حقائق علمية أخرى عن الأمومة الضائعة :- - أم الطفل هى أقل شخص بيحبه و بيهتم بيه و في جيلنا ده احنا طبعاً بنحب الفايس بوك و الإنستجرام أكتر من عيالنا، أنا أعرف واحدة بتكتف عيالها و تحبسهم في الحمام عشان تقعد عـ الفايس بوك -الطفل لما بيعيا أمه هى اللي بتكون السبب، فا إحنا كجيل فاشل من الأمهات كل واحدة فينا عندها في الدرج اليمين بتاع الكومودينو اللي عالشمال في اوضة النوم كوكتيل من الفيروسات بترش عيالها بيه كل يوم جمعة بعد الصلاة. -طبعاً أمهات هذوها الجيل مش بيحموا عيالهم خالص الا مرتين في السنة مرة بتاعة الشتا و مرة بتاعة الصيف -أنتي كأم صغيرة فاشلة و فاقدة و ملقيتيش اللي يعلمك الأمومة لازم تسمعي لنصايح اي ست كبيرة تتكعبل في طريقك المهبب لأن طبعاً من غير النصايح ديه مستقبل طفلك حيضيع من نقص الحنان و تفشي الامراض و قلة الحموم و حيجيلوا بسببك كل الامراض النفسية اللي لسه العلم مأكتشفهاش و حيطلع بيكرهك و بيحب مرات البواب اكتر منك - طبعاً و انتي بتاخدي النصيحة من اي حد من المتطوعات بمجهوداتهم الامومية لتعليمك كيف تحبين طفلك لازم تفهمي انها شايفاكي فاشلة و ضايعة و فاقدة انتي و جيلك كله نفر نفر بإستثناء ست واحده بس في الجيل ده و هى بالطبع بنتها اللي هى سوبر ماما و فشخت العالم من فرط امومتها الفشيخة و غيرت قوانين الطبيعة و بتربي 7 عيال و بتطبخلهم 9 مرات في اليوم و بالليل بتنقلب بقدرة قادر لكيم كارديشيان عشان خاطر جوزها اللي هو بالطبع اكثر الرجال حظا على وجه البسيطة و في الكريسماس بتتحول لماما نويل و توزع الهدايا و الحنان على اطفال العالم المحرومين و طبعا معندهاش فايس بوك و لا انستجرام و لا فاضية لتفاهات الجيل التافه. - انتي طبعا كأم صغيرة عارفه انك مبتعرفيش تطبخي و لا تنضفي و لا تغسلي و عارفه طبعا ان الحاجات ديه هى سبب وجودك في الكون و من غيرهم انتي مجرد غبار بيهب على المجتمع و يعكر صفاءه. - لازم كمان تكوني عارفه ان جوزك اكيد مش بيحبك حتى لو كل حاجه بتقولك انه بيحبك بس بالطبع هو مبيحبكيش و بيعاني معاكي و نفسه يتسجن في غوانتانامو او ابو غريب عشان يترحم من عيشتك. - بعد كل ده انتي طبعا حتكوني نسخة عن الناصحين اللي مالين حياتك بالحب و الحنان و اكيد حتملي حياة الجيل اللي بعدك من الامهات بنفس الحب و الحنان اللي انتي بتعاني منهم حالياً.
Posted on: Mon, 21 Oct 2013 10:31:38 +0000
Trending Topics
Recently Viewed Topics
© 2015