NULA HMEL THA LEH FEL NUPUI TUR ATANA HRIAT LAWK DAN. (TLANGVALTE HNENA THU LAWMAWM LEH NUN DAN MAWI) (A bikin thingtlang lam tan deuh bik) Mizo mipate hi abik takin nupui tur zawng a ‘inrim’ (nula rim) thin hnam kan ni a. Vai te angin tet-te (naupang lai) atanga inhual sa diama innei hnam kan ni lo a ni. A bik takin mizo chhungkuaah chuan mipa a lo sei lian a, rawlthar niin tlangval a lo nih chhoh chuan ngaihzawg emaw nupui tur chu a zawn ve ngei a ngai thin a ni. Nupui tur chuan nula fel leh hmel tha pian nalh bawk si chu an nu leh pa te ngei pawh chuan an duh puiin nula fel leh hmeltha nei ngei tur pawhin an fapa-te pawh an duhsak thin reng a ni. Tin, mizo danah chuan tlangvalte chu khawiah pawh kal chhuak se la mizo nula zawng zawng chu tu pawh an lengin an rim thei a, hmel an lo induhtawn phei chuan nupui atan pawh an hruai haw thei reng a ni. Khual khuaa tlangval tawngkam thiam leh to deuhte phei chuan nupui tur hi an hawn haw thin reng a ni. Sawi tur tam tak pawh an awm a ni. Kan khawtlang nun hi a nuam em em a, nulat tlangvalna kawng-ah pawh a zalenin a nuam em em mai a ni. Mizo tlangvalte hna pui ber pakhat chu nula rim hi a ni awm e. Nula rim hi a nuam em em a, nula rimte an lo fel phei chuan haw nachang hriat lohva rei tak tak len mai hi a awl a; min ngaizawng ta vek emaw tih mai tur hian nula fel chuan a inlengte (tlangval te) chu a be tha em em vek thiam a ni. Amaherawh tlangval ni ve si, zei lo lutuk leh nula hmel tha leh nupui tur tlak tak tak zawng thiam lo leh angaihna thlawt hre lo hi mizo tlangval zingah hian kan awm ve teuh avangin nupui neih chu sawi loh nula rim tur tak ngial pawh an hre lo va, senior tak thleng pawhin nupui fanau nei lovin an awm reng phah mai thin a ni. Chuvangin tunah hian abik takin tlangval/thalaite tan nula fel leh hmel tha si nula rim tur engtinnge an hriat theih anga, chu nula chu eng anga fel nge a nih tih leh nupui tur atan a tha tak tak ang em… tih chu an lo hriat lawk chu an tihmakmawh chu a ni. A pawng a puia tlangval khawlai leng leh an hmel hriat ngailoh hnenah “In vengah nula hmel tha leh fel rim tur in hria em?” tia zawh mai mai chuan tlangval sual deuhte chuan an lo hmusitin kutte pawh an thlak duh mai ang tih pawh a hlauhawm thei a ni. Chutiang em thleng lo va fel taka i hmuh theih dan tur kawng chu tanpui turin ka awm a, ka hriat ang ang che pui turin i tan ka inhawng reng a ni tih i lo hriat hmasak ka duh e. Zam mai lo la, ka thurawn hi lo ngaithla khiau mai teh khai. A bikin, thingtlang khuaah i thianpa nen in zin dun dawn a ni thei e. Thawmhnaw i neih ang tawk tha leh mawi inbel ve ngei la, pawisa tlem azawng tun ang laiaih chuan (ent :- sang hnih khat vel tal) i pai ve ngei chu angaih ka ring. Tichuan thingtlang khuaah chuan i thianpa nen chuan in zin ve ngei dawn ta a ni a. I thianpa chhungte inah nge i chhungte in lamah in thlen dawn tih kha chu ka hriat ve kher angai awm lo ve. Amaherawh tlangvalte in la ni ve a, zan lamah nula rim kha induh ngei ngei anga in nula rim a lo fel viau phei chuan i damchhuanga i kawppui tur pawh a lo ni reng thei asin le! In va zinna khuaah chuan hmelhriat in ngah vak ka ring lo va, in vawikhat zinnate anih phei chuan inbuai viau mai thei a ni. In nula rim tur han zawh nghal chawt lah kha khual khuaah chuan tuman tha takin an lo hril duh kher che ka ring lo….Chuvangin ti hian in