NEWS 1 Hetema 2013 Ko te tulaga o te tatou tau kua tau hui mai te tala o te tau mo ki tatou i te vaiaho nei, e moni lava e ua i na tahi taimi kae e matagofie lava te lagi lelei ma te laofie i te lahiga o na taimai. Aho Gafua 19 Aukuho. Na fai te maopoopoga a te malohi o te nuku mo te latou peleni galue o te aho, na fano lava te tino ki te galuega e galue ai, fakatahi ai ma te lakuga o te lapihi ki vao, vena ai foki ma te tau fakatotokaga lava o te Falemai. Kote 3 i te afiafi na taunuku mai ai te vaka PBMatua ki Nukunonu, na faimalaga mai ai te malaga mamalu a te SOPAC, e tuha e toka lima 7 fakatahi te kau malaga tenei, e toka 4 mai te SPC kae toka 3 mai te EDNRE, ko ki latou uma ienei nae nonofo i luga o te Falefa Resort. Aho Lua 20 Aukuho Na nofoia ai te malaea fono a te mamalu o te Taupulega fakatahi ma te malaga mamalu a te SOPAC, vena ai foki lava ma a latou matakupu taua na fakatalanoa ai Na hohoko atu kiei te fonotaga a te Fatupaepae, Na fakaauau na akoakoga i te taeao o te aho Lulu fakatahi ma te akoga a Matiti vena ai foki ma te akoga a te USP, ko te po na fakatahi ai ma te tupulaga, i te aoauli o te aho Tofi na fakauma ai a latou akoakoga ki taulelea. Ko te polokalame tenei e fakapatino ki te Vai, ko te fakatauaga e ki tatou te vai, ke mama te vai e inu e ki tatou ma te fakafakaleleiga o te vai. Na fakatupe te polokalame tenei e te GOVERMENT O AUHETALIA, vena foki ma te ICCN PROJECT (Climate Change Project) e tuha e 3 ia vaega na i loto o te latou akoakoga tenei, 1. WASH training mo tagata uma 2. GIS (Geographical Information & System Survey of the Rain Water Hervesting System (RWH) 3. Installation of the raingauge. I te taeao o te aho Falaile 23 Aukuho na toe fono ai ki latou ma te mamalu o te Taupulega ke toe lipoti atu e tuha ai ma te latou akoakoga nae fai, e toka lua ki laua mai te malaga tenei nae eva ki kaiga oi hiaki na alavai ma na fakamama vai o na kaiga kua uma te fakapipiki e vena ai foki ma te fuaga o na fale o ki latou ko heki fakapipikia o latou fakamama vai. Ko te afiafi o te aho Gafua 26 Aukuho na toe taliu atu ai ki laotu oi fakaauau te latou polokalame ki Fakaofo. I te po o te aho Tofi 22 Aukuho na fai ai te pati a na kau a tama ate kautafafao i i te hamiga o te latou ipu i te lakapi liki a te A. Na tofu peleti mai lava te kaiga mo te meakai, na maua foki o latou alofa mai te Taupulega e 3 fagu malohi ma te puha pia e fokotahi, ko te fakamanogiga lava o te meakai o te afiafi. Gafua 26 Aukuho Na fai ai te maopoopoga a te malohi o te nuku i tua i te Falepa, na lahi lele ni matakupu taua na fakatalanoa ai, vena ai foki ma te tufatufaga ki na kaufaigaluega mo na galuega o te vaiahao. I te taeao foki tene na tatala aloakia ai te vaiaho i te fakatauaga o te Gagana Tokelau e te akoga a Matiti. Na mua foki lava o na Vikiga e ve ona mahani ai mai te Afioga a Moheniolo Oliver Aro, hohoko atu ai kiei na kupu o te taeao te hui mai te komiti Tokelau Matalena Hefo vena ai foki ma na kupu fakalakeikau mai na hui o te talaluma, Hui Fatupaepae Palepa Tamiano, taumatua Penitito Setefano, vena foki ma te kupu mai te Huhuga a te Tiakono Pio Tuia, na kamata te vaiaho tenei o te Gagana Tokelau i te tauvaga Holo