MASIHOL AU (11) Marende band Cempaka mambukka acara hiburan di bar. Irama Melayu manang pesisir ende nabinoanhon ni nasida. Tabo-tabo do sude ende i Alai, ala naso sabar be si Bunga dohot si Meccen naeng mamereng si Pian marende, gabe hurang tabo do dihilala nasida ende ni Cempaka i. Mamolus bartender sian lambung ni si Meccen. Naeng matoppas bartender i ala pat ni si Meccen nabarat di dalan nagolap i. Si Meccen pe nasala alai pelayan i do namangido maaf. “Maaf, Bang!” ninna pelayan i. “Ia, kumaafkan kau,” ninna si Meccen pajonokkon bohina tu bohi ni pelayan i. Solhot hian bohi ni si Meccen tu bohi ni pelayan i maradu takkas marsianggoan hosa nasida. Si Meccen bau minuman, si pelayan bau bawang. Dang nanaeng mangasangi si Meccen, holan napatakkashon bohi ni pelayan i do. “Hira naso jolma do nakkin huidapelayan i!” ninna si Meccen tu si Bunga. “Boasa didok abang songon i?” “Nabirongan attong, hurippu naso adong bohina, hape na halak koling do, wkwkwkwwk!” ninna si Meccen mekkel gogo hian, nadirippu do haroa na di bona ni kopi ibana. “Heh, parekkelmi, Bang!” ninna si Bunga. Si Bunga pe nian sai mekkel do marnida siadopanna i patakkashon bohi ni koling i nakkin. “Ai sakti ma bayo on, nang so marmata boi mardalan, ninna rohakki nakkin dabah!” ninna si Meccen. “Kwekekekekekek ekkkkk!” sonari si Bunga mekkel gogo hian. Diinum si Bunga do minuman na niinum ni si Meccen. Lambok do tutu di aru-aru ni si Bunga minuman i. Hira namanginum kolak dingin nama dihilala si Bunga. Holan namekkel nasida nadua di meja napaling suhi. Ditaruhon pelayan nakkin muse tamba ni minuman tu meja ni si Meccen. Naeng diusehon pelayan i tu galas ni si Meccen alai diorai si Bunga. Lokma au mangaladeni hallethon, ninna si Bunga. Nungnga marganti soring ende napinatubegehon band Cempaka. Martopak do nasa tamue ganup sae diendehon sada ende. Si Bunga nang si Meccen pe martopak do nangpe so pola diantusi nasida ende i ala hata Inggris jala dang somal ende i dibege nasida. Toppu so si Bunga martopak. Diida ibana di panggung nungnga mangarade parende namarrompi narara, grup band ni halak si Pian. Marsurak nasa tamue manjouhon goar ni si Pian. Adong muse namanjouhon goar ni Eddys. Dibereng si Bunga humaliang, hira sude do na manjouhon goar ni si Pian. Akka naung somal di bar ma hape akka tamue on. Dang pola diantusi si Bunga na karyawan ni bar i do akka anakboru i, waitress. Torang lampu tu panggung. Tu si Pian lampu sorot i. Diangkat si Pian tanganna mandada sude panonton. Dialusi panonton dohot mandada si Pian muse. Si Bunga pe didada ibana do si Pian. Jongjong si Bunga mandada nahea asisten ni parubat-ubat i. Sai didada dope si Pian i dohot tanganna siamun, tanganna hambirang di pamanganna. Diharat si Bunga sisilon ni jari-jarina. Naeng marikkat ibana mandapothon si Pian di panggung i. Marhillong mata ni si Bunga. “Pahundul ma, Dek!” ninna si Meccen maniop abara ni si Bunga mansai lambok. Diboto si Meccen do attong manang boha sihol ni nanialapna i tu si Pian. “Tapaima ma jolo sappe sae nasida marende, sotung gabe manggugai hita di ulaon nasida!” ninna si Meccen. “Memenuhi permintaan dari bapak dan ibu, kami akan bawakan beberapa lagu dari albumnya Eddy Silitonga. Pop Indonesia dan juga pop daerah tentunya, kita sambut Artanta Simfhoni.....!” ninna emcee. Dipalu si Harrys keyboardna. Sodap begeon di sipareon. Didorguk si Meccen minumanna satonga galas. Jongjong do si Bunga, eh dang jongjong hape ibana, diabing si Meccen do. Anju Au, ima ende nanaeng endehonon ni si Pian. Andorang so diendehon si Pian ende i, nga jumolo si Meccen mandok hata-hata ni ende i di pinggol ni si Bunga. Huhut dihaol ibana