THE BIBLE CODE ************* The Bible Code chungchang hi a thawi tal chuan hrelo kan awm awm lo ve. An sawi danah chuan Bible hi Hebrai tawng a ziak a ni a, chu Hebrai tawng a ziak chu a hawrawp hrang hrang a inkar hlat zawng hrang hrang a a chho zawng te, a khamphei zawng te, a awn te a chhuk zawng te a crossword puzzle ang deuh a an han lak chhuah chuan Hebrai tawng a ziak Bible chhungah hian thuruk tam tak a lo inphum tih an hmuchhuak tlat mai le. Lehkhabu dang reng rengah hetiang hian a chhuak ve thei si lo. AN HMUHCHHUAH DAN: Kum 70 chuang kal taah khan Prague a Juda Rabbi leh Scientist, astronomy leh mathematics ah te mithiam tak Rabbi Michael Dov Weissmamdl-a chuan research vel a beihna ah kum zabi 14 na lai a Juda Rabbi pakhat Rabbeynu Bachayah-a lehkhabu ziak hlui tawh tak mai chu a hai chhuak nawlh mai. Chu lehkhabu ah chuan Juda te dan bu TORAH a thuruk inphum a awm thu a lo inziak tlat mai. Chumi zul zui chuan Weissmandl chuan enchhinna a nei ta a, chuta a enchhinna ah chuan TORAH kher lo ah pawh hian thu inthup a awm ang a tih ngaihdan a nei ta a. Genesis hi Mosia ziak an ti si a, Mosia hming a lang bawk si lo va ti in Genesis, Hebrai tawng a ziakah chuan Hebrai hawrawp a M atangin an zawng tan thawr mai a. Ochu hawrawp 15 na ah a lo awm leh a, a dawt hawrawp 15 na an en leh chuan S a lo awm leh ta tlat mai. Chutiang chuan hawrawp 15 na danah chuan MOSIA(Moses) tih chu a lo awm reng mai a ni. The Bible Code chu a lo piang dawn ta le: Weissmandl chuan hetianga hawrawp inkar hlat dan atanga thu inphum chhut hi Equidistant Letter Sequences-ELS tih a vuah a. Eng ang takin nge a la pawimawh dawn a hre phak bik reng reng lo. A zirtir te zinga mi thenkhat in chu thil chu an lo chhinchhiah khiau a, Israel mithiam dang te beng a lo thleng chho zel a, Hebrew University, Jerusalem chuan hemi chungchang ah hian research beih a pawmpui ta rup mai le. Chutianga hawrawp inphum chhut chhuah zung zung na tur computer software an duang chhuak ta. Khawvel a Scientist ropui Isaac Newton pawh khan Bible phenah hian thuruk inthup a awm a lo ring daih tawh a. A damchhung hun chanve zet kha chhui nan a hmang a, mahse vanduaithlak takin chhuichhuak lovin a thi ta hlauh a ni. Bible Code an chhut dan te, Hebrai tawnga Bible in ziah dan te hi chu sawi kual thui lo mai ila. Eng thu te nge an hmuhchhua a, enge lo inphum tih thenkhat te hi lo tarlang chho dawn ila: The Bible Code chungchang ziaktu ten an sawi dan chuan Genesis ah hian hawrawp 50 na zel lak in TORAH tih alo awm a, Deuteronomy leh Numbers ah a let zawnga lak a hawrawp 50 na zel ah TORAH tih hi a lo awm bawk. Mak deuh mai chu he dan bu TORAH hi Israel fa ten Aigupta an chhuahsan atanga ni 50 na ah Sinai tlangah Pathian ina a pek a ni tlat mai. An sawi zel danah chuan Eden huanah hian eng thei te nge awm tih hi zawhna pakhat a ni. Genesis 2:16 -17 inkar thu ringawt ah hian ELS hmanga an han chhut chuan Israel ram a thei awm zawng zawng hming a chikim vek a, tin, chung bakah chuan barley, wheat, vine, date, olive, fig leh pomegranate te pawh a tel bawk a ni. Kan hriattur pawimawh deuh te chu heta an chhut ho reng reng hi Hebrai tawng a ziak Bible atang vek in a ni tih hriat a tha bawk. Heng bakah hian Bible Code chhuitu ten an chhui zelna a