[文化節拍] 十and十一月觀影團招募+組團睇「誰調換了我的父親」~~ 11月想睇o既正場電影較少，但仲有超大量電影節片，再加上法國電影節會o係11月20日接力......所以會分做入場組同考慮組。 另外福山雅治o既新作「誰調換了我的父親」暫時有一個五人小隊，初步定o係11月12日星期二，現想招多一位團友(應該可以攞到半價)，有興請聯絡我~(簡介o係下面#5) 黎緊十月繼續好戲，有興趣搵埋我組團啦﹗ 有85折呀百老匯+9折呀UA+平10蚊呀嘉禾 入場組 1) 一路好Rock(뜨거운안녕，10月24日)(BC Special Screening) 之前百老匯搞o既「韓國電影巡禮」重映作。名歌星因醉酒傷人被判入療養院做社會服務。初頭同D院友唔咬弦，後尾發現呢度係一間善終療養院，而o係同佢地相處之下，呢個串爆Rock星慢慢改變，更幫院友們實現籌款演出之路。 2) 光海，成為王的男人(광해, 왕이 된 남자，10月27日)(MCL韓國電影館)(票已購) 繼安樂之後，MCL都搞左一個韓國電影o既Screening，除左搵唔少舊片重溫，亦有部分新片，呢套o係韓國大鐘獎攞到最佳電影同最佳男主角(李炳憲)，故仔講朝鮮儲君光海君為免避殺，搵左一個說書人做影武者。點知有一次佢再係要臨危上陣，佢要點先可以避過嫌疑呢？ 3) 浪蕩美少年 (Oh Boy，10月27日)(KINO 2013)(票已購) 得Tobe To Yee Lok 介紹先知有呢個德國電影節。全片黑白，跟一個失敗柏林少年在城裡走一圈。BTW，Tobe介紹o既 「漢娜顎蘭：真理無懼」(Hannah Arendt)應該更正，可惜已經冇位。 4) 罪迷宮(Prisoners，10月31日)(UA Films/英皇) The Place Beyond the Pines有Ryan Gosling+ Bradley Cooper, 呢套就有Hugh Jackman+Jake Gyllenhaal。故事講Hugh Jackman兩個女失蹤，佢同Jake Gyllenhaal 做o既警官捉到個智障司機(由我相當喜歡o既Paul Dano飾演)同查佢o既經過。 5) 誰調換了我的父親(そして父になる，10月31日)(安樂) 「奇蹟」是枝裕和新作，奪得本年康城影展評審團獎(即第三名)的佳作，都話左睇福山雅治唔一定要睇伽利略o既。福山o係戲入面飾演一個崇尚精英主義o既爸爸，投放大量精神心機o係個仔身上。直至有一日，醫院打黎，話佢個仔當年同人調轉左。福山點去面對眼前呢個「仔」？ 6) 裸命性醜聞 (Call Girl，10月31日)(Innoform media) 今年香港國際電影節上映(當時叫「應召女孩」)之後獲得好評而打入正場之作。瑞典電影，真人真事改編。貪玩女童院孤兒誤入火坑做高級雛妓，竟然發現其中一個恩客係總理候選人....... 7)愛錯Mr.Right (A Perfect man，11月7日)(VII Pilars) VII Pilars又黎啦﹗今次帶俾我地一套愛情片。大致講一個失戀盛女o係阿姆斯特丹重遇舊情人，於是扮另一個身份去翻撻個男人o既故事。咁米蘭昆德拉o既件事？ 8 ) 黑權大狀(The Counselor，11月14日)(霍士) 名導Ridley Scott新作。講一個貪錢律師(「色辱」Michael Fassbender)幫人走粉卻出事o既故事。原先都係「申奧」電影，因為人腳好齊，仲有Brad Pitt、Javier Bardem、Penelope Cruz、Cameron Diaz等，但現時風評只屬一般。 9) 洩密風雲(The Fifth Estate，11月21日(暫定)) 第一套講Wikileaks 創辦人Julian Assange o既電影，據知Assange本人好唔滿意。