ZOHNAHTHLAK MITAMTAKTE RILRU TINA TU DARZOKAI CHHIMPUI (TUIPUI) MIZORAM A LUI LIAN BER HI ... Darzokai (Chimtuipui) Leichim ta leh tunhma atanga ke kai lei Footbrige an siam chhe tawh tak chu. Marboard chia pawh kum 1 dawn ai siam anih tak loh avagin mipui 30000 (Singthum chuangin buaina leh sarsatna namen lo an tawk mek avangin hei ka rawn post nawn leh e (He thu hi Sorkar dem duhna na lam vanga post nilvin. chhiatna nasa zawk thleng reng anih thu ka rawn post nawn leh ka ni e) DARZOKAI TUIPUI KE KAI LEI (FOOT BRIDGE) ZAWH A HLAUHAWM HLE! (Lei khaitu hruipui atanga leihlawn khaitu thir 7 a chat) Tunhnai lawka Darzokai lei (Suspension Bridge) Nuaih 250 chuang man a chim hnuin Darzokai (Chhimtuipui) Footbridge (Ke kai lei) Metre 200 chuang a thui chu ahmanrua a hlui tawh avangin mipui leh zinmite tan zawh a hlauhawm hle niin kan thudawnna chuan a sawi. Darzokai (Chhimtuipui) ral a awm Sangau leh S.Vanlaiphai bial mipui Sing thum (30,000) chuangte kawtkai leh chaklakna kal kawng ber Chhimtuipui Darzokai ah hian Motor kaina leihlawn a awm loh avangin BRTF (Border Road Task Force) te chuan He Tuipui kaina atan hian Marboard (Lawng Engine) siamin athlawnin Motor leh Mihringte a thiarkai thin a, Zing dar 7 atanga tlai dar 5 (Sunrise to sun set)inkar chhung zawng an service thin a ni. Hetih lai hian he Chhim Tuipui (darzokai) a Marboard (lawng) hi a hlui tawh avangin leh Lawngah Tui a luh reng avangin kum 2014 kum tir khan a pil a, Motor lian leh Khawl chak dangte hmanga Tuipui chhung atanga khaichhuah tum a ni a, amaherawhchu vanduaithlak takin Lawng thing hi a mawih chhiat tawh em avangin Marboard (Lawng) hi a hnuhchhuah anih meuh chuan a chhe sawm hneh hle a, hman theih a ni ta lo a ni. Tichuan Sangau leh S.Vanlaiphai bial, Chhimtuipui ral a awm khaw 15 chuangte chuan harsatna namen lo tawkin ei leh bar leh bungrua chi hrang hrangte to tak taka leiin Damlo serious leh Chhiat tawh thil ah pawh Lawng (Marboard) a awm loh avangin mipuite an buai thei hle a ni. Thla 8 chuang a ral hnu pawhin he kawng enkawltu BRTF te chuan Marboard (lawng) thar hi an siam theih mai loh avangin zinmite leh bungraw phur motor te pawh transit a kalin Chhimtuipui ke kai lei (Footbridge) Metre 200 chuang a sei, thingphek 2 chauh a rem leh Feet 2 vel chauh a zau, Feet 100 dawn laia sang chu mipui nawlpui, nunau, naupawm, naupang, pitar, putar leh damlo te pawhin an zawh a ngai thin a ni. Mi tamtakte chuan he lei hi a san em avang leh zawh ahlauhawm em avangin hlawhfa la a in puak kai tir te pawh an awm fo a ni. Heng bakah hian bungrua Bag leh thawmhnaw te pawh hlawhfa la a thiarkai (phurhkai) tir thin a ni. Lawng leng te reuh te te hmangin Chhimtuipui (Darzokai) hi inthai kai theih a nih tho laiin, Lawngleng a inthai kai man hi a to hle a, Sumdawng leh bungraw tamtham neite tan lo chuan Lawng lengte hi hman mai ngam a ni lo a ni. Sorkar hmalaknain Kum 10 lai kalta ah khan Darzokai lei (Suspension bridge) dawhna tur sum hi 2.5 Crore (Vaibelchhe 2 leh a chanve) hmuh alo ni tawh a, amaherawhchu he leidawhna tur sum hi Lei tha zawk (Cement Concrete) a dawh tura hmalakna leh nawrna a awm avangin diversion siamin project dang atan hman niin kan thu dawnna chuan a sawi. Kum 10 chuang ral hnuah DONER sum Nuai 253 hmangin Suspension Bridge (Metre 200) a sei, Jeepable Lei dawh hna chu thawh ani a, Mizoram chhimchhak a awm mipui sing chuangte chu an lawm hle a ni. He lei hi Kum 2013 November ni 29 a thawk zo tur a tih anih laiin Kum khat ral hnuah pawh thawh zawh a ni lova, Sangau leh S.Vanlaiphai bial a NGO tangrualte chuan Total Bandh hial huaihawtin chak zawka hna thawk turin an nawr a, hetih lai hian He lei enkawlna hna (Supervision) thawktu Mizoram Public Works Department (MPWD) hotutete nen pawh inbia in MPWD EE chuan Nuai 200 chuang Contractor S.Guha Niyoga hnenah pekchhuah anih tawh thu an sawi laiin Contractor erawh chuan chutiang zat pawisa an la pek loh thu NGO Coordination hruaitute hnenah a sawi thung.