NA SERE E DODONU ME LAGATI E NA GAUNA NI MISA. E dua na ka e veitalanoataki tiko vakalevu na vakayagataki ni iyau ni Ekelesia. Ena vica na vula sqo eda raici tiko na ivakarau ni Misa Tabu Dua na iyau levu ni Ekelesia na Misa Tabu, ia ka bibi me qaravi na sere e lagati e na gauna ni Misa. Dina ga ni levu na noda isola ka levu e tu vei ira na taledi ni bulisere. E yaya me matata tiko vei keda na lewe ni Ekelesia ni sere e lagati e na gauna ni Misa e iyau ni Ekelesia. Levu na gauna e da dau rogoca ni Misa. Qo e levu na sere mai vei ira lotu tani tale e so. Na sere taucoko e dodonu me lagati ena gauna ni Misa me sere ni lotu Katolika. Sa laurai tiko ni levu na sere e sa lagati tiko ena Misa e sega ni sere ni lotu Katolika se na sere e bulia ga e dua. Sega ni kena ibalebale qo ni sega ni dokai se rokovi na nomuni taledi. O kemuni na dau buli sere,kevaka oni vinakataka me lagati nomuni sere e na gauna ni Misa e tu na ivakarau e dodonu meda muria. Ke o sa bulia rawa e dua na sere, vulica na kena ilagalaga. Vola vakavinaka,qai katona na domomu. Sa qai vola nomu ivola mo kerea mai vua na Arekapikapo me wilika na qaqa ni sere ka rogoca na kena ilagalaga. Qo e vukea na kena dikevi na vosa,na cavuti ni vosa kei na vuli vakalou e tiko kina. Na sere taucoko e lagati e na Misa e dodonu me vakadonuya na Turaga Arekapikapo ka me tiko e na loma ni vola ni sere ni Lotu Katolika. Na ka e bibi e na sere ni Misa ni oya e lagati vata kei na gauna bibi ni Misa. Levu n sere e lagati e sega ni veidonui vata kei na gauna e lagati kina. E ka bibi vei kemuni na dau ni sere moni na raica vinaka na tikina qo. Dua tale na tikina e gadrevi vakabibi me vakamatatataki yani oya ni levu na gauna eda sa veisautaka na ilagalaga ni sere makawa. Na ivakaro ni Ekelesia e vakasalataki keda me ni sere e sa vakatabui vata kei na vosa kei na qaqana. Kevaka e via veisautaka na lagalaga ni sere, mo ni kua ni veisautaka na ibalebale se vuli vakalou e tiko i na sere. Dua tale na ka e gadrevi me nanumi vinaka ni da lagasere se vuli sere oya na cavuti ni vosa. E dodonu me ra cavuti vinaka na vosa me salavata kei na ibalebale dina ni vosa. Ni sa cavuti vakaca na vosa e veisau na kena ibalebale ka na rogorogo ca na sere. Qo e tautauvata vinaka kei na lawa ni daunivucu ni sere ni cumu. E tabu vakalawa ni o lagata tale e dua na sere e qai lai katokatoni; tabu ni o veisautaka na ilagalaga ni sere; tabu ni veisautaka na qaqa ni sere; tabu ni o lavetaka na sere mai na dua na tape se CD. Na lawa kece qori e tu na totogi. Na lawa ni Ekelesia e vakatale ga oya . Koya gona na sere e dodonu me laga e na gauna ni Misa e sere ni lotu Katolika ka laurai mai na ivola ni sere ni Lotu Katolika.
Posted on: Mon, 11 Nov 2013 00:43:57 +0000
Trending Topics
Recently Viewed Topics
© 2015