Selamat pagi ngagai Boss Apai Win Ciera ke nyadi Tuai Rumah ba Ruai Penyukung MU tu. Selamat pagi mega ngagai semua bala kitai ke nyadi kaban ba ruai tu. Sekumbang aku ke udah dibai tama ngagai ruai tu, aku tu siku ari kaban ke selalu mantaika berita pasal MU ditu. Tang taja pan bakanya, ukai reti nya aku bisi agi penemu lebih ari enggi bala kita bukai ba pasal MU. Ukai reti nya pengerindu aku ka MU lebih ari enggi kita. Tang aku ngasai ka diri chukup rindu, chukup sayau ka team ke udah disukung, udah dikerindu aku kenyau ari taun 1976....team ke bisi sejarah, team ke beberita, team ke udah diangkatka Sir Alex Ferguson nyadi serial champions tauka serial winners (selalu menang). David Moyes diambi nganti nganti Sir Alex Ferguson laban ari perati Sir Alex Ferguson, David Moyes ulih nangkup pengawa nyadi menija ba MU, taja iya nadai kala bulih trophy ba Everton. Taja pan dalam runding bala Tukay MU David Moyes ulih nangkup pengawa nyadi menija baru MU, ukai reti sida iya lalu ngasuh David Moyes lalu terus mai MU nyadi champion ba Premier League tekala nya. Tang abis kurang ulih masuk ngagai Champions League, tauka ulih menang ba pekit FA Cup tauka ba Carling Cup. Sekumbang 5 bulan ke udah, kitai meda David Moyes baka ke enda tetangkupka pengawa nyadi menija ba MU. Team ke patut alah, ke patut diinsahka MU nyu nadai penakut ka MU agi. Sida iya ukai semina menang tauka seri ba menalan sida iya empu lebuh belaban enggau MU, tang ba Old Trafford...kubu MU empu ke naka iya diketakutka team bukai dulu suba (semina ke enda pegari kemi bala sekeda pemain bukai lebuh bemain ngelaban MU ba Old Trafford suba, kenu ku cherita), sida iya pan ulih seri tauka menang diatu. MU tetap MU. Nyukung tetap nyukung. Tang enti pemutus main majak nadai belinsur manah, agi meh aku nyukung MU. Tang enti kita nanya aku sekelika aku agi nyukung David Moyes nyadi menija MU, aku deka madah ngagai kita aku nyu pedis isi diatu laban puas asa, puas geram, puas ringat, puas buntau. Semina ngeransi aja bedau. Ba Premier League kira ke nadai agi peluang ngagai top 4. Taja pia, David Moyes agi ulih ngambi ati aku enti iya enggau bala coaches iya ulih mai MU abis kurang masuk ngagai semi final ba pekit Champions League. Enti nya enda ga ulih, ila ga ngasuh sida sebuat nya bekemas.
Posted on: Tue, 11 Feb 2014 02:04:28 +0000
Trending Topics
Recently Viewed Topics
© 2015