ATENDE PROBLEMA DI DESEMPLEO, BIBIENDA I POBRESA !!! Willemstad – Partido Frente Obrero ta tuma nota ku e aktual gobièrnu di Kòrsou ta invertí den material i no den e hende. Esaki tin konsekuensia, oumento di desempleo i pobresa. Hopi hende t(a) pèrdè nan trabou último simannan pasobra ekonomia ta mal stanká i no tin perspektiva ku esaki lo ser aliviá den e próksimo simannan. Partido Frente Obrero ta yega na e konklushon aki a base, ku tin hopi biahamentu i ripitishon den aserkamentu di paisnan ku ya anteriormente tabatin kontakto i akuerdonan akordá! Partido Frente Obrero ta konvensí ku e úniko salbashon pa krea trabou i pa laga ekonomia drai na e momentu aki, ta di tuma desishon pa desaroyá pa kaba, Wèchi, Ostpùnt i traha e hospital nobo. Banda di esakinan in otro opshonnan pa stimulá ekonomia tambe ta bonbiní. Akinan mester tin Determinashon, Vishon i Kurashi polítiko. Partido Frente Obrero ta ser aserka pa hendenan ku ya ta biba den kasnan di FKP i tambe esnan ku resien a haña un kas di FKP. Nan reklamo trese dilanti ta ku mantenshon no ta tuma lugá na e kasnan. Tambe t’asina ku ora un famia risibí un kas ku a kambia di famia, ku ta esun ku ta bai biba den e kas aki, e mes mester pone e kas den kondishon pa por biba na un manera desente den esaki. Frente Obrero ta konstatá ku esaki ta pa motibu finansiero pasobra gobièrnu di Kòrsou no ta pagando FKP. Esaki tin komo konsekuensia , ku kontratistanan chikí no ta haña trabou i mester manda nan trahadónan kas i esun ku bai den e kas di FKP ta drenta ku problema soshal, a base ku e no tin e moda pa e mes pone loke falta na e kas ora e drenta esaki, esta plafònt, porta, bentana, tualèt kibrá. Frente Obrero ta spera ku lo remediá esakinan lihé i asina drecha e nivel i kalidat di bida di esnan den kasnan di FKP i tambe pa evitá mas hende riba kaya i sin trabou!
Posted on: Fri, 09 Aug 2013 16:02:57 +0000
Trending Topics
Recently Viewed Topics
© 2015