SERVICE PAWHSEISAK HI Mizo Students Union (MSU) chuan Mizoram sawrkar Fisheries Director Maruf Alam Razi hna (service) hun chhung pawhsei chu dodalin he a hna pawhseisak hi pawm lo turin an ngen a. Ngenna mah ni se, a hlauhawm hlein a rinawm a. Hetiang hnuah hian Pu Razi chuan a hna pawhseisakna chu a pawm emaw a zawm ngam emaw a rinawm loh hle. MSU hian hetianga an tihna chhan chu Pu Razi hian Mizo thalai hna zawng mekte hmalam hun a luahsak emaw, a dal emaw an ti niin a lang a. Chumi awmzia chu Pu Razi hna hi pawhseisak ni lo se,zawm lo se, a hmun chu a ruak ang a, a hnuai ami chuan kaisangin a luah ang a, chutianga kal zelah hna ruak a awm ang a, chu chu hna zawng mek thalai tuin emaw hna a hmuh phah dawn tihna niin a lang. Hei hi a dik theihna lai a awm mai thei. Mahse, hna zawng lai chuan Director hna chu a luah nghal thei lo hrim hrim tih chu a chiang a ni. A bikin Fisheries Director tur chuan Joint Director-a kum 5 lo ni tawh leh Fisheries Extension Officer kum 25 lo ni tawh nih a ngai a. Chutiang mi chu an awm reng a, Pu Razi hi service chu a pawhseisakleh thin a nih chuan sawrkar chu dem theihna lai a awm tih a chiang a ni. MSU dinna hi thui tak a dik laiin, Mizoramah hetianga service extend-sak hi engemaw zat an awm a. Sawrkar ve lem chuan dan tlawhchhan emaw, chhan tha tawk emaw a nei ngei tur a ni. Sawi tak angin an Recruitment Rules-ah la ni thei an awm loh avang te, chu service extend chu thiamna bik nei a nih avang emaw, sawrkarin mamawhna a la neih avang emaw a ni thei ang. Central sawrkar pawhin tunhnaiah Cabinet Secretary Ajit Seth pawh a service thlaruk an pawhseisak a ni. Chhan thatak vang ni loa sawrkarin tu emaw a duhsak bik a nih chuan, chu chu a dik lo a, Fisheries Director thu-ah pawh hian dan leh kalphung pela induhsakna uchuak a awm a nih chuan a thutlukna chu a sawhsawn ngei tur a ni ang. Mizorama NGO (Non Governmental Organisation) te hi a tam ber chu hnam (community)-a innghat, Community Based Organisation, CBO an ni zawk mah a, hnam dang lakah hian an kha em em hlawmin a lang. A nihphungah MSU-ten sawrkar hnathawk service extend an do a, thalai hna zawng mekte tan kawng an dal an ti hi a ngaihthiamawm a, mahse, chhawrnawn (re-employ) an ngaithiam leh si chu, re-employ pawhin a hnuai amite kaisanna emaw a hnuai zela hna ruak tur emaw chu a dal tho a ni. Hetiang a nih lai hian sawrkar hna extend emaw re-employ emaw eng emawzat an awm lai mek zel laiin MSU an chetna chu hnam dang lakah a ni fo a. Hei hi chu a hrisel lo a, tute emaw hnam inthliarna nei tia an puh thin angte thoa chetna a ni. Zirlaite hi dai zau, hriatna zau, mi dangte pawm thei, India ram hi ‘unity in diversity’ a nihzia hria, anmahni pawh India ram mai ni lovin khawvel ram hrang hrangah zirin vakdarh se, hna an hmuhna apiangah hmuin thawk se, lo duhsaktute an awm pawhin inlawmpui se, chutianga hna an hmuh leh an thawhnaah chuan leh duhsak an nihnaah chuan tute mahin an thik ve ngai lo tih hriain, hnam ang zawnga inngaihtheihlohna ang hi khawvel zim zel (global village)-ah hian kalsan thei se, a duhawm khawp mai. Mizoram leh sawrkarah hian Mizo hlang hlak hi a awm theih ngai dawn loh a, a bik takin, Competitive Examinations-ahte phei chuan zirlaite hian rual ela tan an lak loh chuan competitive hnaah te hian ram leilung neitute hi an chep zel dawn niin a lang. Zirlaiten tan han la teh se. Chief Secretary tur pawh Mizo an vang tan hle mai thei a ni. (MIZO AW Editorial Dt. 5.6.2014)
Posted on: Wed, 04 Jun 2014 17:25:18 +0000
Trending Topics
Recently Viewed Topics
© 2015