TALA MO TE NIU FM 28 IULAI 2013 ma te Polokalame a Tokelau i Auhetalia. Ko te tulaga o te tala o te tau mo Nukunonu,e manaia lahi lele te tau i te taimi nei, ko te tai e malu, e agi malu foki te matagi kae eiei lava na tahi taimi e galo ai te matagi ma vevela ai te la. Tala ona vaega valevale e tutupu i luga o Tokelau. E ola malolo te te nuku mai te matua ke pa lava ki te pepe fatoa fanau mai, kae vagana ai lava te famai tenei ko te fulu e koi fautuagia ai lava na fanau akoga. Ko te vaiaho tona tolu tenei talu te pihi o te nuku ina taliga malo kua tuanaki atu te vaiaho o takaloga, kae maihe ai te vaiaho tenei nae fakafeagai ai te mamalu o na Hui Uhufono ki te Fono Fakamua. Na iei ai ni matua mai te Fatupaepae, fakatahi ai ma te fehoahoaniga a te malohi o te nuku nae tauhi ai na taliga malo ienei vena ma te Fono Fakamua, kae maihe ai te kautafafao nae alo atu kia latou takaloga. Ko te taeao o te aho Gafua 22 Iulai na fai ai te momoli ai he tahi vaega o te malaga mai Fakaofo, na fakataunuku ai foki he takaloga kilikiti ma ki latou e koi luga o fenua, ko te kilikiti tenei na vaevae na kau mai na nuku Atafu, Nukunonu ma Fakaofo, ki ni kau e lua Fakaofo ma Atafu na manumalo ai te kau a Fakaofo, na uma tena fai ai te faka-aganuku na vali uma lele na tama tane na i te kau a Atafu, na iei ai foki ma te latou meakai hupo ulu na hauni e na matua mai te umukuka. Ko te taeao foki lava o te aho Gafua na toe ake ai ia fanau a te USP ki te akoga i te latou semester 2, i he lipoti mai te matua kia Margret Co-odinater o te USP na iei na fanau akoga a te USp na manaia lahi lele a latou taumafaiga i te semester muamua na pahi uma a latou matakupu. Na iei ai foki te ahiahiga a te Director of Education ki te akoga a te USP na faimalaga mai ia ki Nukunonu mo te Fono Fakamua. Na iei ai foki na fonotaga nae fakataunuku i te taeao o te aho Gafua te fonotaga mamalu ate Tulafono. I te fonotaga tena na fakataunuku ai te fakahekega o te pale o te tauhala Tokelau mai te fanau kia Peki Iona ki te fanau tena kia Hela Teao mo te tauhala o te tauhaga nei 2013-2014. Ko te taeao o te aho Lua 23 Iulai na laku fakauma ai te malaga ate Kautafafao a Fakaofo, vena ai foki na fakataunuku ai na fonotaga o te Tupe. Ko te taeao foki o te aho Lua 23 Iulai na fakailoa mai ai ko Tokelau kua he fakatahi atu a latou ki na takaloga a te Pahefika e fakataunuku i Wallaz Futuna, ma ko he tama lipoti mai te matua kia Hei Perez ko te taimi nei ka kikila totoka ai ma hauniuni ia Tokelau ki na takaloga a te Pahefika e fakataunuku i PNG i te tauhaga 2015, kae maihe ai na tapenapenaga lava ki na takaloga likiliki e fakataunuku i luga lava o Tokelau ke fakatahi pea ai ia tama fanau a Tokelau kae maihe ai ke fakaaoga ai na taleni tafao e nofo maki latou. Ko te 12 i te aoauli o te aho Lulu 24 Iulai na tatala aloakia ai te Fono Fakamua a Tokelau i Talikilagi, na tatala tena i te lotu kamata mai te tamana Moheniolo Oliver Aro, hohoko ai kiei te kupu a te taumatua kia Tito Setefano, kupu mai te hui mai Niu Hila oi fakaholo ai ki na kupu mai na hui i na motu takitahi, na tatala aloakia te Fono Fakamua e te afioga a te Ulu o Tokelau Faipule Halehio Lui, na iei ai foki ma te fakatautooga ona Hui uhu fono foou e toka lua mai Fakaofo , ma fakaauau ai loa na matakupu o te fonotaga. Ko te taeao o te aho Tofi ki te aho Tonai nae fakaauau ai na fonotaga a te Fono Fakamua, ko te po o te aho Falaile na fai ai he latou fakatahiga talatalanoa ma fakalogologo ki te muhika, na tapuni aloakia te Fono Fakamua i te po o te aho Tonai. Ko te taeao nei aho Ha 28 Iulai na taunuku mai ai te malaga a te BBMatua mai Apia, na momoli atu ai te kau uhu fono a Fakaofo, e fakamoemoe e toe taunuku mai te BBMatua i te aho taeao oi momoli ai te kau uhu fono a Atafu oi kua toe liliu mai ai i te aho Lua momoli atu te kau uhu fono mai Apia. Litia Maiava mo na tala fou
Posted on: Sun, 28 Jul 2013 05:51:24 +0000
Trending Topics
Recently Viewed Topics
© 2015