Ta un echo ku tur relashon entre sernan humano, sea kua sea esaki ta, ta basa riba algun persepto ku ta determiná kon fuerte òf lalilali e relashon aki ta. Perseptonan ku si unu ta konsiente di nan eksistensha, lo sòru sigur pa un relashon fuerte i benefisioso pa tur dos. Un di e perseptonan aki ta nunka presumí kon un otro hende mester ta pa e nifiká algu p’abo. Tur hende ta un universo riba su mes, krea pa Dios den su semehansa, pero ku kualidatnan ku ta hasié úniko. Niun hende den bo bida lo aktua eksaktamente manera bo ke òf ta spera. Nan no ta abo! Nan no ta stima meskos ku bo, duna meskos ku bo, komprondé òf respondé riba kosnan di bida manera abo. Hamas. Otro persepto ta, no buska loke bo ta mis den bo bida den bida di otro. Abo i abo so ta responsabel pa realisashon di bo bida. Niun hende por hasié p’abo. Un persepto importante ta komunikashon. Komunikashon pober òf muchu tiki ta un di e kousanan prinsipal di tenshon den kualke relashon. Honestidat i frankesa ta e fundeshi di bon komunikashon. I bon komunikashon na su turno ta fundeshi di un relashon sólido. Gañamentu, pa chikí ku esaki ta, a lo largu ta loke ta pone kualke relashon noufragá. Pa chikí ku e mentira ta, sa ku ora nan akumulá, e lo por nifiká fin di kualke relashon. Otro persepto importante ta presensia. Hopi relashon ta para kaba na nada djis pasobra un di esnan den e relashon hopi biaha simplemente no ta presente. Su mente ta leu, riba otro kos òf otro hende. Sa ku presensia den un relashon ta igual na ta konsiente di e relashon. Ta imposibel komuniká i kompartí ku un hende den un relashon ku no ta presente. Sa sinembargo ku no ta tur relashon ta destiná pa dura pa semper òf pa largu tempu. Tin relashon ku ta kuminsá i kaba òf ta bira unu di bida largu. Realisá si ku tur relashon tin un motibu krea pa Dios pa nos siña di dje i kompartí Su amor ku nos próhimo. (Loke ami a siña di bida)
Posted on: Sat, 10 Aug 2013 00:51:40 +0000
Trending Topics
Recently Viewed Topics
© 2015