..... Tanfust zi Tidet x Paspurt Ameghrabi s Tifinagh: ... 19 n isegwasen z g wami d wezyen, di 1994, tugha yi zedghegh ag Unazur nnegh arifi ameqran umi qqaren Walid Mimun d g ict n taddart di tendint n Utrecht, nec t3effaregh attas s wussan yiziden i kides ddaregh ag tawmat Mimun, rhad azirar war iqettin x wussan nni, netta 3ad ad yas. Ict n tmeddit, am tmedditin ye3dun, awar nnegh yuyur x tmukrist n tmaggit nnegh, ssenni newwed ghar mamec gguren u xedmen rbirawat ( l2idarat ) n lmeghrib, uca xarsegh d g yij n uzeggil ( falta ) tugha ggin ayi t di paspurt inu, nnigh as i Mimun raja ad ac t mregh, ekkaregh rahegh ewyegh as t id, yezra t, tugha yedduqqez s tdehhact, eggin ayi dini axmi ghari 18 n reqrun di tudart inu !, atarras ad yesfirnen waxxa yemmut, uca neqqim neddehhac s tfeqqah x lmarka n rmexzen i yessegguren tammurt nnegh. S deffar umi nsala aqessar nnegh, tameddit dja war d as yeqqim ca ad teffegh, nuherr, nexs ad nezyinfan, negga timensiwin x wayawya, kkur yejjen yudef ghar wexxam nnes ad yessars ixsan nnes. Ag wadaf ghar wexxam, yenna yi wadji ynu arzem paspurt nni xzar d ayes, ( tameddit nni nec d Mimun tugha nessiwrr attas x ( Lofficialisation ) n tmazight di tmurt nnegh ), arezmegh paspurt nni, xzaaregh dayes s yij n weshissef yemghaar attas, uca ysighd ij n wemru z g yinni yetmaren / yegdaren, n ( fulter ) d abarcan mseqqem, uca ssentaregh ccategh tweddaregh marra min din yuran s ta3raft tarigh t sennej nnes s tifinagh, bedregh d ayes kurci, isem d mazigh, amcan, tekniyya, saligh tira nni, 3edregh d ayes rxezrat, uca ucigh ag ict n arrahet temghar turid a kidi, sfirnegh s wurr inu, nnigh as d g wadji ynu: am ya i gha tiri nigh yif 3ad xmi gha tiri tmazight inu officielle !, qbaregh paspurt nni, xemregh t, tsegh. Rahen wussan usind yinnedni, tewwed 1995, di wayur n May, atarras izeyyared xafs rmexzen ahulandi huma ad as yescen / yemmerr paspurt d recwaghed nnedni, i ( controle ), nec tugha snegh ila paspurt nni yemmut, ye3du xafs rhar s ca n 2 n isegwasen z g wami, u snegh ila war t qebren amenni, man aya yexs ad yini ila ixess ayi ad rahegh ad dayes d arnigh zi ( Consulat ) n lmeghrib yedjan di Amsterdam. Waxxa war xsegh, waxxa nec rehrac inu d mara rahegh ghar rbirawat n lmeghrib, maca rexxu s ughirr xafi ad din rahegh. Arzugh x recwaghed d paspurt nni, war t arzimegh war d ayes xzaregh, rahegh ghar sen, ag tufut, waxxa nec tugha yi d g wussan nni war nnumegh tnekkaregh zic, umi din xeccegh, tugha t d 08:30, ufigh din a3urric n yewdan trajan ghar tewwart, nitni 3ad war arzimen, neqqim netraja, iwdan ssentaren t3anen tarran tifeqqeht n uraji x wayawya, amenni, atarras ghar zzat ag yinni imezwura ghar tewwart, sbaregh s wurr di tmijja, te3du cwayt 09:00 uca arezmen, yemmarni u3ani d werbaz di tewwart. Ghar tewwart i yeqqim yejjen x yect n ttabra, itettef paspurat, yarezzem iten ixezzar d aysen, nec ewdegh ghars, ewcigh as paspurt nni, netta yerzem it yexzar d ayes, yessentar yesghuyyu, s jjehd, atarras endwen asd wattawen, iteffegh asd ukuffu z g wqemmum, yedwerr d aziza waxxa netta d ademdam !, uca yeqqar ayi s ddarija nni: ( aac had cci a ssi flan ? ), aaac had txerbic ?, nec tugha yi ttuugh min ggigh di paspurt nni, war fhimegh min xef xafi din yesghuyyu, nnigh as min cek yughin ? yenna yi ( cuf nta cnu derti fih ), yemmer ayi t id xzaregh d ayes uca xarsegh di tmeddit nni umi d ayes ggigh amenni di paspurt nni, yusa yid wesfirnen maca sbeddegh t, uca nnigh as: hadik hiyya lkitaba l2amazighiyya malek ? ma kate3refhac ? smiyt ha tifinagh !, s uxeyyeq s usehbeq d u3effar, nec war t tarrigh gha deffar, 3baregh x kurci !, netta yarni di y arjef irah ad as yesseghd wurr, uca yenna yi s tghuyyit: yallah mseh, mhi, arah isiftuh lelmeghrib icufuh, had cci memnu3 !, nec nnigh as waxxa awid, yewca yi t id qqimegh sefdegh tifinagh nni s ikuffan, iwdan t3anen ayid s deffar, zziyyar, d aduqqezz, maca walu, smegh t n wemru nni i zi urigh d