بالمنطق ؛ الإخوان مشكلتهم إنهم إقصائيين وبيعتبروا الناس اللى مش من الجماعة درجة تانية .. أه الإخوان معندهمش مشروع ولما الحكم جالهم ما رضيوش يعترفوا إنهم اتفاجئوا ومحتاجين فرصة يفكروا .. أه الإخوان مش عاوزين يشاركوا حد بجدية فى الحكم وعايزين يسيطروا لوحدهم .. أه وبسبب ذكائهم الغير فطرى ده سابوا الفلول وإذناب النظام والمستفيدين من الفساد المتجذر موجودين كصف تانى فى كل مفصل من مفاصل الدولة ؛ وزارات ، هيئات ، مرافق وخدمات ، محليات ، داخلية ، خارجية ، بتوع البروتوكول والتشريفات ومستشاروا رئاسة من اللى غرقوا مرسى وهو أصلا مش ناقص !! الإخوان الغاية عندهم تبرر الوسيلة علشان مصالحهم يتحالفوا مع الفلول وأى حد .. بره وجوه .. أه لكن اللى حصل من يوم الثورة واللى حصل من يوم ما الإخوان مسكوا الحكم شبه بعضه : البلطجة وقطع الطرق والتحرش وترويع الآمنين والمشاكل ؛ بنزين وغاز وقطع كهربا ومياه وانخفاض قيمة الجنيه وتردى الاقتصاد وغلاء الأسعار الجنونى كان شغال طول الوقت وقتل الناس فى محمد محمود والوزرا وعند وزارة الدفاع وكل حته حصلت فيها مشاكل جوه القاهرة وبراها كل ده كان شغال طول الوقت إشمعنى دلوقتى بقى الشرطة والجيش فعالين كده وحاصروا الموقف من كل ناحية وأرضا وبحرا وجوا كمان إيه الحلاوة دى لا الإخوان ولا العسكر !!! مدرستين مرفوضين وعلى فكرة مصالحهم مع بعض برضه وزمانهم رجعوا يتفاوضوا ويتساوموا تحت الترابيزة !!!!! to cut losses واللى بيحصل فى الشارع بس علشان كل طرف يستعمل اللى بيحصل كورقة ضغط فى المفاوضات دى !!!!! واحب أوجه عناية كل الثوار اللى من قلبهم .. قلبهم على البلد بجد تفتكروا الناس اللى فلول واللى كنبة هايفضلوا معانا فى الشارع بعد مرسى مايمشى ؟؟ يعنى لو عجبتكوا الكثرة دلوقتى لازم نفكر إلى متى تستمر هذه الوحدة فى الهدف بين كل الفئات اللى فى الشارع دلوقتى واللى مصالحه مع النظام هل هايفضل معانا لو العسكر أو الأمن رجع لممارساته القمعية والتسلطية اللى بدأت الثورة أصلا اعتراضا عليها ؟! وقفة للتفكير .. مرسى مش نافع .. رجل غلبان الإخوان حطوه فى مكان كفئران التجارب علشان يشوفوا إيه اللى هايحصل وياخد كل الضرب والتجريح وهم بيجربوا ويغلطوا علشان يتعلموا أو علشان يحققوا أهدافهم ... أه بس احنا تانى مش جاهزين برؤية ولا صياغة بأهداف علشان نعرف نختار حد ينفذها .. طبعا فيه ناس مخها منور ؛ لكن اللى أقصده إننا مش متوحدين كشعب على رؤية ومتفقين عليها .. يعنى زى المرة الأولى برضه . ودلوقتى لما يمشى مرسى - اللى لو وافق على انتخابات مبكرة كنا خلصنا من الأول فى شهرين – فاحنا هانكون بكده وافقنا على سنة تانية فترة انتقالية .. وإيه .. تحت قيادة العسكر !!! مش كده والا إيه :/ بس حبيت نستخدم عقولنا .. ياقوم يعقلون ويتفكرون ويتدبرون أخشى ما أخشاه أن يكون الموضوع : أٌكلت يوم أكل الثور الأبيض . وبعد كده ماحدش هايستجرى يرفع وشه فى وش حد عسكرى أو داخلية الثورة بقى : حركة شعبية حقيقية انضم لها الإيجابيين واللى عندهم أمل من الشعب وركبتها أمريكا والإخوان .. وبوظها العسكر لإن مصالحهم ضدها بكل التفاصيل اللى تحبوها ! فيه ناس من اللى فهموا دلوقتى بينكروا الحق علشان مش موافق هواهم ؛ عارفين دا إسمه إيه : إنكار الحق = غمط الحق = تعريف الكفر بالمنطق ..
Posted on: Wed, 03 Jul 2013 11:30:33 +0000
Trending Topics
© 2015