Willemstad – “Desishon pa ku refineria Isla mester ta basá riba bienestar di nos ñetunan. Desishon riba refineria Isla p’esei no por ta dependé solamente di polítikonan sino mester ta resultado di un diskushon amplio den nos komunidat i”. Na palabra lider polítiko di Partido PAIS, Alex Rosaria. Djaweps awor refineria Isla lo keda tratá den un reunion públiko di Staten. Partido PAIS a tuma su tempu i a skucha un grupo grandi den nos komunidat riba futuro di e refineria. “Nos ta kontra di e posishon ku e futuro di e refineria ta un kuestion di konta kabes den Staten. E tema aki ta muchu mas importante ku simplemente konta kabes; e tin ke ber ku e generashonnan ku ta bin. Ta p’esei nos a skucha un grupo grandi di aktor den nos komunidat: Representantenan di e trahadónan di Isla, organisashonnan ambiental (SMOC, Defensa Ambiental, Amigu di Tera), (èks-) gerentenan di e refineria, Milieudienst, habitantenan di e barionan Wishi i Marchena, Direktiva di Skolnan Katóliko, suidadanonan i tambe Kids 4 Planet, ku ta un grupo di mucha konsiente di importansia di nos medio ambiente. Pa PAIS ta importante ku despues di e reunion di Staten e diskushonnan riba e refineria kontinuá. Ta p’esei PAIS a insistí riba saka dokumentonan riba e refineria for di lachinan sekreto kaminda e Gobièrnu anterior a pone nan. Nos ta kontentu ku Gobièrnu si a pone e rapòrtnan riba Isla na disposishon di Staten. Esnan ku tabata kontené kosnan konfidensial, a logra ku a ‘blacken out’ e partinan aki”, Rosaria a bisa. PAIS ta konsiente di e importansia di Isla pa kupo di trabou, entrada i divisa pa nos isla. Sinembargo e partido ta konsiente tambe ku refineria Isla no por keda produsí manera e ta hasi aktualmente. E ta iresponsabel i no ta duradero. E manera di produsí aktual no ta ekonómikamente duradero, ya ku ta un kuestion di tempu ku lo no tin merkado pa e tipo di produktonan manera aktualmente nan ta keda produsí. I mas importante, e manera di produkshon aktual su konsekuensianan negativo pa salú i medio ambiente, ta peligrá nos bienestar i esun di e generashonnan despues. Pa PAIS mester hasi tur esfuerso pa e refineria kontinuá su produkshon na un manera limpi, konforme tur regla akseptá internashonalmente. “P’esei nos lo no akseptá ku sin ningun negoshashon, ta bai ekstendé e kontrato aktual. Tambe, pero sin ke antisipá riba posibel negosiashonnan, mi ta kombensí ku Kòrsou i su pueblo mester por mira muchu mas benefisio for di e refineria. No den forma di donashon ku ta voluntario, sino kontribushon real, basá riba kondishonnan di merkado, na kaha di Gobièrnu”, Rosaria a bisa. Di otro banda Partido PAIS ta di akuerdo ku separadamente di e trayekto aki, mester start un trayekto adishonal di buska alternativa den kaso ku no logra reuní e kondishonnan nesesario pa e refineria produsí di un manera limpi. Kada trayekto mester hasi su trabou, semper den kòmbersashon i konsulta ku tur aktor relevante.
Posted on: Thu, 22 Aug 2013 02:16:16 +0000
Trending Topics
Recently Viewed Topics
© 2015