Wa namatay sa bagyo, mamatay sa gutom ANG kahinay sa pagresponde sa kagamahanan sa pagtubag sa panginahanglan sa mga biktima sa bagyong Yolanda, wala maka-eskapo sa mga mata sa mga langyaw nga anaa sa Pilipinas nga gusto untang motabang. Labi pa sa mga mata sa international media nga ni-cover ning maong katalagman. Ang Cable News Network (CNN) anchor nga si Anderson Cooper mihulagway base sa iyang na-obserbahan nga walay sistema ang relief assistance gikan sa kagamhanan ngadto sa mga biktima. Matod pa sa maong foreign broadcast journalist “there is no real evidence of organized recovery or relief.” Kini human ma-obserbahi sa maong CNN anchor nga hangtod karon mag-usa na ka semana ang nakalabay, wala pa gihapon makuha ug malubong ang pipila ka mga patay nga nagpasad lang sa kabaybayonan ug ingon man wala pa gyud mahatod ang mga hinabang ngadto sa mga biktima. Puwerting daghana na sa mga hinabang gikan sa nagkalain-laing kanasuran apan ang uban wala pa makadawat. Sus, dako man kaayo kining tamparus ngadto sa atong nasudnong kagamhanan labi pa ni Presidente Noynoy Aquino III. WAY SISTEMA Bisan man gani si Defense Secretary Voltaire Gazmin mi-angkon nga kuwang sa sistema. Ang iyang rason kay gumikan sa kadako ug kadaghan nga mga lugar nga naapektuhan. Aw, klaro nga pagkasulti, dili pa gyud diay andam ang atong kagamhanan sa mga dagko nga kalamidad sama niini. Hangtod karon daghan pa gihapon ang mga lugar nga wala mahatdi ug mga hinabang gumikan sa kakulangon sa transportasyon. Morag way gobiyerno nga nag-atiman kanila. Sa interview sa CNN, si PNoy nibasol sa mga lokal nga kagamhanan sa kahinay sa pagresponde. Sus, santisima heneral. Unsa man intawon ang mahimo sa mga local government units nga na-distroso man usab sila. Guba ang mga munisipyo ug evacuation centers. Maayo man ni ug sunog nga aduna pay nahibilin. Tanan wiped out. Diha na untay mohimo ug lakang o mosulod ang ayuda gikan sa nasudnong kagamhanan gumikan kay anaa pa man ang Malakanyang. Murag wala man tay Presidente nga nagmando sa tanang relief operations. DAGHANG BIKTIMA Tinuod ning obserbasyon sa uban nga ang nahatagan og pagtagad og concentration sa dakbayan sa Tacloban gumikan ba kaha kay daghan ang mga nangamatay. Apan mas daghan pang mga lungsod sa Leyte o mismo sa northern part sa Cebu province ang nanga gusbat usab. Pero subo lang palandungon nga wala mahatagi ug national attention. Sa iyang TV address, wala man gani mo-mention si PNoy ning maong mga lugar. Didto lang sa Bantayan Island adunay 22 ka mga islet nga hangtod karon wa pa ma-adto ug relief organizations. Matod pa ni 4th district Congressman Benhur Salimbangon nga wala nay mga tawo ang ubang isla human sa bagyo. Ambot ug diin paingon. Sus, ang uban wala mamatay sa bagyo apan namatay sa gutom kay walay gobiyerno nga nagpakabana kanila. (source: BGN-SB 11.15.13)
Posted on: Fri, 15 Nov 2013 10:37:40 +0000
Trending Topics
© 2015