لا خروج الكهل مبارك من السجن هزيمة للثورة ، وولا دخول المرشد ومرسي وحجازى انتصار لها ، زي ما سفر البرادعى وحمزاوى واعتزال مصطفى النجار مش ضربة تحت الحزام للثورة. الثورة عارفه طريقها بين الناس وجوه قلب جيل كامل قام بيها وكتير من الشعب وراه، الثورة حتفضل مكمله طريقها للنهايه.. مفيش ثورة لها أحلام ضخمة بقدر تحقق مطالبها فى يوم وليله، والسذج وحدهم إللى ظنوا إنه الجنة حتتحقق في غمضة عين.. أنا كنت وما زلت على رأيي إن التغيير الأصعب بييجى من القاعدة مش من الرؤوس، لإن التغيير اللى بيحصل فى الرؤوس تأثيره محدود مستحيل يقلب الموازين إلا لو كان وراه جيوش من الناس وشعب عارف هو عايز أيه، ربما لو الثورة حكمت كان ساعتها الوقت لتحقيق التغيير حيقل لكن برضوا كان حيكون قدامنا طريق صعب والمصالح والاختلافات وفرض الرؤى حيضعف ويقلل من قوة الدفع. كل كلام المحبطين عن انه الثورة اتخطفت والحزب الوطني راجع وإن الداخليه إزدادت عنف وقمع والإسلاميين حيترموا فى السجون _فى ظني_ عبث وكلام غير حقيقى، مش لإن الحزب الوطني انتهى تماما أو إن الداخليه بقت ملايكه لكن لسبب واحد بس إن الشعب بدأ يحلم وبدأ يدور على مستقبل العيش والحرية والعدالة.. والعجلة مش بتمشي للخلف مهما ظن البعض لفترة من الوقت،، الشعب امتلك إرادته وبيفرضها على الجميع نخب وغير نخب والحكام هما اللى بين شقى الرحى، والنظام ايا كان مين هو، هو اللى بين شقى الرحى مش إحنا. خليكوا فاكرين
Posted on: Wed, 21 Aug 2013 17:19:42 +0000
Trending Topics
Recently Viewed Topics
© 2015