NANTA - episod 92 | Pulai Mabuk Ari BBQ Babi utan Nyau laun maya Nanta seduai Alex pulai ari BBQ babi kampung ulih sida Jimbai. Bebendar seduai makai tunu jani. Numbas pemesai. Benung dara babi utan nya. Benung nyamai dipakai. Sida Sawai, indai iya enggau Jedon sigi udah makai lemai. Nyau lapar laban enda tan nganti seduai ke laun datai. Seduai madahka diri enggai makai. Kenya makai babi, ko seduai. "Urut pala aku Jedon," ko Nanta minta Jedon mai minyak makai champur bawang putih kena ngurut pala iya. "Ba anang ngirup kelalu mayuh," ko Jedon nyaut iya. Benung ke ngurut, Jedon nanya iya pasal batu kristal nya tadi. "Eh, Anta,... aku tetemu ka batu kristal ba pocket jeans nuan tadi. Batu nama nya?" ko Jedon nanya. "Bidik amai dik tetemuka batu ilau ba pocket aku," saut Nanta. "Udah buai dik ke?" "Nadai aku ka muai. Udah dibun indai. Tanchang iya enggau ubung mansau, lalu dibalut iya enggau chebik kain itam. Nya ia ba pinggai atas jemari," ko Jedon, madahka Nanta. "Manah meh nya. Enda aku nemu batu bisi ba pocket aku dia," ko Nanta, nyalamka iya. Sebenarnya iya malu nusoi mimpi iya ke diasuh orang ngambi baju songket ti dilempai di atas tunggul di kebun getah sida din. " Nama guna batu nya kini?" ko Jedon majak ka nemu ari Nanta. "Enda ku nemu. Meda ia pan bedau. Angka batu diberi antu ka nuan kini," ko Nanta betundi. "Eh, ni antu ka meri ka aku. Mimpi nadai ga aku tu," saut Jedon. "Angka malam yu legi ga nuan bemimpi," ko Nanta ngelarika diri. "Kati nuan deh Anta? Bisi mimpi ke?" Nyau seredah Jedon nanya ka nya. "Nama dik tumu-tumu ke tanah, ukai ngambi nya ke?" Nanta enggai nyaut Jedon. Ka iya ngemulaka Jedon enggai ga nyadi. Lama laun temu sida meh nya. Mina iya kecewa, diasuh ngambi baju tang tetemuka batu. Nya-alai manah iya ngaga diri tinduk ari ke disiasat Jedon. "Puu, nyau tinduk iya tu. Patut enggai nyaut aku agi," ko Jedon bejaku kediri. Tang seduai Alex amat tinduk. Dibap Jedon enggau pua seduai enggaika dadam. "Nyau tinduk seduai, indai. Enda tepulaika diri ke ruai," ko Jedon madahka indai Nanta. "Au endu. Lakka dia meh seduai. Mabuk jangka aku," ko saut indai Nanta. Tang dalam ati Lamah, anak bujang iya nya nyalamka Jedon utai ke bendar. Angka bisi utai ke enda datai, angka bisi utai ke enda puas ati Nanta, alai iya baka nya. Enda patut iya nurun ke tanah ngenumu nya ti nadai utai diambi. Tentu Nanta tu bisi mimpi, ko ati iya majak berunding. Ila, maya Nanta sedar, nemu iya madah cherita ke sebendar. "Ila meh endu. Ila aku nanya iya," ko indai Nanta madahka Jedon. Seduai lalu mulaika diri ngagai peninduk, laban mata udah ngantuk. Tinggal Nanta seduai Alex, gali lelading ba tikai. Pagi tentu tumu nurun gawa, nugal tegalan duruk sida. Nya baru Nanta ulih mantaika pemintar iya, nugal tegalan tiga iti sekali sereta. Betundi bebuti, begagai begulai enggau orang mayuh; bepeluh-peluh muai toxin ari tubuh. ~ >> besambung (Tolong komen awakka manah ke agi penulisan ia) ~DS
Posted on: Fri, 06 Sep 2013 03:00:56 +0000
Trending Topics
Recently Viewed Topics
© 2015