NGIFUNGUGOGU MASIBANDA Chapter 9 Lanxa nje uNkunzemnyama wayedonsa ngegiya lokucina kodwa wayephila. Ayelokhe ebelethana amalanga wona angelandaba lokuhlupheka noma lokuhlala kahle komuntu. Laliphuma lazo liphinde liyetshona lazo, lokho ukuthi ubani ungaphi udleni utshone njani ilanga lalingakudingi lokho wawungafunga uthi kulawomalanga laliyabe lijahe ukuyamunya kunina. Nanko phela laselihambela le eceleni kude. Nanto seliphumile zukuzuku selikhotheme kwazise kwakusebusika ke lapho ngenyanga kaNkwenkwezi kuqanda imihlolo. Unkabi wawumthola ehamba nje engafakanga lutho enyaweni mhlawumbe efake lokabudula ibhulugwe. Kungayisikho ukuthi wayezonda ukugqoka enyaweni hatshi kwakungekho bakithi. Laye nje wayesezisola ezibona engafanelanga nje ukuba ngumuntu wayezibona sengathi wadalwa ngephutha. Lapho ayenyathele khona lumfana wawungafunga uthi kuhambe ithalakitha imikenke ibhalile. Hayi bantu udubo lulenkani kanti ukuhlupheka kwedlula ukufa yebo owatsho njalo wayesekubonile, kakhulumanga ekubonela kwabanye kwakumfikele. Amafutha okugcoba umfana wayewacine ugogo wakhe esasekhona phoke wayegcoba ngawokupheka nanko phela umfundisi wayefika atshiye emkulwini. Lawo awokupheka enzelwa ukupheka hayi ukugcoba. Wayethi angawagcoba athi ukuphuma afane nje lomuntu okade engagcobanga sekuphephuke lomoya. Wawumthola umfana emhlophe nke njengokhuni olwawoma ntolontolo. Ukugeza wayegeza ngenkunzane phoke akahlambuki umuntu ogeza ngenkunzane. Wayezibona nje ukuthi okwakhe kwehlukile kokwabanye. Nanko phela ontanga yakhe babehamba ngababili ngabathathu yena umthole eyedwa qekele engaxoxi lamuntu. Bakithi inwele lezi zasezitshakazile, seziphothene okokuthi nxa wayezagelwa kwakuzafuneka ikhuba lenkabi ngoba isigelo sasingaba sincinyane lapho. Angisayiphathi ke eyebala ayeyilolona lumfana lawe nje kuvele kukucacele ukuthi wayemnyama okwedlula ibodo elitsha nsukuzonke eziko lingagezwa. Kubuye ngubani njalo,wayengahlala phose abe mabili amaviki engawatheli amanzi emzimbeni wakhe wayengasiboni isidingo sokugeza lumfana. Wayethiya izikhwehle lamathendele abambe ayexaba emzini wakhe yikho ayetsheba ngakho. Nxa wayethutsha le wayengabonakali ukuthi wayesiyaphi wawuzubone seseduze ukuthi uza ngakuwe, wawumbona sesobele ukuthi uyale. Wayebonakala nje ngamazinyo ukuthi ngumuntu. Nxa wayesiyakukha amanzi wayehamba ebusuku ngoba nje engafuni kuhlangana lomuntu. Ngale induna uDlamini yayizizwa imzonda kakhulu lumfana okokuthi yayisizwa kuthi ngabe ingamsuselamanqe. Kwaze kwancenga unkosikazi wayo omncane. Hawu kodwa Dlamini,Sibalukhulu wenzeni bandla loyamfana emncane kanjeyana. Akalacala loyamfana mina futhi logogo wakhe ngangingamsoli ngitsho lakancane. Hayi ungakwenza konke phoke loyamphefumulo ongelacala ufuna ukuwubulalelani?. Unkosikazi wenduna omcane esehlisa izinyembezi. Lanxa nje leyonduna yayilenhliziyo yelitshe kodwa ke mhlalokho layo yamlalela lo owayesekhihla isililo sikaNandi. Kusenzeka konke lokhu umfana wayekhula. Nyangazonke wayehamba ngokuhwalala ayeguqa lapho kwangcwatshelwa khona ugogo wakhe afike akhulume asazi ke ukuthi wayefika athini.*** 0027736821913 or 0027742534384 call me eJoz. Zim Byo coll Senzo uthole ugwalo lukaNgadi noluka Sgubheqolo. Watch out for chapter 10 Pls like and share my page Mathanzima Dube - Writer/Ndebele Novels
Posted on: Thu, 03 Jul 2014 23:03:36 +0000
Trending Topics
Recently Viewed Topics
© 2015