Tum khat chu nu pakhat, mi rel hrat tak mai hian an thenawm tlangval chanchin hi mite hnenah a sawi fo mai a. Damdawi zuar thin angtein a lo sawi a, chu chu a darh zauh zel a, thuneitute beng a thleng ta hial a. Police lam chuan chu tlangval chu an rawn man ta mai a. Mahse, vanneihthlak takin chu tlangval chuan tihsual engmah a lo neih loh avangin an chhuah leh nghal mai a. Chhuah leh nghal mai mahse, a mualpho tak erh avangin chu tlangval chuan chu nu lakah chuan Defamation case a file ta a. Court hmaah chuan chu nu chuan, Tawngkam mai a ni a, tumah ka tina (harm physically) hlei nem! tiin a tang ve ta tlat mai a. Magistrate chuan, Engpawhnise, he tlangval chanchin i sawi zawng zawng kha paper-ah ziak chhuak vek rawh a ti a. Chu nu chuan chu tlangval chanchin a sawi dan zawng zawng chu paper-ah a ziak ta ngat ngat a. A ziah zawh hnu chuan Magistrate chuan, Tikhan, i thil ziah kha pawt thler vek la, i haw kawngah kalkawng tluanin i paih darh dawn nia. Tichuan, naktukah rawn kal leh la, amaherawhchu, i thil paih chu i rawn chhar khawm leh vek tur a ni ang a ti a. A tukah chuan kutruakin chu nu chu a rawn kal a, Rawn chhar khawm leh vek tur chein thu ka pe che a ni lawm ni ? Enga ti nge kutruaka i rawn kal mai ni? tiin Magistrate chuan a lo zawt a. Chu nu chuan, Thliin a len darh vek tawh, a them thenkhat phei chu hmun hla tak tak a thleng tawh ang, chhar khawm leh ngaihna a awm tawh lo lawm a ti a. Magistrate chuan, A ni dawn reng asin, khatiang chiah khan, mi chanchin i sawi kha, thli len darh ang maiin a darh chakin hmun hla tak tak a thleng thei a, siam that leh thei rual lohin a awm thin asin! Mi zahawmna i tihchhiat kha neih lêt leh theih tawh ngai loh turin thliin lehkha them a lên bo ang mai khan i tawngkam khan an zahawmna khan a lên bo daih thei asin! Tun chinah chuan, mi chanchin a tha lam sawi tur i hre lo a nih chuan, engmah sawi tawh suh ang che, i ngawi hmak tawh dawn a nia! a ti a. Tunlaiah Facebook leh whatsapp-ah te mi chanchin leh thlalak tihdarh chiam kan ching em em a, thil hre hmasa leh post hmasatu nihte kan chak et et hlawm a, thinrim hrikthlak nan leh phuba lak nan Social networking te kan hmang ta fo mai bawk a. Mahse, hei hi i hre reng ang u. Kan activity pakhat lek hian siam that leh theih rual loh midang mualphona zakhua kan thlen thei a ni tih hi. Mi thlalak duk dak lo tak leh, an che fuh lo lai te kan lo tidarh chiam mai thin. Whatsapp-ah te hian chhût theih phak bak bakin thu leh thlalakte hi a darh zauin a darh chak thin si a. Group thenkhat, a bikin Special Report,-ah te miten thil an rawn post a, thu dik leh a bul thum engmah hre si lo hian tawngkam na tak takin kan lo comment ve bawrh bawrh thin. Ngaihtuah thui lo taka kan tawngkam chhuak pahnih khat lek hian tute emaw chungah damchhung harsatna a thlen thei tih hi. Midang chunga harsatna kan thlen mai bakah kan chungah ngei harsatna kan inthlen thei a, kan tawngkam chhuak ngei chu thiamloh min chantirtuah leh thuhretuah a la tang thei a ni. Hrechiang mang hlei lova mi chanchin lo sawi ve chiam chiamte hi chin loh tawp tur a ni. Chuvangin, kan thusawite kan duh tui lova, kan tawngkam chhuakte kan uluk lo viau a nih chuan, kan tawngkam chhuak ngeiin nakinah thiam loh min la chantir ang a, kan tawngkam ngeiin kan duh lohna hmunah min la hruai lut ngei bawk ang.
Posted on: Thu, 18 Sep 2014 17:10:43 +0000
Recently Viewed Topics
© 2015