e tuha e 4 ia kulupu na tauva ko te kulupu ate Fetuao, Fakaifo, Ika Ha mate kulupu ate Higano Tumoa, ko na kulupu uma ienei na tauva na kamata mai i na Heke i lalo ke pa lava ki na heke i luga. E toka tolu i a Fakamahino o te tauvaga holo ko te tamana kia Iaheto Lui, matua kia Hili Aleki vena ai foki ma te tamana kia Tino Vitale, na fakaiku te taeao i he kupu mai te huhuga a te Tiakono Pio Tuia i hona loto fiafia ki na mafaufauga lelei ienei kua fakataua ai e fanau akoga te Gagana faka-Tokelau, na hohoko mai kiei te kupu fakafetai mai te hui o te komiti TOkelau te matua kia Maliana Luka na hohoko ai kiei ma te latou hiva fatele na tapuni ai te aho i te 10:30am oi fakaauau atu ai ki te faiga a latou matakupu mahani i te akoga. Ko te taeao o te aho Lua 27 Aukuho na fakaauau ai te latou vaiaho aganuku ki na takaloga faka-Tokelau, e tuha nae fakaholo lava a latou matakupu mahani i te taeao ko te 12:30pm na kamata ai loa na takaloga faka-tokelau, na kamata tena i te tauvaga ao popo, 2. tauvaga lalaga pekapeka 3. tauvaga lalaga peka 4. ko te oho taga 5. na tuliga, lalaga polapola, oka popo, valuga o te popo, tatauga o te lolo, fakaiku ai ki te tohoga maea ana kau e fa, na maea tena oi fakafiafia ai ia fanau i te tohoga maea ana matua fetaui ma te kau a faiakoga na malo ai te kau ana matua. Na iei he kupu fakafetai ma i te matua kia Maliana Luka ki te mamalu o matua o na ai ko te latou hapoti malohi ki te fakahologa a na polokalame a te akoga. KO te afiafi lava o te aho tena na vavae ai na kau e fa mo te tapenapenaga kia latou kuka fakatokelau mo te aho alafaki. na fakaaoga te umu o Talikilagi, vena ma na tahi kuka i te fale o te faiakoga i vao, kae e lua ia kulupu na opo a latou kuka na fai te latou afi i te tafa fale akoga o David Longe. I te taeao o te aho Lulu 28 Aukuho na fakataunuku ai loa te aho o na kuka faka tokelau, i te 12:30pm na talolo uma ai na meakai Tokelau ki te Kaimakoi i Matiti, na fakalaulau na meakai e te matua kia Maliana Luka, na iei na manu vaefa (tulou), loi fahua, fekei uto, hahave hunuhunu, ko te ume hunuhunu, ota matutu, atu kapui, uto tao, katiga, ma na tahi meakai valevale kua lanu kehekehe ai te aho, na iei na valakaulia fakapitoa o te aho, kae maihe ai na matua na fakatahi atu ki te fakatauaga o te aho Aganuku a fanau akoga a Matiti. Ko te taeao foki lava tena o te aho lulu na iei ai he huiga lahi lele ki te tau ko na uaga malolohi kae na iku lava ki te lagi mama ma te laofie i te taimi na fakatino ai te polokalame a te akoga. Na vena ai foki ma na fonotaga ate mamalu o te Taupulega i te taeao lava tena. Ko te taeao o te aho Tofi. 29 Aukuho, ko te fakaaauauga ote Vaiaho Aganuku a te Akoga na kamata i te 8:30am te latou tauvaga lauga Fakatokelau. I te po o te aho Tofi na fakaauau ai na happy hour a te nuku fiafia fakatahi e heai lele he vaega matavale na tutupu ai. I te taeao o te aho Falaile 30 Aukuho na fakataunuku ai loa te fakaalialiga lakei faka-Tokelau a fanau akoga o Matiti, na maopoopo uma ki latou ki te tafa auala hima i te taeao i te 8:00am oi hau ai te latou holo ki te fale akoga, na kitea lava ki te tukehe ma te matagofie ona lakei valevale kae maihe ai na tapenapenaga a matua kia