جزء من وجع القلب اللي بيقابل طالب الطب في مصر بعد لما بيخلص الدراسة ، إنو بيبقي مطلوب منه إنو يلم كل معلومات السنين الستة ويبدأ يمارس الطب بصورة عملية والحقيقة إن النظري حمادة ، والعملي حمادة تاني خالص المهم ، بيطلع شباب يفكر في حلول وسط ، فبيعملوا مذكرات يغلب عليها الطابع العملي ، وأحيانا بتتكتب بالعربي أو بالعامية كمان ، هدفها إنها تحط رجل الغلبان اللي لسة متخرج علي أول طريق الممارسة العملية أساتذة الجامعة عندنا بيسموا المذكرات دي "ورق حمامات" ، تسفيها منها ، وممكن تلاقي أستاذ أطفال بيقول في المرور بتاعه للنواب والامتياز بعد مايكون نفخهم أسئلة ، غالبا مالهاش أي ستين لازمة : اللي عايز يقرا اطفال ويبقي دكتور شاطر ، يقرا من (نيلسون) !! نيلسون دا سيادتك هو أكبر مرجع في الأطفال تقريبا ، Textbook في أساتذة كتير مالحقوش يخلصوه ، طيب يابيه مش ينفع يعني كتاب الدكتور الموجي ؟ طيب كتاب الدكتور النجار ؟ ياباشا أنا أجيب نيلسون ليه وأنا مش ناوي أتنيل أتخصص أطفال !! المتسامح منهم بيقوللك : خلاص هات "مختصر نيلسون" !! طبعا أنا مانكرشي ان المذكرات الطلابية دي بتبقي في أحيان كتيرة مخلة وساعات فيها كلام غلط ، لكنها في الحقيقة أفضل وسيلة للخريج الغلبان انو يتعرف بيها علي الحياة العملية بشكل واضح ومش مليان حاجات من عينة : أذكر ١٣ سببا للحمي غير واضحة السبب !! وطبعا نيلسون دا في منو في الباطنة عمو "هاريسون" وفي الجراحة هتلاقي بردو كتب كبيرة وفي النسا وف كل عفريت ازرق هنا في المانيا ، النواب عندهم كتب زي مذكراتنا بالظبط . معمولة بطريقة علمية ومحترمة وصادرة عن اكبر دور النشر الطبية المتخصصة ، وبتاخد الواحد من ايده Handtraining Approach وتقوللوا بكل وضوح : اللي عنده صداع نعمللوا ايه ؟ ومش بتغرق سعادتك في استطرادات آنكل هاريسون ولا خلاف الجمعية الاوروبية مع جمعية القلب الامريكية حول مدي مصداقية ادلتها العلمية !! بيقوللك انت كنايب هتتنيل تعمل ايه للغلبان اللي عنده صداع !! الدستور الالماني بينص علي حق المريض الذي يعاني من آلام أن يحصل علي مسكن ، وبعدين سيادتك استبعد الاشد خطورة بالفحص والمعامل والاشعات ، بعدين عيش حياتك مع الحالة وشوف اسباب الصداع اللي عندها !! الألمان شعب عارف طريق التقدم ، نقل النظري لصورة عملية واضحة وخطة ليها معايير ، واحنا شعب من الآخر ..... رغاي لما كل صاحب رأي ، هيطلعلك في الآخر خطة واضحة لتنفيذ كلامه ، اعرف اننا تجاوزنا أزمتنا الكبري ، أزمة (وماذا بعد ؟) يمسيك بالخير يا دكتور كتاتني :)
Posted on: Sat, 03 Aug 2013 00:25:06 +0000
Trending Topics
Recently Viewed Topics
© 2015