. Eng pawh ni se, heng thil lungawi thlak loh takte hi kan vei a, kan la sawipeih chhung chu insiamthat theih kanla inbeisei tihna a ni thei a, sawi peih kan awm tawh loh hunah erawh beisei bo kan ni tawh ang. Phun lungawi policy kan la kalpui zel rih chu a ni a, nimahsela tribal intih pawhduh tawh mang lo, za-a-za kristian intite tan insiamthat hun a la awm turah beisei ang. (chhuahchhawng tur tan source tarlana tul ang)
Posted on: Sun, 07 Jul 2013 15:23:49 +0000
Trending Topics
Recently Viewed Topics
© 2015