latou fanau mo te tauvaga tenei. Na maea te fakaalialiga lakei, oi hohoko ai loa kiei ma te laugatogi mo na tauvaga uma ienei na alo atu kiei na kau e fa i te vaiaho katoa, e tuha ko te fakatupega o te vaiaho tenei, na tofu lava te fanau ma i te kaiga ma tana pepa na fakaeva ki te nuku mo ni alofa mo te fakatinoga o te laugatogi tenei, ko te vaiaho foki tenei na fakamalohia ai ke meakai Tokelau uma ia fanau akoga. Hiaki mai te laupepa tenei i luga o te FB ko te TE MANA mo te fakamaoniga atuga ki tau matamata mai ki te tukehe o te manaia o te vaiaho tenei na fakataua ai te Gagana Faka-Tokelau. E vena foki ona pihi ai te nuku ki na fonotaga a te malaga mamalu a te Statistics ko te vaega tenei o te update agiga ona fiuainumela (data) ko te website tenei tokelauNSO.tk i luga o te neti e maua uma ai ki loto na fakamatalaga o te vaega tenei. Na fakaauau a latou fonotaga ki te taeao o te aho afiafi o te aho Valaile. E vena foki na iei na tahi fonotaga na alo atu kiei te mamalu o te Taupulega fakatahi ai ma te kaufaigaluega a te Hikomaga ma te Tama o Kaiga te tamana kia Mika Perez vena ai ma te matua kia Asi Paislio e tuha ai ma he manakoga o te Fono Fakamua ke toe iei he tamilohaga ma te mataeke tenei ki na motu e tolu mo te toe tuku atuga ki na Taupulega na peleni a te mataeke tenei. Na fakatino te latou fonotaga ma te Taupulega i te aho Falaile 30 Aukuho. I te aho Tonai 31 Aukuho na fakamanuiagia ai na vaka na olo oi ahia te maeava na tufa ki kaiga e ve lava ona mahani ai na tofuhia foki lava te kaiga ma tona inati. Na toe fakamanuiagia foki ia ia Nukunonu ina maeava i te aoauli o te aho nei aho Ha Hetema. Fakafetai lahi mo ki latou na olo oi ahia te maeava. I te taeao nei aho Ha 1 Hetema na fai ai na fonotaga ana faitu e lua Amelika ma Egelani ko na tapenapenaga ienei mo te Hulufaga lahi o Egelani e loma nei i te mahina fou Oketopa. Ko te po nei e fai ai te fonotaga mamalu ate mamalu o te PTA matua ma faiakoga o Matiti. Litia Maiava mo na tala fou NUKUNONU TOKELAU E momoli fakapitoa atu na alofaaga mai te nofoa lua kae maihe ai te nuku katoa e fakamanuia atu ai ki te aho o Tamana ki te Afioga a Patele Leone vena ai foki te Afioga a Patele Penehe, kae maihe ai na tamana uma lele o Tokelau. Alofa mo te matua kia Novena kae maihe ai te tamana pele kia Alehana ki to aho fanau tenei, fakafetai ki tona alofa kua toe aulia mai ai e koe te tamana pele he tahi tauhaga tenei fakaopoopo ki tolaga ke toe haga tului mai pea ni tahi tauhaga mo koe ke toe feiloaki ki tatou i he aho i mua. Alofaaga mo koe mai tau afafine pele kia TIma ma te fanau. vena ai foki LIna ma Lafaele vena ma te pele a Tima ko Tufele, ma te kaiga katoa. maia Tima Alogaaga mai a Koleta Amato mo na kaiga uma lele i luga o NIU HILA E momoli fakpitoa atu foki na alofaaga ki te aho o Tamana ki te Afioga Patele Leone vena ai foki te Afioga Patele Penehe, te tamana kia Kahiano ma na kaiga uma, te tamana kia Penehe ma te kaiga, kae maihe ai taku pele fakapelepele kia Kalolo e manatua pea atu uma koutou ina talohaga fai pea i aho takitahi, alofaaga maia Elihapeta Write ma te fanau.
Posted on: Sun, 01 Sep 2013 05:31:28 +0000
Trending Topics
Recently Viewed Topics
© 2015