SUMO CHESUALA THI RUANG SONAPUR AH A LA TANG August 12, 2014: Pathianni kalta Aug. 10 chhuna Jowai thlang lawk Umlong a Sumo AS-11/DC-3076 chesuala thi pahnih zinga pakhat zawk, 9th Assam Regiment Lalthanzauva (25) s/o. Vanlalruata (L), Muallungthu Kawn veng ruang chu nimin khan Shillong Civil Hospital ah post mortem a nih hnuin nimin tlai dar 5 khan Shillong an rawn chhuahsan a, Assam Regiment atangin Subedar Chhetri leh Havildar Zoramchhana ten an rawn zui bawk. Tluang taka rawn kalpui tura beisei a nih laiin, nizan khan Sonapur leiminin a dang a, tukin dar 6 atang khan leimin chu JCB in a paih fai na-in lei hi a la tlak reng bakah lung tla pakhat chu a len em avangin JCB hian a paih zo lova. Leiminna helamah ruang lo lachhawngtu tur motor remchang a awm nge awm lo an en mek a, eng pawh ni se vawiin khaw en lai chuan lo thlen hman ngaihna a awm tawh lo. Chhimphei Group YMA hruaitute leh Muallungthu Branch YMA te chuan Pu Lalthanzauva ruang hi Aizawl lam atanga Melthum piah deuh Zampui-manga thlanah lo hmuah an tum a, a ruang thlen hun azirin vui hun tur chu an ruahman tur thu Chhimphei Group YMA President Pu K. Kapkunga chuan a sawi. Muallungthu hi Aizawl atangin km 17 a ni. Pu Lalthanzauva hi a pa Pu Vanlalruata chuan kum 2000 khan chatuan ram a lo pansan tawh a, a nu Pi Lalthianghlimi pawhin kum 2008 khan chatuan ram a pansan ve leh bawk a. A unau neih chhun, a farnu Rothangpuii chuan 2012 khan Lawngtlai lamah pasal a nei bawk. Lalthanzauva hi kum 2007 khan Assam Regiment ah a lut a, kum 2008 a a nu-in a boralsan tumin a nu ruang hi a rawn hmu hman lo. Muallungthu nula Thangngaihzuali nen nikum khan inneiin an fa hmasa ber tur an pai mek a, an fa pian hun tura ngaih hi kumin November thla a ni. An nupain Shillong a Assam Regimental Centre ah an awm a, chawlh hmanga lo hawin, an In Assam Type chu a bung thiatin concrete In, a dung feet 60, a vang feet 24 a zauin an rel a, a liang beam an chhun dawn lai mekin Lalthanzauva chu a hna zawm a hun dawn si a, an In sak chu a nupui Thang-ngaihzuali’n a lo chhunzawm turin a kalsan lo thei ta lova, vanduaithlak takin a chuanna Sumo in Truck a sutna lamah mi ramah a zuk boral ta hlauh si a ni. Pu Lalthanzauva hi a Facebook account ah chuan Thanzauva Colney a ni a, a profile ah mi thahnem takin uina leh sunna thu an ziak a ni. Muallungthu Branch YMA hruaitu hlun leh, Chhimphei Group YMA President ni lai Pu K. Kapkunga chuan Lalthanzauva chu a naupan lai pawha naupang fel leh thuawih thei tak a nih thin thu sawiin, kum 25 miin concrete in a rel thei ringawt pawh hian a fel zia leh a puitlin zia a tichiang a, a uiawm tak meuh meuh a ni, a ti. (With Zonet Zing Daifim report)
Posted on: Tue, 12 Aug 2014 08:29:55 +0000
Trending Topics
Recently Viewed Topics
© 2015