MSU chuan The Mizoram Urban Areas Rent Control Act 1974 hmang hmasa lova Property Tax lak tum chu tha lo tiin an do a, Assam in Inner Line Forest Reserve Sq miles 509 min chuhsak chungchang High Court ah PIL file nise an ti. =================================================== July ni 2 khan Mizo Student’s Union (MSU) General Headquarters chuan an Pisapui-a President Chamber-ah Extended Office Bearer meeting an nei a. Meeting chuan Aizawl Municipal Council (AMC) in September thla atanga Property Tax, Municipal Area chhunga lak a tum chu kan ram dinhmun thlirin tul leh pawimawh angin lang mahse, a hmasa tur zawk ngaipawimawh hmasa lova, a hnuhnung a hman tur Dan kenkawh hmasak tum zawk tlat chu thalo an tih thu an sawi. Property Tax lak tur hian Aizawl khaw pawn hmun hrang hrang atanga zirna tha beisei a Aizawl-a zirna chhunzawm, mi inluah a khawsa te tan harsatna tam tak a thlen dawn nia sawiin thalo an ti a, MSU chuan Property Tax lak hrim hrim hi an dodal loh thu sawiin, he chhiah lak a nih hma hian Mizoram sorkar-in, The Mizoram Urban Areas Rent Control Act 1974, hi Mizoram chhunga Urban Area ah te a nihna tur ang taka hmang hmasa phawt turin Mizoram sorkar a ngen a. He dan hi hman a nih hma chuan Property Tax hi Aizawl Municipal Council (AMC) hian la rih lo se an duh thu an sawi. The Mizoram Urban Areas Rent Control Act 1974 hi Mizoram chhunga Urban Areas-ah te a nihna tur ang taka hman a nih hma a Aizawl Municipal Council huam chhungah Property Tax hi lak luih tum a nih chuan na takin MSU chuan a dodal dawn tih an tarlang a ni. MSU chuan Mizoram leh Assam ramri buai tun thlenga chinfel a la ni lo hi lungchhiatthlak an tih thu an sawi a, Mizoram leh Assam ramri buai chinfel a nih theihna tura MSU hmalakna hrang hrang leh ramri chungchanga inrawnkhawmna (Consultation) MSU in a buatsaih te thlirletna hun neih a nih hnuah hmalakna kalpui dan tur ruahmanna te an siam bawk a ni. Mizoram UT a nih lai, Kum 1974-a Mizoram sorkar in Assam nen a ramri buai chinfel a nih theihna tura sorkar laipui-a Memorandum a thehluh bak vawiin thlengin Memorandum dang sorkar anga thehluh la awm leh lo hian ramri buai chinfel duhna tak tak sorkar in a neiloh zia a tilanga an ngaih thu MSU te chuan an sawi a, Mizoram sorkar in Memorandum sorkar laipuiah a thehluh thar leh theihnan hmalak nise an ti. Mizoram leh Assam Chief Minister ten ramri buai chinfel a nih theih nan CM level-ah inbiakna nei ngei se, Inbiakna nei tura State pahnih C.M te ziaka ngenna thlen nise an ti bawk. Assam in Inner Line Forest Reserve Sq miles 509 min chuhsak reng hi Mizoram in kan neih let theihnan Court-ah zualko mai nise an ti a. Guwahati High Court-ah MSU in PIL File nise an ti bawk. Mizoram humhim tuma nasa taka hma lo la tawh tu kan pasaltha, Mizoram tana an nunna leh thisen lo hlantawh tute hriatreng na Lung Mizoram leh Assam inrina hmun remchang ah phun nise an ti a. A hun leh a phunna hmun tur chu la rel turin an dah a ni.
Posted on: Fri, 04 Jul 2014 04:19:37 +0000
Trending Topics
Recently Viewed Topics
© 2015