siboru nauli di abinganna. Anju au sai anju au ale anggi Di namuruk manang marsak rohakki Nang so hupaboa arsak nadiroha Holong ni rohakku sa hot do i Anju au sai anju ai ale anggi Ekkel mi mambaen pasonang rohakki Tung saleleng au di lambung mi Anju au sai anju au ale anggi Sidung sada ende diendehon si Pian di panggung, alai hira na on dope dipukka si Meccen dohot si Bunga namarbulan madu. Andorang di Parapat nasida marbulan madu, ndang pola songon on pakkilalaan nasida nadua. Lam masihaholongan nasida jala marjanji naikkon masipasonangan nasida. Naikkon masianjuan songon ende ni si Pian apala ipe. Dibuat si Meccen sigaretna sian meja. Dibuat si Bunga korek api laho pagalak sigaret ni si Meccen. Alai andorang so dipagalak sigaret i, diumma si Bunga do si Meccen. Ima dibaen si Bunga pagalak holong ni si Meccen. Chessstt.... ninna soara ni korek api di tangan ni si Bunga pagalak sigaret ni halletna. Gorgor api ni korek api i manutung hau tusam namarmiak i. Sajuta hali ni korek api ima marjillam-jilla m api ni holong di bagas roha ni si Meccen. Marende muse si Pian, Eta Mangalop Boru. “Sogo do roha ni si Pian mangendehon ende on, Adek!” ninna si Meccen. “Boasa, Bang!” “Jotjot attong apala pas mangendehon ende on di lapo ni si Gotuk, ro oppungna marsuru ibana lao mangalap soban. Wkwkwkwkk!” “Alai sai dioloi si Pian do oppungna kan?” ninna si Bunga. “Bah? Boasa sahat tu soban tahatai ate?” ninna si Meccen. Las rappak mekkel nasida nadua. Molo nahinaholongan dongan niba makkatai, sai las do roha tutu. Habegean irama melayu sian panggung. Karena Senyumanmu, ima ende ni si Pian. Jongjong nasa tamu lao marjoget. Sodap ende dangdut pesisir i. Si Bunga pe jongjong do manogihon si Meccen. Dang olo si Meccen, maila-ila dope ibana. “Unang pola tu tonga hita marjoget, holan di inganta on pe. Songon halak an,!” ninna si Bunga. Marjoget nasida nadua. Alai naeng tippal ma si Meccen ala mulai mordong. Tuani do hatop tangan ni si Bunga manakkup. Eheh... dang tangan ni si Meccen hape natinakkupna i. Tangan ni doli-doli na di lambung nasida i do hape. Anggo si Meccen saut do tippal. Di lantai i dope ibana manukkap. Tuani do dang mamolus halak koling nakkin. Olo hian do gabe tardegesa tanggurung ni si Meccen i. Ditogu si Bunga jongjong si Meccen. Hundul ma si Meccen alai sai marjoget dope si Bunga. Nga pitpit mata ni si Meccen di hundulanna alai sai diihuthon ibana dope ende ni si Pian i. Jotjot diendehon si Pian ende on di epper ni halak si Mawan. “Eh, dang juppanganta sonari si Pian i?” ninna si Meccen manggoit si Bunga. “Marsogot ma bulus. Ai ganup bodari nama nasida marende di son. Naung husukkun do nakkin pelayanna koling i.!” Ninna si Bunga. Dang diboto si Meccen be manang naung piga ende naung diendehon si Pian, manang naung piga botol minuman diinum ibana. Si Bunga do manogu-nogu si Meccen lao mulak tu kamar nasida. Borat do perjuangan ni si Bunga asa sahat nasida tu kamar nabagak i. Dibukka si Bunga baju ni si Meccen nang sipatuna. Galbas do si Meccen modom manukkap di podoman na ias i. Dilap pamatangna dohot aek na las. Mekkel si Bunga marningot las roha ni si Meccen sadari on apalagi ala diloas ibana minum. Diumma si Bunga hurum ni amattana i dungi dipaellep lampu ni kamar i. Dipapeak si Bunga di lambung ni si Meccen. “Marsogot ma hujuppangi si Pian dung sae nasida marende!” ninna roha ni si Bunga, “Nian, mangalap si Pian do anggo tujuan, alai ikkon marmanat do iba mangalakka sotung tartuktuk manang tarrobung.” Uli hian nipi ni si Meccen borngin on. Tung marnipi pe ibana dilelei begu, maup jala mabaor do luhut naroa molo haholongan ni roha niba parjolo binereng di