ayes rgaz uca yeqseh ad yemmekkes, ( 3ad ruxa assa aqa t amenni ). Iwa cwayt cwayt, uhregh sefdegh maca walu, tifinagh nni qqiment resqent x mika nni n paspurt, emmeksent cwayt maca yeqqim attas. Arrigh as t, yexs ad ayi yec s rxezrat d utemtem s ddarija nnes, yettef it xafi, twarigh t yessars it ghar ughezdis wehdes, iwdan t3anen ayawya sghuyyun, udfegh, gha daxerr yeccur rhar yesghufa, timgharin, ihamucen, iryazen, marra d irifeyyen, atarras irah ibed d g yict n teghmart ixezzar di rmunkar d wendedji i din itemsaran i d aynegh teggen ighabiyyen, txarrasegh 3awed di min gha yeg wemcum nni s paspurt nni ? mayemmi t yessars wehdes ghar ughezdis ? mayemmi war t yesmun ag yinnedni ? attas n iseqsan, uca fehmegh ila yexs ad t yescen i ( Rqunsu ), maca nec war d ayi cqin marra yedsen. Axxam d iseqfan nni truhen tcuren, zzeyyar nican, maghar, di wakud nni tugha tasend zi tneddam nnedni ghar wamsterdam, war dji am rexxu rmexzen n lmeghrib yegga ( Consulat ) mani ma. Ass ye3du azyen nnes, tghuyyit d u3ani d ayenni i wden, ij n ugharbi d g wseqqif it3an d aysen, yeqqar asen: kehzu llurr a 3ibad llah, malkum ma katfehmuc ? nec xezzareghd zi teghmart nni mani xafi d yewda ij n uwessar d arifi puvri, maca tfegh t, war yewwid tammurt, urr inu ye3dud tmijja s ughufi d uxeyyeq s min din itemsaran, dewregh ssitimegh ad dewregh nec s yexf inu d Qenbula ad dduqzegh ad kidi sduqzegh marra min din d rghaci d rehyud. Nec ndaregh tittawin inu ghar yij n druj itrah ghar sennej / darre3 mani itiri rqunsu, twarigh wenni xafi yetfen paspurt ghar tewwart yehwad x druj nni ag yejjen nnedni ghares ij n paspurt d g wfus, ewdend ghar wezyen n druj bedden, ssenni zarrend marra min din d g wexxam nni ideknen s yewdan, qqimen xezzarend ghar wadday, iban xaf sen ila arezzun x hed, nec nnigh as arezzun xafi, uca fehmegh ila wenni d rqunsu nni waxxa war t ssinegh d g wudem nnes, bedden ssawaren xezzarend d aynegh, cwayt uca 3eqben ge3den. Akud i3edda s ughirr, tittawin d wadji uhren, uhren zi tmezra n ddeg nni n tewlaft, cwayt cwayt, cwayt cwayt, arr ami 3rahar d 16:00 i tesrigh raghand xafi, udfegh ghar wexxam nni mani ticcen paspurat, ufigh din 3 yedsen, 2 rhan ag hed nnedni, yecten traja yi nec, ewdegh ghars, twarigh tarxud i teynart paspurt inu d g wfus nnes, tenna yi s ddarija nni: assi ... had lpaspurt ma xassuc yebqa hakka, xessek temhi mezyan had cci lli ktebtih 3lih, arah had cci tezwir, u ttezwir ka y3aqeb 3lih lqanun. Atarras yarra xaf s ddarija nni zi tmijja tsawent yennas: waxxa ma ci muckil, sqagh, tenna yi iwa 3endek. Teggas tembre / sseyyu nni, sinyigh t, xedjsegh t, eggigh ameqqarsu nni di jjib, uca nnigh as: nqul lik a l2uxt wahed lhaja, diri ha f balek mezyaan, tenna yi min din ? nnigh as s ij n u3effar yemghar attas: waxxa mhit mezyaan had tifinagh, lakin kuni 3la yaqin anna ha lyum wella ghedda tkun L2amazighiyya rasmiyya ! qbel l3erbiyya, ma ci ljanibha !. Uca jjigh t din s wancucen tarjijjin, yennugh d ayes wawar war tufi min zi xafi d gha tarr, efgheghd ssenni s tmarri war xzaregh ammu ura y am ya, usighd ad arewhegh di Macina, x webrid wettant id xafi tewlafin nni din zrigh di lqunsuliyya nni, arenyent ayi d g wemnus i ysigh i weydud inu idewren am tcamma jar idaren n miden !. Xeccegh ghar taddart harrigh s rwehran, qqimegh, ekseghd paspurt nni zi jjib xzaregh 3wed di tfinagh nni yeqqimen x mika, xarsegh di Mimun, ssitmegh s wurr inu mri tugha t 3ad a kidi ad as 3awdegh tanfust n was nni, maca shisfegh waha umi netta dja ca n 7 n iyuren z g wami yarewweh ghar tmurt. Xemregh paspurt nni, amenni s tfinagh nni, umi yemmut 3awed, rahegh nnigh asen qa yweddar ayi, ewcin ayi yejjen nnedni d amaynu, wenni s tifinagh yeqqim ghari i rebda u 3ad rexxu aqa t ghari, ad yeqqim d ict n tenfust zi tenfas n tirja n tarwa n tmazight i yurjan d g webrid n sen iqeshen ghar trelli !. Badis
Posted on: Mon, 02 Dec 2013 20:46:11 +0000
Trending Topics
Recently Viewed Topics
© 2015