an hmuhchhuah ni a an sawi zingah chuan Egypt President, Anwar Sadat hming pawh kha Moslem Brotherhood tih te, tualthat tih te, silai kah tih te leh sipai prade tih te nen hmunkhatah inhnaih tak tak in alo awmkhawm ni in an sawi a. Anwar Sadat hi Kum 1981 khan sipai lam a endik lai chu Moslem Brotherhood hovin silai in an kap hlum anih kha. Heng hi Bible ah code hmang in alo awm tlat mai ni in an sawi tlat. Tin, Adolph Hitler-a chungchang te, Nazi ho death camp te, tin, Auschwitz leh Belsen concentration camp, Juda nuaih tel in an nunna an chan na hmun hming te, Berlin tih te, tin, Juda ho suat hnem tu ber mai Adolph Eichmann-a hming te Nazi Holocaust tih te hi Deuteronomy buah hian a lo inphum tel ve vek mai ni in an sawi bawk. Kan han sawi tak bakah hian French Revolution chungchang te pawh Genesis ah a lo inphum ni in an sawi a; tin, White House a Israel leh Palestina in phur lo tawka remna an siam rintlak loh tak mai chungchang Arafat in Rabina kut thingin chibai a buk a mahse remna tluantling a tling lo tih te pawh Genesis chhung ah hian a lo awm vek bakah GULF WAR chungchang te pawh kha Genesis ah hian a lo in phum ru vek mai a ni an ti. Saddam tih hming inphum bul lawkah chuan SCUD-B tih te, Russian tih te, tin, America tih te, Schwarzkopf tih te, George Bush tih te, CNN tih te, Peter Arnet tih te thleng in a lo awm vek in an sawi bawk. Tin, shevat thumna tih inziak a awm a, chu chu Hebrai calendar a Missile hmanga Israel an bomb tan ni 18.1.1991 chiah kha a ni tlat. Kan hriat theuh angin GULF WAR ah khan Russia siam SCUD missile chu an hmang nasa em em a, America chu inrawlh in George Bush pawh a thu a rum hle a, General Schwarzkopf a comand na hnuai ah Saddam a an bei a, CNN in live in a lo cover char char a, Peter Arnet-an Bagdad atangin report a rawn pe char char anih kha. Kha indona kha kum 3400 chuang kal tawh a ziah kan Bible a Genesis ah hian kimchang takin a rukin a lo inphum thlip thlep tawh ni in Bible Code zirtu te chuan an sawi. Heng hi a tak tak a nih chuan kan Bible hi a lo ropui zia tarlangtu tha tak a ni ngei ang le. THE BIBLE CODE ring a ngaisangtu te chuan, “The Bible Code ropui zia hi a mawl zawngin sawi ta ila: Lehkhabu dang reng rengah hetiang anga thuruk inphum hi a awm ve lo va, tin, vanneih thilthu a lo inphum palh ni thei tur hian chance maktaduai hlir, maktaduai 17 ah chance khat te chu a awm ve maithei tih chauh in chhut a ni. Hei hian enge a entir? Ele kan Pathianthu ropui zia mawle,” tiin an lo sawi fo thin a ni. Chutihlai chuan The Bible Code hi ngaisang lemlo leh ringlotu pawh an tam mai a. Hengho ve thung hi chuan The Bible Code hi chuti taka ropui leh thuruk inphum a nih si chuan engatinge he code hmang hian thil kal tawh inphum ru chauh an hmuhchhuah a, thi lo la thlenglo an hmuhchhuah ve hauh si loh tih hi an zawhna lian ber a ni a. He zawhna hi zawhna chhan har tak mai a ni ngei ang le. A engpawh nise keini a mik-a-mak pawh hre ve lo tan zawng thil ropui leh mak danglam tak chu a ni tho mai.... *Source: The Bible Code- P.C. Biaksiama/Sangzuala Pa/The Unexplained/Wikipedia, DUHAISAM **Image: Google Image- Hebrai Bible atanga ELS hmanga Bible Code an chhut dan.
Posted on: Fri, 29 Aug 2014 10:30:27 +0000
Trending Topics
Recently Viewed Topics
© 2015