lambung tikki dungo iba. Adong be na ummuli sian i? Si Bunga pe diboto do hata i namandok: Maup jala mabaor do nipi naroa molo parjolo binereng haholongan ni roha niba jala namanghaholongi iba. Ima surat ni si Meccen uju i. Si Pian do namanurat i. Hundul si Mawan di lambung ni jendela kaca kamar nasida. Ditatap ibana tu nadao. Dang jabu di nadao i manang motor na adong di dalan i dibereng ibana. Sitta-sitta ni si Pian nanaeng gabe doktor do dibereng si Bunga. Diingot si Bunga dope si Pian, nahea niajaranna di sikkola dasar, mandok sitta- sittana i dung didok si Mawan sitta-sittana gabe dokter. Holan si Pian hian dope naumboto naso sarupa lapatan ni dokter dohot doktor. “Sai sahat ma nasinitta ni rohami, Pian hasian!” ninna si Bunga di bagas roha. “Namalo jala naburju do ho, alai boha ma parsahat ni sitta-sittami molo dang marsikkola ho, Pian hasianku?” Marhosa ganjang si Bunga. Dipajonok ibana tu jendela i. Didaishon si Bunga puccu ni jari- jarina tu kacca. Disurathon ibana di kaca i: DR. PIAN. Ro do iluna manuratton i. Dipahundul muse di topi ni podoman nasida. Renges dope si Meccen modom. Dibuat si Bunga surat ni si Pian na tu si Mawan i sian tasna. Dijaha muse surat i. Bagas nai hape pamikkiran ni si Pian on. Dang naso diboto ibana naholong roha ni si Mawan tu ibana saleleng on. Dipasahat ibana pe tona tu si Friska boru ni camat i, asa diantusi si Mawan do hape naso olo ibana parhallethon si Mawan. Ido, disengaja do mandok i di surat on, ninna roha ni si Bunga. Dijaha si Bunga surat i padua halihon. Ima, parjolo do disarihon jala ditangianghon si Pian on hahipason ni si Mawan. Di alnea palimahon sian surat i, manetek muse ma ilu sian simalolong ni ibu Bunga. Mawan, marende di hotel Pardede do au tolu hali saminggu. Burju-burju do sude donganku. Alai ndang adong be naumburju sian ho di portibi on. Hodo saluhut di au. Ummarga dope ho di au sian omakku. Ummarga do ho sian saluhut na adong di portibi on. “Tung apala bohama pamerengmu Pian di si Mawan i asa ummarga ibana di ho sian namangusehon mudar lao manubuhon ho? Sian napatarushon ho?” ninna si Bunga tu surat natiniopna. Maraburan iluna. Dungo si Meccen alani i. Hundul ibana mangunsande di podoman. Dihaol si Meccen dugul-dugulna sandiri. Dang sadia leleng, hehe si Bunga lao mambaen kopi ni si Meccen. Hundul nasida di lambung ni jendela. “Boha do pandapotmu taringot si Pian on, Bang?” ninna si Bunga, “Molo marende do ibana torus ndang marsikkola songon on, ndang nalao dapotna be sitta-sitta ni rohana nagabe doktor i!” “Paksa ma ibana, muruki attong asa mabiar!” ninna si Meccen. Holan ido nabinotona. “Ah, ho nian, Bang, hira naso diboto ho do si Pian. Dang diingot ho be tikki na dipaksa Kappung Bajoka ibana mamasang bandera di jolo jabuna be?” “Imadah, gabe mandar ni oppungna di panaik, dah?” ninna si Meccen mekkel. “Ai aha attong so songoni dibaen si Pian, bandera ni nasdia pe nga hunik hira nahona timus jala nga magetem. Wkwkkwwwkwkwkwk ” ninna si Bunga mekkel. Rap mekkel nasida marningot bandera i. “Manang ise barani paturunhon bandera nami on, ikkon huhujur butuhana i, ninna si Pian hian do tikki i dah!” ninna si Meccen. “Ido, mabiar sude nimmu dah? Ditiop do hujur tikki i. Wkwkwkwkwk..” Lam talak pamangan ni ibu guru i nangpe sala nabinaen ni si Pian. Hira namangappini na sala guru i. “Lasso barani do Kappung Bajoka tikki i. Oh... tahe... Pian... Pian....!” ninna si Meccen. “Hujur natajom i muse do i, Dek. Hujur i hian do dibaen ibana manullang biang ni Oji Burhan namangalele si Mawan. Wkwkwkwkwkwkwk. ..” (Bersambung )
Posted on: Sun, 06 Oct 2013 12:33:24 +0000
Trending Topics
Recently Viewed Topics
© 2015