Lusod ko sa tiyan a moslem,.. niya so manga panduwan kano agama islam endo manga ungaya a makambalapantag salka,sa di bo kalu-kalu katuntayan nengka endo kasabotan nengka sa mapiya so manga panduwan kano agama islam uliyan no ento na makanggulalan nengka siya kano uyag-uyagengka endo makapamando nengka kano manga muliyataw nengka atawa ka so manga lusog nengka sa tiyan ka endo pakapamula kano manga pamusungan nilan so kalilini kano agama islam ka endo silan mangengeto siya kano palitiyala kano Allahu Taala. Lusod ko sa tiyan a moslem.... saboti ka e so rukun no agama Eeman(palitiyala) na nem timan.ika-isa na so:kapalitiyala kano Allahu Taala; ika-duwa na so : kapalitiyala kano manga mala-ikat; ika-telo na so: kapalitiyala kano manga kitab o Allahu Taala a initulon nin siya sa Donya; ika-pat na so: kapalitiyala kano manga sinugo no Allahu Taala a manga nabi; ika-lima na so:kapalitiyala kano gay a mauli; ika-nem na so: kapalitiyla kano inukol a mapiya endo mawag na ganat lo salkanin a Allah. na so rukun manem o islam na Lima timan: ika-isa na so:kadsaksi sa dala kadnan a wagib a pedsimban niya tabiya na so Allahu Taala endo so kadsaksi sa saben-sabenal na so nabi Muhammad Sallahu Alayhi Wa Sallam na sinugo sekanin no Allahu Taala, ika-duwa na so: katindeg kano lima timan a sambayang siya kano magabi endo malamag; ika-telo na so: kaenggay sa Zakat o tamok amayngka makagaos kano nisab ( asadan); ika-pat na so: kabpuwasa kano ulan-ulan no Ramadhan; ika-lima na so:kapanihajji lo sa Baytullah sa entayn e pakagaga lon. Lusod ko sa tiyan a moslem; saboti ka e embalangan no Tawheed ( kapaka-isa-isa kano Allah) na telo balang: ika-isa na so: kapaka-isa-isa kano Allah siya kano kapegkagaga nin endo kinapamaloy nin: ika-duwa na so : kapaka-isa-isa kano Allah siya kano kasimba salkanin: ika- telo na so: kapaka-isa-isa kano Allah siya kano manga ngala nin endo manga sifatin a manga mapiya. So Allahu Taala na binaloy nin so manga pinamaloy nin endo inaden nin so manga inaden nin sa dala sekanin kapasangi kano kinapangaden nin endo kinapamaloy nin lon, na kahanda no Allahu Taala kano kinapamaloy nin kano manusiya endo jin na endo nilan masimba so Allahu Taala sa isa-isa nin bo na entaen e sumimba sa salakaw kano Allahu Taala na nakasakuto sa masla a sakuto na dili amponen no Allah taman sa dili nin telenan so kapedsakuto anto. Lusod ko sa tiyan a moslem : so langon o galbek na aden lon e manga surot a katalima lon; mayto bon ba mambo so simba sa Allah Taala aden lon e surot a katalima no Allahu Taala lon, so niya ba a surot na duwa timan bo : ika-isa na : kapagikhlas kano kasimba sa Allah; ika-duwa na: kaunot kano suguwan no nabi Muhammad Sallahu Alayhi Wa Sallam.
Posted on: Sun, 14 Jul 2013 22:11:31 +0000
Trending Topics
Recently Viewed Topics
© 2015