SUNDAY TLAILAM THUCHAH. ( A chhiar peihte tan.) I LAM KAN LO HAWI MAI A NI E. Damchhung nunah hian harsatna leh buaina hrang hrangte kan tawkin, kan tum loh leh beiseiloh thil tam tak a lo thlengin kan hmachhawn a tul fo thin. Hlimna leh lawman zawng zawngte hi kan ta tur a nih reng lai hian, harsatna leh lungngaihnate, nâtnate leh thihna thleng pawh hian, kan ta tur anihna hi hriat chiana, pawm thiam a pawimawh hle thin.Hetiang hun a lo thlen hian ringtute kan nihna leh, engkim tithei Pathian kan nei tih hi hriat nawn fo a tul thin hle a ni. Hetianga harsatna leh buainate,nâtna leh thihnate pawh hi midangte chunga a lo thlen chang hi chuan,kan khawngaihin kan lainat êm êm a, thlamuan tumin theih tawp kan chhuah fo thin. Mahse, mihring atanga chhuak hmangaihna leh lainatna hi chuan, thlamuanna leh hlimna tak tak chu kan inpe thei silo. Kan tih theih tawk tawngtai leh thilpekin kan tanpui a, hei hi ringtute kan nih chuan kan tih ngei ngei tur pawh a ni reng a ni. A hluin tangkai pawh a tangkai hle thin. Harsatna leh buaina, manganna leh nâtnate, vanduaina an tawh avanga, Pathian hnaih a tulzia leh, Pathianin kan thatna tura ro a rel dante hi hmu fiah a hrethiam hram hram turin, kan in zilh a, kan in fuih fo thin. Ringtute chuan hei hi kan tih tur reng pawh a ni. Midangte chunga thil thlengah hi chuan a sawia sawi mai hi a awlsamin kan harsat lo tlangpui nite hian a lang fo thin. Mahse, hetiang ang hun,englai maha kan chunga thleng tura kan duh loh leh beisei ngailoh, harsatna, nâtna leh thihnate meuh mai mahni chunga a lo thlen erawh hi chuan, tawrh thiam har kan tiin, kan hrethiam lo leh fo thin si chu anih hi. Nâtna leh harsatnate kan tawh chang hian, englai maha min thlahthlam ve ngailotu Pathian kan nei tih hi theihnghilhin, amah pan hmasa lo hian khawvel thiamna, Doctorte leh damdawiahte,mihringahte hian kan riru a awm hmasa ber fo thin si. Hengte hi kan pan lo tur kan tihna nilo in, kan pan ngei turte chu an ni reng a ni. Kan tana Pathian ruatte an ni si a. Mahse, ringtute chuan a hmasa berin kan manganna leh buainahate hian, mihringa innghat a, beiseina nei hmasa lo in, Pathian hnenah kan thlen hmasak fo thin hi kan tih tur pawimawh tak leh, Pathain pawhin a duhdan anih ngei a rinawm thin. Juda Lal Jehosaphata ang khan kan mangannate hi,Pathian hnenah thlen thin ila, ani chu englai pawhin min pui tur leh min thlamuan turin a in peih reng si a.Hmelma tam takin an rawn bei dawn tih a hriat chuan, Mangang êm êm in Pathian hnenah a tawngtai a. (II Chronicles 20:12 Aw kan Pathian, an chungah ro i rel dawn lawm ni? Mi chu zozai, mi rawn bei tura lo thawkte chu lo thawkte chu lo han ei thei ziazang kan ni si lo va; a tih ngaihna reng reng kan hre bawk hek lo, i lam kan lo hawi mai zawka nie, a ti a.) Amah ringa a tanpuina beiseitu tawngtaina chu Pathian chuan a lo hria a.”Anmahni avang chuan hlau suh ula, zam hek suh u, Indona chu nangmahni indona a ni lo a, Pathian indona a ni zawk e. Awm hle hle ula lo thlir ringawt mai rawh u,” tiin . Chu indona chu an beih ngai loin a hnehsak ta anih kha. Keini ringtute pawh hian hetiang harsatna leh buainate kan tawh chang ni a lo thlen hian,kan tan engkima engkim, kan damna famkim, kan thlamuanna Lal Isua hnenah hian tlukluh hmasak ber nachang I hre thar le hang u. Khawvel famkimloa kan awm chhung hi chuan, hetiang harsatna leh lungngaihnate, Nâtnate hian min kiansan dawn lo a, chutiang bawkin Setana pawh hian min tih chhiata, a duhdana nung tur leh, kan rinna phatsan tura min beih hi a thulh dawn silo. Nun beidawng leh chaua kan rum changte, harsatna leh manganna,nâtnate kan chunga a lo thlen chang hian, a hmasa berin kan damna Lal Isua hi en nachang hria ila, Kan Pathian chuan englai mahin min thlahthlamin min hawisan ve ngai dawn silo a.Amah beisei a, a lam kan hawi phawt chuan, englai pawhin min tanpui tur leh min thalmuan turin a in peih reng zawk si a. Kan nunah hian thilnung pahnih englai maha in ngeih ngaireng reng lo, indo reng an awm a. Chu chu kan thlarau duhna leh Tisa duhna hi a ni. Mithiam zawkte chuan, indona zawnga rapthlak ber ka nun hi an lo ti hial reng a. Kan Thlarau duhna chuan thiltha tih a duh laiin, kan tisa duhna erawh chuan, thil thalo a duh zawk in a chak zawk thin si a. Chu kan Tisa duhna chuan keimahniah hian hnehna chu changing vawi tam tak kan duhloh leh tumloh thilte tiin, beidawnna leh tahna ruamah min hnuklut fo thin. Inchhira mangangin kan rum a, mahnia tlanchhuah leh ngaihna pawh hre tawh loin vawi tam tak kan awm fo thin. Hetiang hunah takte hian a ni, En tur dik tak Lal Isua lam hi en nachang hria ila, nun hahchawlhna leh thlamuanna, damna famkim chu kan chang ngei ngei dawn a lo ni. En tur dik tak Lal Isua en theilo a, min siam tu, kan harsatna leh nâtnate, lungngaihnate hi inbawhbeh tir mai lo in, mahni inkhawngaihna nun hi kalsanin, kan damna Lal Isua chauh hi I thlir thin ang u. Juda Lal Jehosaphata ang hian, harsat leh mangannate a lo thlen chang pawhin, khawvel thiltihtheihna leh, mihring chakna a hneh tum loin, Kan Pathian engkim ti theia hnenah thlen ila, ani chuan kan harsatna leh manganna ata chu min chhanchhuak ngei ngei dawn si a. Kan chunga thil lo thleng hi a tihngaihna reng kan hrelo Lalpa I LAM KAN LO HAWI MAI A NI E. tiin a hnen lam I hawi thin angu. IN PUAN NILO IN, IN THINLUNG THLER ULA, LALPA HAWI RAWH U. TIIN LALPA’N MIN SAWM A NI. Lalpan malsawm rawh se.
Posted on: Sun, 13 Jul 2014 11:52:01 +0000