## THLATUN 27 A Photographer’s Diary-I MIT THARIN : WITH NEW EYES ~ Lawrence S Khawzawl Mihriem a tam lem hin ei damsung na na na hin chu mit thar nei kher naw manih. Mit thar nei ding hai chu mitdel amanih, annaw leh mit thanaw, mit thar inbuk hai chauh hi ning an tih. Chuleichun, hitaka mit thar ei ti hi mit thar tak tak nilovin, mani piengpui mit chu la nei zing siin ei mitin a thil hmu dan, a thil thlir dan thlak danglam a, ei ngaituona siemthar bakah, en dan thara ei mit hem danglam kawk lem a tih. Hienga nitin ka hun tam lem Guwahati khawpui sung hmun hran hrana thla la kuol dinga kan vak suok phing hin, keikhawm ka thil hmu dan le ka lo thlir dan hlak tamtak a min thlak danglam tira, ni danga ka thil lo hmu hlak hai ienga khawm ka lo i ngainaw hai khah, mit thara ka hei thlir zet chun a lo pawimaw zie dam, a lo mawizie dam, a lo hlut um zie dam ka hung mansuok pha ta a. Thil po po hi san neia um an lo nizie le, tangkaina an lo nei dan dam, hlutna an lo nei zie le a hun le a hmun izir peia hmang an lo nizie dam chu ka hung hriet sap pei tah lem a. Ni danga ienga khawm ka lo ngai naw, an um le umnaw khawm ka lo hriet phak ngai lo, ka mamaw ding khawma ka lo ring ngai lo dam kha ka hung mamaw tah a. Hmunhnawk an pei khawma an sie bum mei mei dam, annawleh lampui sira vai thil zawr hai ienga khawm ka lo ngai naw hai le thil dang dang hai kha ka hung mamaw chang dam a lo um tah a. Hieng thil haia inthawk hin, nasatakin ka lungrilah mit thara thil thlir a tulzie hai ka hung hriet suok tah a. Vawisuna ienga khawm ei lo ngai naw hai dam hi nakie hunah ei la hung pawimaw thei zie dam, annawleh thil ei lo ngaisak bek naw hai dam hi nakie leh hriet a tul hun a la hung tlung ding zie dam chu a min hriet suok thar tir ta a nih. Thla latu ta ding chun, iengkim hin mawina le hlutna an lo nei vawng a, mawina nei naw hai khawma tangkaina an lo nei a, tangkaina nei naw hai khawma inentir tha tak an lo nei nawk pei a, chuleichun iengkim hi a lo pawimaw vawng ta hlak a nih. Chuong ang bawk chun, mi pangai ta ding khawmin nitin hin zingkar ei thova inthawk hin mit tharin ei meng chun iengkim hi a lo mawiin iengkim hi an lo hlu em em hlak. I in sira i parte khawi i duot em em vuoi ta chuk el chun i lung a sukna el thei, amiruokchu mit tharin i menga i ngaituona i sukseia i hei thlir nawk chun, chu parte vuoi chuk el khawm chun hlimna annawleh nanga khan in entir an nei tir thei che a, lungsen el lovin i ta dingin malsawmna intluntu a lo ni thei. A changin ei chunga hin harsatna dam annawleh ei ring phak lo vangduoina dam a hung tlung hlak. A hun lai tak chun, hrietthiem intakin tuor thiem dan khawm ei thiem ngai nawh. Amiruokchu mit thara ei hei thlir kir chun, khang hun hai kha ei ta dinga thiltha lem a lo nizie dam, annawleh ei insiemthatna dinga thil tlung a lo nizie dam hre thar thei ei tih. Ei Guwahati khawtlanga ngei khawm ei Hnam bikah thil ei tuok a, kohran mi thenkhat an peng hmang a, thenkhatin ei la chel zing bawk a, mi tamtak chun hriet thiem harsa ei tiha, ei na em ema, pawi ei tih a. Amiruokchu, mit thara ei zuk thlir a, ei en let chun a sietna lai um sien khawm, iemani tawk a thatna chin khawm a lo um pal thei a, ei ta dinga thiltha lem a ni beiseina khawm a mi siem pek thei bawk. Mit tharah ei meng pha chun thil thlir dan thiem ei ta, thil a thatna le a sietna dam, a tangkaina dam, a hlutna dam hung hre sa pei ei ta, nuoma phunchier el lovin, ei nitina thil ei tuok hai khawm a dawngsawng dam thiem ei ta, a buoipui dan thiem bawk ei ta, a tawp taka chun, thil po pova hin Pathien iengkim siemtu ropuizie hmu pei ei tih.
Posted on: Mon, 28 Apr 2014 10:30:01 +0000
Trending Topics
Recently Viewed Topics
© 2015