Lada ka ILP kadei ka aiñ phareng, pynduh noh ia ka European Ward ruh: Ardent 11 September, 2013 Shillong, Nailur 10: Kawei na ki daw ba la ai da ka sorkar bad katto katne kiba pyrshah ia ka ILP ka long ba kadei ka aiñ kaba la shna naduh ka por ka sorkar phareng ne kata ka Bengal Eastern Frontier Regu lations, 1873 bad kam iahap shuh ban pyntreikam mynta. U Vice President jong ka Seng HSPDP, u Bah Ardent Miller Basaiawmoit, u la ther ia ka jinglong arsap ka sorkar da kaba aidaw kumne, namar u ong ba lada ia ka ILP kaba dei ka aiñ ba la thaw naduh ka sorkar phareng ym long pyntreikam, balei pat ka sorkar haduh mynta ka dang buh ia ka kyntien European Ward ha Shillong kaba dei ka jingtreikam ba la buh naduh ka por jong ki phareng. “Lada ia ka ILP ym long pyntreikam namar kadei ka aiñ ki phareng, ia ka European Ward ruh dei ban pynduh noh bad pynlong noh kum ki Scheduled Areas bad pynhap noh ia baroh ki jaka ba hapoh jong ka sha ka District Council”, u la ong. Ia ka European Ward haduh mynta ka District Council kam lah shna aiñ eiei ha kaba ka Trading License bad wat ka Land Transfer Act jong ka sorkar jylla ruh kam treikam. Shuh shuh u nongialam ka HSPDP, u la ong ba ka jingong ba ka ILP kadei ka ain sorkar phareng, kam iahap shuh mynta, kadei tang ka buit tap eitmiaw jong ka Congress tang ba kan myntoi ha ka por elekshon. Ha kajuh ka por u Bah Ardent u la ong ba u pdiang sngewbha ia ka jingkhot ka seng UDP ban iatreilang halor ka ILP, namar ba kane ka ishu ka la don lypa ha ka Manifesto jong ka seng HSPDP. “Lada ki seng kiba khlem buh ia ka ILP ha ka manifesto ki la kyrshan, na ka liang jong ngi lei lei kiba la buh lypa ia ka manifesto, ngi kloi ban iatreilang”, u la ong.
Posted on: Wed, 11 Sep 2013 08:02:18 +0000
Trending Topics
Recently Viewed Topics
© 2015