WILLEMSTAD Krus di Mérito Kòrsou ta un kondekorashon instituí pa Gobièrnu di Kòrsou, pa duna rekonosementu na personanan ku a desplegá aktividatnan meritorio, den un forma partikular, pa komunidat di Kòrsou. Krus di Mérito Kòrsou, ta e manera ku Kòrsou ta rekonosé dignamente su baluartenan, durante di nan bida. Ministerio di Enseñansa, Siensia, Kultura i Deporte ta informá ku awe ofisialmente e 5 nominadonan ta di bishita serka minister Bitorina. Meta di e bishita aki ta pa ofisialmente minister Bitorina haña aprobashon serka e nominadonan ku nan ta aseptá e Krus di Mérito pa aña 2013. E nominadonan di e aña aki ta: - Sra. Joyce Da Costa Gomez a destaká riba tereno di: Koperativismo i emansipashon di hende muhé; - Sra. Jeannette Maria Angela Juliet-Pablo a destaká riba tereno sosial/kultural. E ta kofundadó i presidente di unidat di bario for di aña 1994; - Sr. Aubrey Errington Linzey a destaká riba tereno di deporte formando diferente hóben; - Sr. Liledone Hayes Macaulay Nicholls a destaká riba tereno di enseñansa i trabou sosial, a sali na interes di esnan ku mas nesesidat; - Sr. Serapio Augustin Pinedo a destaká riba tereno di músika: a dediká su tempu na músika i traha kaha di òrgel; Dia 2 di yüli próksimo e nominadonan ta risibí nan medaya di Krus di Mérito durante di e seremonia di bandera. Gobièrnu di Kòrsou ta yama danki na e personanan aki pa nan trabou balioso desplegá durante añanan.
Posted on: Tue, 25 Jun 2013 02:01:12 +0000
Trending Topics
Recently Viewed Topics
© 2015