由新電視劇版Sherlock Holmes 阿Benedict Cumberbatch 同埋o係「一級雙雄(Rush)」入面發揮出色o既Daniel Bruhl做，都似樣o既，應該好過大爛片Jobs先。 10) 過界(11月21日)(湯臣) 新導演劉雅文o既新作，借劉嘉玲飾演o既闊太同陳坤飾演o既司機點去面對各自o既問題。好似話演得唔錯。入選康城影展一種關注單元。 11) 爸媽不在家(Ilo Ilo，11月21日)(高先) 康城影展最佳新導演(金攝影機獎)兼2014奧斯卡新加坡代表。講一個新加坡典型家庭小孩同佢菲傭o既故事，當中涉及亞洲金融風暴o既時期。本月小弟最期待之作。 12) 末日烈車(Snowpiercer/설국열차，11月28日)(高先) 亞洲電影節閉幕電影，美韓合拍，講末日冰天雪地，人類坐著圍繞赤道o既火車逃生。由美國隊長Chris Evans帶著一班美國+韓國窮L進擊有錢人o既列車。「韓流怪嚇」導演奉俊昊新作，可期待。 13) 修辱(La Religieuse，11月28日)(UA CineHub) 終於入一套正宗小眾片喇Cinehub。入選今年柏林影展，講一個唔願入修道院o既少女Susanne 點同極權對抗o既故事。 14) 校園欺凌後(Después de Lucía，11月28日) 上年康城影展「一種關注」大獎及2013奧斯卡墨西哥代表。講一個少女被校園欺凌o既故事。 考慮組﹕ - 溝女不離3兄弟(10月17日)(太陽娛樂文化) 簡單黎講就係將「第一次不是你」o既女角陣容(連詩雅、吳若希、蔣家旻同莊思敏)配沈震軒(喜愛夜蒲2)、張建聲(一路向西)同陳奐仁(有片Quote嗎？)o既葉念琛電影。睇左口碑再算。 - 國定殺戮日(The Purge，10月24日)(環球) o係不久o既將來，美國經濟復甦、失業低企、人人富足，全因政府立法「國定殺戮日」，12個小時內殺人放火、打家劫舍、姦淫擄掠都係合法，國家亦唔會幫手，俾國民出一晚氣。Ethan Hawke 係一家保安公司高層，當晚佢個仔出於惻隱救左個人，導致一家殺身之禍......國外風評一般，但對設定幾有興趣。 - 雷神奇俠2黑暗世界 (Thor the Dark World，10月31日) 不解釋，睇左表現先。 - 圖書館戰爭(図書館戦争，11月7日)(曙光) 曾經為我地帶來唔少台片o既曙光影業重新出發o既電影。日本o係未來立左媒體良化法，所有被認為有害o既知識都要Censor，於是人們組織圖書隊保護知識......而家黎講Gimmick一定有，不過唔知會唔會拍左做愛情片，再加上演員組合唔吸引，要考慮。 - 逃亡大計(Escape Plan，11月7日)(高先) 簡單黎講就係阿諾舒華辛力加搵埋史太龍一齊逃出自己建立o既超級監獄。高先入動作片一向麻麻，但組合卻可以期待。 - 宇宙生還戰-安達的戰爭遊戲(Enders Game，11月7日)(驕陽/洲立) 未來人類俾外星人侵略，於是將小朋友訓練成戰爭機器。故事一邊講外星人一邊講安達o係士官學校的成長，應該唔錯，不過都係睇反應。 -真愛潛行(リアル〜完全なる首長竜の日〜，11月14日)(Panorama) 「贖罪」導演黒沢清新作，本來o係夏日國際電影節上，而家變左亞洲電影節上，可謂橫手盡現......簡單黎講就係一個少女做左植物人，男朋友Hack入佢個腦度叫醒佢反而叫醒怪物o既故事......Cast勁，有佐藤健、綾瀨遙、中谷美紀、小田切讓、小泉今日子等，不過評價好差，又要考慮。 -爆3俏嬌娃(11月14日) 我對卓韻芝拍出黎o既片一D信心都冇。我擺o係度只係想知套片有幾爛o者。
Posted on: Thu, 24 Oct 2013 17:19:10 +0000
Trending Topics
Recently Viewed Topics
© 2015