(Video Record nen he an thusawina hi dahthat a ni). Darzo kai lei dawh hna hi tum thum (3) lai zawh anih hun tur sawn danglam zel anih lai mekin Kumin December thla tir lam khan he lei hi dawhzawh anih hmain a chim a, mi engemaw zatin hliam tuarin nunna chan hial an awm ta a ni. Hetiang thil a thlen tak avang hian Sangau Block leh S.Vanlaiphai Area NGO Joint Coordination Committee hruaitute leh khawtlang VC hruaitute chu arang thei ang berin Darzokai Tuipui khua ah hian kalin chhiatna tawk lo buaipui a lo bawihsawmtu Tuipui (D) YMA hruaitute hnenah tanpuina sum fai an hlan nghe nghe a ni. Hetiang anih mek lai hian Darzokai ke kai lei (Footbridge) chu a hlui tawh em avangin mipuite tan pawh zawh fimkhur angai hle niin kan thudawnna chuan a sawi a, Pu.F.C.Vanlalzawna, Editor Chhawkhlei Times (Sangau) in Tuipui (D) (Darzokai Tuipui) YMA President Pu.Daniala Mobile hmanga a biakna ah Pu.Daniala chuan Darzokai tuipui lei (Ke kai lei) chu Major repair angaih tawh thu sawiin, a hruipui, lei innghahna ber chu rinawm rih mahse, a lei khaitu ber thirzai leh thingzai phek te chu thlak a tul tawh thu a sawi a. Darzokai Tuipui YMA President Pu.Daniala chuan tunhnai maiah pawh darzokai lei (footbridge) ah Bike nawrkai anih laiin Lei (Footbridge) khaitu thirzai 7 (Pasarih) lai chu a ruala chat thutin lei zawhtute hi vanneihthlak takin lei bang thirzai tlemtein a dan hloh avangin chhiatna liantham a thleng lo niin a sawi a, mihring tamtham deuh a lei zawh phei chu a him tawh lo hle niin kan thudawnna chuan a sawi bawk a ni. He Darzokai ke kai lei (Suspension bridge nuai 253 man, Lei chimta ni lo, ke a kal kaina, kum 20 chuang awm tawh) (Footbridge) khaina hrui 7 chat hi MGNREGA sum hmang leh Hnahthial BDO atanga sum tlem zawng hmangin repair ni mahse Ke kai Lei khaina thirzai leh thingphek te hi a hluiin a chhiat tawh em avangin leh chhiatna lian zawk athlen loh nan siamthat a hun tak zet tawh a ni. Tun dinhmunah hian he lai kawng Hnahthial - Sangau - Saiha Road enkawltu BRTF ten Marboard (Lawng engine nei, Motor phurh kaina) kum 1 dawn lai an siam theih tak loh avangin Tuipui khua a mi pathum tangrualte chuan sumdawnna atan an Lawngleng Pathum te chu zawm khawmin Mihring leh Motor kai duhte chu pawisa chawiin Chhimtuipui hi an kar kaisak thin a ni. He mimal sumdawnna hmanga Marboard (Lawng leng pathum zawm khawm) ah hian Lawngkai man hetiang hian Pawisa an la a; Two Wheeler ah Rs.100, Auto Rickshaw ah Rs.300, Car, 207, Pickup leh Sumo ah Rs.500 te la in 407 leh LPK chin chunglam Motor ruak thai kai manah Rs.1000 an chawitir thin a ni. Hetihlai hian he lawngneitute hian Damlo serious leh mitthi thaikai tul ah erawh chuan Pawisa chawi lovin tlawmngai takin zanah pawh athlawnin an thaikai sak thin niin kan thudawnna chuan a sawi a, Zinmi, Sangau leh S.Vanlaiphai bial mipuite chuan duhthlan tur an neih miau loh avangin Pawisa tam tak chawiin Chhhimtuipui hi an kai thin thung a ni. Khawtlang hruaitute leh NGO hruaitu hrang hrangte chuan arangthei ang ber a Marboat (Lawng engine) nei siamsak leh turin Sorkar thuneitute leh he kawng enkawltu (mawhphurtu) BRTF te an ngen a ni. Kum in 2014 December thla tir a Cheng Nuaih 253 man suspension bridge chimta pawh vawiin ni thlengin seng hawi a la ni lo a, he lei dawh hna thawktu Contractor S.Guha Niyoga pawhin vawiin ni thlengin he lei chim hi a en lo niin kan thudawnna chuan a sawi. Hetih lai hian MPWD hotute chuan a rangthei ang ber a lei dawhthat hna chu thawh chhunzawm tir an tum thu NGO Coordination hruaitute hnenah an sawi a, chutihlai chuan thlakhat lai aliam dawn hnu pawhin Lei chhia tak ngial pawh seng hawi anih si loh avangin mipuite an mangang tak zet a ni. Darzokai Suspension Bride (Motor kalkai theihna) lei hi dawh tha leh pawh nise (Jeepable Suspension Bridge) chauh anih avangin SUMO aia lian motor kal phal ani dawn lova, Chhimtuipui rala awm mihring sing telte tan eizawnna kawngah Bungrua leh Motor lian phur kai thei tur marboard (Athlawna mihring leh Vehicle) phur kai theihna siam vat anih si loh chuan eitur leh bungraw man to chho zelin khawsak a harsat phah zel dawna, heng avang hian arangthei ang ber a Sorkar thuneitute leh mawhphurtuten an tihtur hria a, helai mipui harsatna hi sutkian sak turin an ngen a ni. F.C.Vanlalzawna (Accredited Journalist) Editor Chhawkhlei Times Sangau Mb-9436708919
Posted on: Fri, 02 Jan 2015 04:30:53 +0000
Trending Topics
Recently Viewed Topics
© 2015