NI 19. OCT. 2014 CAREER AWARENESS NEIH A NI DAWN Zirtirtu leh Zirlai Class -V chin chunglamte kim taka kal theuh tur leh Zan lamah Zirlai nu leh pa aiawh ‘Pa’ kim taka kal tura ngen leh hriattir kan ni. Branch YMA bul tumin ni 24. October 2014 (ningani) Dar 10 : 00 am a tan tur hian Education Awareness Campaign cum Career Awareness campaign neih a ni dawn a. Hemi ni-ah hian Zirlai Class -V chin chunglam leh zirtirtute kim taka kal theuh tura ngen leh hriattir kan ni a. Zan lamah Zirlai nu leh pa aiawh a theih hram chuan Pa-te kal theuh tur ngen kan ni bawk. Resource Person atan Pu K Vanlalawia Asst. Professor Govt. Aizawl North College leh Pu L. Thangmawia Asst. Proffessor Pachhunga University College te an lo kal dawn a. Khuallian tura kan beisei Pu H. Rohluna Bialtu MLA erawh rokhawlhna avangin a rawn kal thei dawn lo a ni. Programme hetiang hian duan a ni. Ni 24. October 2014 Zirtawpni CHAWHMA ( Zing dar 10 : 00 ) ( Hetah hian Zirlai Class- V chin chunglam leh zirtirtu tan bik) Chairman : Pu C. Chawngnghilhlova Secy. Branch YMA Hunserh : Pu Rosangliana Executive Committee Member Cultural dance : Prebyterian English School Thusawi : (1) Pu L. Thangmawia Asst. Professor. (2) Pu K Vanlalawia Asst. Professor . CHAWHNU ( Zirtirtu bik tan ) Chairman : Pu K. Lalrodinga President Branch YMA Thusawi : (1) Pu K. Vanlalawia Asst. Professor (2) Pu L. Thangmawia Asst. Professor. ZAN ( Zirlai aiaawh nu leh pa te tan. A theih hram chuan ‘Pa’ bik ) Chairman : Pu Lalhmingmawia Vice President Branch YMA Tanhun : Dar 6:15 pm Hunserh : Nl. Rotluangpuii Executive Committee member. Thusawi : (1) Pu K. Vanlalawia Asst. Professor (2) Pu L. Thangmawia Asst. Professor. Vote of Thanks : Pu PB. Ramthanzuala Treasurer Branch YMA Branch YMA chuan he hun hi ngaipawimawha kal theuh turin min ngen tak meuh meuh a.Tin, Branch Executive committee member-te a tulna a pianga che thei tura kim taka kal theuh tura ngen leh hriattir nghal kan ni. SECTION NEWS HRANGCHHUANA SEC : Hrangchhuana Section YMA member zawng zawngte naktuk (Thawhtanni) zingkar hian Thlanmual samfaia hnatlang neih tur a ni a. Member-te thawkchhuak theuh tura ngen kan ni. Pu J. Roliana kawmchhakah innghahkhawm tur a ni ang. PHAISAMA SEC : Tunkar zirtawpni zingkar khan Pastor Quarter bul tuiluan kawrh, leiin a hnawh chu thianfaiin hnatlang an nei a. Member an thawkchhuak tha-in member thawkchhuakte chungah hruaituten lawmthu an sawi nghal a ni. TRAINING THEIH Capacity Building & Skill Development Scheme hnuaiah thil chi hrang hrang training theih a ni a. A hnuai a mi ang hian training dan tur chu a ni. Handicraft Training : Dt. 21st - 24th Oct, 2014 BDO Office Ngopa. Training tur : Paikawng / Kho tah dan. Training duh te chu Oct, Ni 21st ( Thawhlehni 9 :30 ah BDO Office Ngopa-ah in report tur a ni. Carpentry Training : Ni 28th - 31st Oct, 2014 BDO Office Ngopa.Training tur : Stool / Tukverh Frame siam dan.Ni 28th ( Thawhlehni 9 : 30 a.m ah BDO Office Ngopa-ah in report tur a ni. Kan khua atang mi pali (4) ve ve training theih a ni a. Diltu zingah pali ai tam an awm chuan kan VC ten training tur chu an la thlang leh ang. Mi pakhat zelah DA Rs 500/- per day pek a ni ang. EDITORIAL : VISION Kan ram India ram zau tak mai hi kum 2024 ah chuan ram hmasawn retheihna umbo a, Developed country a hlankai hman tum ani a. He an hmathlir tihhlawhtlinna tur hian kum engemawti kalta atang khan kawng chi hrang hrangin a inbuatsaih chho mup mup a, vawiinni thlengin inbuatsaihna hi la kal chhoh pui zel a ni. He kan khawtlang ngei pawh hi tun atang kum 5/7 ah hian engtiang dinhmunah nge a din dawn tih hi kan hmuh tlang a ngai. Chu kan dintir tumna chu a hlawhtlin theih nan vawiinni atang hian hma kan lak a, hmathlir thui tak kan neih a pawimawh hle. Hmasawnna tur atan hian