ti mai dawn nia. In va zinna tur khua chu tlai thim hma deuhin in thleng ta hlawl mai a, veng kawt chhuahah chuan dawr kai (Dawr) an lo awm deuh ngei ngei ang. Tin, tlai lam khaw thim hmaa naupang fel tawh tak tak kawng dung leh kawng sir vela hlim taka lo infiam nak nak chu i hmu ngei ngei bawk ang. Mipa naupang fel tawh tak infiam bawrh bawrh zinga a fel hmel ber chu han ko hrang zawk la, “Vala, tunge i hming… i va fel ve? Khawnge in in ? …..I nu leh pa hming i hria em ? tiin tlangnel tak leh hlim tak khan chu naupang chu i zawt dawn a ni…Chu naupang chuan, engkim chu a hrilh vek dawn che a ni. Chutah tak mai chuan “ Vala naupang fel tak i ni reuh ve! Thil ka khilai ang che enge i ei duh zawng?” tiin dawr-ah chuan chu naupang ei duhzawng leh lawm zawng chu i tihsak ngei ngei tur a ni. Naupang pawh chuan a nel tanin a ngaina deuh tawh nghal ang che….Hmanhmawh thut thut lo chuan chu naupang chu thil i hriat duhzawng apaing i zawt anga a hrilh zel dawn che a ni. Amaherawh chu naupang chu a khat tawk a i fak deuh reng a ngai ang… Chutah i hriat duh tak mai chu i zawt tawh dawn a ni… “Vala, in veng chhungah hian nula hmel tha i tih ber tu nge?... A hming i hriat ka ring tlat?... Chuan khawnge an in..? Inlengte angah thin em ?” tiin i zawt ang a…Naupang chuan “ Hria e, kan venga nula hmel tha ber chu maw….’U Partei’ khi a ni. Tlangval pawh an inah an leng nasa thei lutuk… Kan In chhak chiahah an awm a lawm…Tlai lamah hian tuikhurah tui chawiin a kal thin a, tunah chuan inah a awm ka ring tawh.” tiin a chanchin i zawh apiang chu dawt tel miah lovin a hril fai kelh mai ang che. (Naupang leh mi ang zan lo te hian dawt hi an sawi ve ngai lo. Tin, naupang hian tunlaia hla lar leh hmel tha leh thil engkim mai hi puitling ai mah hian an hre thei em em a ni. ) ti chuan i thil hriat duh zawng zawng chu i hre tawh mai dawn a ni. Lungmuang tak leh mi dang (veng chhung tlangval) tih buai ngai miah lovin chu khuaa nula hmel tha ber mai chu i hre tawh anga, hlim takin i va leng thei tawh dawn a ni. Tawng kam leh chetziaah te i tihfuh phei chuan nupui atan zankhat thil thuah pawh i hmin der mai thei a ni. Kha lam kha chu i mawhphurhnaah dah ta mai ila. Tin, i nula rim chu eng mi nge a nih tih i hriatchian duh tak tak a nih chuan chik takin en la, a tawngka chhuak leh a chhungte a biak dan atangte khan a hriat theih a ni…A pa in “Mami vawiin chu chumi/khami lo ti rawh” a tia a teu hlar chuan enkawl har tak a nih duh hmel. Tin, a chhungte in-ah kalin va lenpui la, a chhungte a biak dan leh a chhan dan ang ang kha in inneih hunah pawh a chhan dan tur leh awmdan tur dik tak a ni tih i hriat ka duh a ni. Tunah a awmdan kha nakinah pawh a awmdan tur hlimthla dik tak a ni. Tin, tlangvalte in ni a tlangval tam tak mikhualnaa an zawn rilruk chu a tuitling hi a ni. Veng chhunga han zawh mai te in la hreh ve khanglang awm bawk si a. Tihian ti leh mai teh u. Mi vawk vulh kha chiang takin en ula, vawk thau tha tak an lo vulh a nih chuan “ Chutah ngei chuan zuk zawt ta chawt ula, a sual duh lo khawp a ni. A chhan chu zu an thlawrna fe hi vawk an pe-a vawkin an ngeih em em a, an vawk te pawh an thau kung kung mai thin a ni. Ka sawi hnem lutuk chuan ni dangah sawi tur a awm lo palh ang tah hian rek chum hmawk mai teh ang.
Posted on: Sun, 20 Jul 2014 12:46:04 +0000
Trending Topics
Recently Viewed Topics
© 2015