Thla li zet Governor nei lo a Mizoram a awm hnu in Mizoram Governor atana a ruat thar Uttarakhand Governor Dr Aziz Qureshi chuan a hna thar a pawm dawn (Dr.Aziz-a hi Kum 74 mi Tlangval a ni) Sorkar laipuiin Mizoram Governor atana a ruat thar Uttarakhand governor Dr Aziz Qureshi chuan a hna thar a pawm dawn tih Aizawl-a Raj Bhavan a hriattir a.Raj Bhavan atanga thudawn danin Pu Qureshi hi Secretary to Mizoram Governor chuan zuk biaiin, ani chuan Mizoram Governor atana ruatna chu a pawm dawn thu leh hapta hnih vel chawlh lak phawta chumi hnu-a zawm a tum thu a sawi a ni. Hetihlai hian, Meghalaya Governor, Mizoram hmuitu Pu Krishna Kant Paul-a chu sawn chhuakin a term la hma bak zawng Uttarakhand Governor hna chelh tur a ruat a ni a. Pu Kant-a hian ama hna pangngai bakah Manipur Governor hna a chelh kawp bawk ang. President Pranab Mukherjee chuan W.Bengal Governor Keshari Nath Tripathi chu ama hna pangngai bakah Meghalaya Governor hna lo chelh kawp rih turin a ti bawk. Mizoram Governor tur, Uttarakhand Governor ni mek Pu Qureshi hi kum 1940 April ni 24 khan Madhya Pradesh khawpui Bhopal ah a lo piang a, amah hi Muslim sakhaw betu niin Political Science, Arabic leh Urdu literature- ah te Master degree a nei a, LLB a nih bakah Political Science-ah doctorate degree a nei. A hnathawh thin chu ukil ani a, kum 74 mi a ni chungin tlangval a la ni. Kum 1951 khan Seva Dal zawmin Congress hruaitu hlun tak a ni a, Madhya Pradesh-ah Minister ni tawhin Lok Sabha MP a ni tawh bawk a. Kum 2012 May ni 15 a\ang khan Uttarakhand Governor hna a thawk tan a, kumin June ni 22 leh July ni 22 khan Uttar Pradesh Governor hna a hmui zawk bawk. Kum 2011 August ni 26-a Mizoram Governor atana ruat Pu Vakkom B Purushothaman chu July ni 6 khan Nagaland-ah sawn a ni a; mahse Nagaland Raj Bhavan luah duh lovin July ni 11 khan a banna a thehlut a. Gujarat Governor Dr Kamla Beniwal-i chu Mizoram-ah sawn a ni leh a, ani hi July ni 9 khan thutiam tira Mizoram larsap-a lakluh a ni a, mahse thla khat a awm hman chiah tihin sorkar laipui chuan a rawn ban leh a; a aiawh turin Manipur Governor Pu Vinod Kumar Duggal chu ruatin Manipur larsap ni chunga Mizoram hmui tura tih a ni a. Mizorama hun engemaw chen lo awm tawh Pu Duggal hi August ni 9 khan Mizoram governor ni turin lakluh a ni a, mahse a aiawh tur hian Maharashtra governor Pu Kateekal Sankaranarayan chu Mizoram Governor atan August ni 23 zanlai pelhah khan an rawn ruat leh ta a ni. Pu Sankaranarayan hian Mizorama sawn chu duh lovin August ni 24-ah a banna a thehlut a. Pu Duggal chua n Manipur Governor ni chungin Mizoram a hmui zui a. Mahse ban na a thehluh ve leh tak avangin Meghalaya Governor Dr Krishan Kant Paul chu September ni 16 khan Mizoram hmui tur in lakluh leh a ni a. Thla li zet mahni puala governor nei lova a awm hnu-in Mizoram chuan ama pualin Governor a nei ve leh dawn ta a ni.
Posted on: Fri, 02 Jan 2015 19:35:46 +0000
Trending Topics
Recently Viewed Topics
© 2015