vawilehkhata hmalaka nghal mai theih hi chu a awm teh meuh mai. Amaherawhchu rotling tak tak (Asset) nei tur hi chuan a hma daih atanga in buatsaih lawk a ngai thin. Chumi a nih avang chuan hmathlir (Vision) thui tak kan neih a, development sum kan hmuhte, kan hailuh tum nate hi awmze neia kan hmana, kan kalpui a tul tak zet zet ta. Entirnan Kum 5 liam leh ta se tui kan hnianghnar tawh ang em? Zirnaah engtiang dinhmunah nge kan din dawn ? thil dang dangah pawh a ni ang, khawtlang awm dan tur hi kan hmuhlawka, dintir kan tumna zawnah kan dintir theihna turin vawiinni atang hian Vision mumal tak kan neih lawk a pawimawh hle. VC LEH YMA HRIATTIRNA VC leh YMA ten kawngpui hnaih zual insenghawi tura an hriattir tawhte la insenghawilo kan awm a nih chuan a ranglama lo insenghawi tura ngen leh hriattir nawn kan ni a. Luhlul chhuaha insenghawi tumlo kan awm a nih chuan hnatlanga senghawisak an ni ang. VANTLANG INKHAWM Tunkar nilaini khan ni 100 inhlawhna chungchangah vantlang inkhawm neih a ni a. He inkhawmah hian ni 100 inhlawhna kalphung ( Convergence) thar inhrilh hriatna hun hman a ni. BDO Staff te an rawn kal a ni. LEIMIN RAWN EN Pu Ramhluna EE PWD Khawzawl Division leh Pu Minlunthanga SDO PWD Ngopa te chuan tunkar nilaini khan kan khawchhung leimin dawl dan tur an rawn enfiah a. Duhthusama ruahtui a la hul loh avangin leimin dawlna hi la siam nghal mai loh tha in an hria a. Ruahtui hulhar veleh hna hi thawh tan tur a nih thu an sawi a ni. TUI POINT DAH BELH PHE Department chuan Bungkawn veng Pi Vanlalruati Hotel bulah tui point an dah belh dawn a. Tunah hian tui point dahna hmun tur siam mek a ni. LEHKHABU THAR Branch YMA Library -ah lehkhabu thar eng emaw zat a thleng thar a. Thawhtanni leh inrinni zing dar 6:00 ah hawhchhuah theih a ni ang. SPORT Nimin ( inrinni) tlai dar 2 : 00 khan KFL chu khelh chhunzawm leh a ni a. Senior team-ah Tv. Lalrinchhana Team leh Tluangtea Memorial Team ten khelin. Tv. Lalrinchhana team te chu 2-0 in an chak a, Junior team-ah Pi Zachingi Team leh Pi Chawnpuithangi team ten an khela Pi Zachingi team te 2-0 in an chak bawk a ni. TUNKAR KHAWDUNGSEI : Kar bul atang ruah tam vak loin a sur zeuh zeuh a, boruak lum lutuk pawhin kiam lam a pan zel a, zing lamah phei chuan thlasik rim a nam tawh hle. Buhlu chuh lai a ni a, a tam zawk chu buhlu chuhin an tul thei hle a, feh kal an hma theiin an haw tlai thei hle thung a. Buh pawh kum dang zawng aiin a hlawk dawn niin a hriat a, lo neitute a ti phur hle. Sumo Service te an tlan tluanga, Bazar-ah sa lei tur a awm lova, rahno leh thlai hnah lam kan la hnianghnar thung. Chakai meichher chhit an awm deuh reng bawk a, khawnvartui dealer-ah Litre 3 -in sem ni bawk. Cable lamah Korean film leh Shavdan India ten sorkar-na an la chang tluang zel a. India Super League pawhin en a hlawh hle. VDP lam pawh an duty ngawrh thei hle a, khawtlang boruak an ti nuam hle. Thil thar nei kan hriat theih chinah Pu Tumsanga‘n fapa a nei thar a, Pu Vanlalnghaka S/o J. Roliana chuan fanu a neithar bawk, Pu CL Tluanga’n Pu Hrangchhuana In bul Phaisama Section-ah In a rel thar mek a, Pu Vandailova’n Bike a nei thar a, Pu Aithianga ten an Inah Dawr-te an hawng thar bawk. Damlo ngaihtuahawm lutuk kan awm lova, kan khaw damdawi In-ah Ngura s/o Zoremsanga Sailo khawsik avangin enkawl mek a ni a. Pu Lalthanzama VVCP pawh Aizawl lamah Physiothearapy lain an thang mek a. Doctor traning- in a zin mek bawk a. A nawlpui ang chuan kan dam tlang e. Editorial Board Editor : Zopiansanga 7308288633 Jt.Editor : Lalthasanga 9863262615 News Editor : TC. Lalrinkima 9863704612 Cir.Manager : C. Lalvulluaia 7308125631 Patron : K Lalrodinga 7308380128 Corpndt. : Vanlaldiki 9863525778
Posted on: Mon, 20 Oct 2014 04:06:01 +0000
Trending Topics
Recently Viewed Topics
© 2015