MORNING REPORT : 25.08.2014 THAWHTANNI (Zonet Zing Daifim 7:30 a.m.) Police Report : Tukin hian kan biak thin Police Station 12 leh Out Post 1 te chu kan be kim thei a, kan hriat theih chinah nizan lamah thil thleng duhawm lo sawi tham a awm lova. Lock Up ruak 4 a awm a; Sunday zan a nih vang nge, tang zawng zawng belhkhawm 35 lai an ni a, an zingah hian hmeichhia 3 an tel a ni. Aizawl Police Station ah tang mipa 11 leh hmeichhia 2 kawlin, kumtlinglo pawngsuala puh vanga man 1 leh vai pakhat, tualthah case a rinhlelh man tih loh mi dang zawng chu khawlaia intihbuai vanga khawm case a man an ni. Zonuam Out Post ah khawlaia insualbuai vanga man mipa 6 leh rinhlelh man hmeichhe 1 an kawl a, tang an ngah ve zan tak a ni. Lunglei PS ah zuruih vanga man mipa 4 an kawl a. Champhai PS ah mipa 3 kawlin 2 chu rinhlelh man an ni a, 1 dang chu a neitute phalna lova mi huan thlai a lo lak vanga man a ni. Bawngkawn PS ah khawm case a man mipa 2 kawlin, Saiha PS a mipa 2 an kawl zinga pakhat zawk chu Maruti car a mi sut palh vanga man a ni a, 1 dang chu zuruih vanga man a ni thung. Mamit PS ah rukruk vanga man mipa 2 an kawl a, Vairengte PS ah lirtheia mi tih palh vanga man mipa 1 kawlin, Vaivakawn PS ah rinhlelh man mipa 1 an kawl a. Tin, Vaivakawn PS ah hian mipa, mibo pakhat an kawl a. Kamis hring deuh ha, hmai cher lam deuh, kum 30 mi vel a ni a, a hming leh awmna khua emaw veng emaw pawh a hre lova, hetiang mibo nei chuan ngaihven se an duh hle. Traffic Report : Inrinni a Aizawl a Traffic Rules bawhchhia man zat : Two Wheeler 9, LMV 9, Taxi 6, HMV 2, fine tlingkhawm Rs. 7,200/- Hospital Report : Nimin tlai dar 5 atanga tukin dar 7 thlengin Aizawl Civil Hospital Casualty ah emergency case 100 vel an nei a, ward ah mitthi 2 an nei a. Nizana Civil Hospital Casualty pantu zinga tam ber chu pumna niin, road traffic accident vanga hliam tenau nei leh kawthalo luak an tam bawk a. Nizan chu uiseh leh OD hruai an awm lova, zurui medical 25 lai an awm thung. Khum ruak a awm lova; Emergency & Labour Room ah Inrinni atanga tukin dar 7 thlengin nau piang 24 an awm a, mipa 10 leh hmeichhia 14 niin an zinga mipa 2 leh hmeichhia 3 chu zai chhuah an ni a, vawiina nei tur 8 an awm bawk. Synod Hospital Durtlang ah nizan khan emergency case 15 neiin heng zinga 8 chu admit an ni a, mitthi an nei lova. Nizana Synod Hospital pantu zingah hian puitlingah pumna leh irhfiak an tam a, naupangah khawsik an tam thung. Khum ruak an nei meuh lova, Cabin a full a, ICU ah na zual enkawl 4 an awm a ni. Lawmna Ward ah nau piang mipa 1 awmin vawiina nei tur 6 an awm bawk. Kulikawn Hospital ah nau piang 1 leh vei mek 3 awmin, BN Hospital ah nau piang 1 an nei a, Cabin an full bawk a. Greenwood Hospital ah te, New Life Hospital leh Care Hospital ah te khum an full a. Aizawl a hospital dang zawngah Cabin an full a. Lunglei Civil Hospital ah nizan khan emergency case 30 neiin nau piang 3 an awm a, nizana Lunglei Casualty pantu zingah hian khawsik leh kawthalo luak an tam a, khum a full a ni. Power Report : State Load Despatch Centre (SLDC) atanga thu kan dawn danin, nimin leh nizana power kan hman tlem lai ber, nimin zing dar 4 a kan hman zat 27.1 MW a ni a. Kan hman tam lai ber, nizan dar 7:30 a kan hman zat 63.76 MW niin tualchhunga siam chhuah 4.1 MW nen kan hman zawng zawng 67.86 MW a ni a. Load shedding siam lovin eng pek theihna chinah chuan an pe kim a ni. LPG REPORT : Ni 23.8.2014 Inrinni leh 24.8.2014 Sunday inkar chhunga Borkhola, Assam atanga LPG phur motor, Vairengte Supply Check Gate a in report te : 1. MIZOFED, Aizawl ta tur Truck 1 phurh cylinders 288 2. Zopuii Gas, Aizawl ta tur Truck 1 phurh cylinders 288 3. Zothan Indane, Aizawl ta tur Truck 1 phurh cylinders 288 4. Biakkungi Gas, Aizawl ta tur Truck 2 phurh cylinders 594 5. Suakchhunga Gas, Aizawl ta tur Truck 2 phurh cylinders 576 6. Vanbuangi Gas, Aizawl ta tur Truck 1 phurh cylinders 288 7. Zoram Indane, Aizawl ta tur Truck 1 phurh cylinders 306 8. V. Neihkunga Gas, Aizawl ta tur Truck 1 phurh cylinders 288 9. Fidelia Gas, Hnahthial ta tur Truck 1 phurh cylinders 306 10. Guwahati atangin Mualkhang ami tur Bullet Truck 7 (pasarih) MIBO Tv. Lallawmawma (22) s/o. Thangchhunga, Sateek khua chu kar kalta Inrinni zing dar 5 vela a chhuak chu tun thleng hian a chin hriat a la ni lova. Amah hi mi pangngai hnuai hret a ni a, a lu thak vel hiat vak vak thin a ni. Amah lo hmu emaw, a awmna chin hria chuan Sateek khawtlang hruaitute emaw, Chhimphei Group YMA hruaitute emaw hrilh vat turin an ngen a ni.
Posted on: Mon, 25 Aug 2014 02:18:06 +0000
Trending Topics
Recently Viewed Topics
© 2015