MATANA MEMO 16 Laltanpuia Pachuau laltanpuiapachuau@gmail SUM NEI TE LEH POLITICS Tunlai chanchinbua langsar zual deuh deuh zinga mi chu kan MLA leh candidate te sum leh thil neih tamzia hi a ni. Thenkhat phei chu kum 5 chhungin a pung nasa lutuk a, mipui min phawk a ni ber e. Ka thianpa pakhat phei chuan a han hriat khan ka zawi vek a ti tawp! Sum leh thil hlu neih hi thil diklo emaw sual a ni miah lova. Dik tak leh thawhrimna vanga an hlawhchhuak a nih phei chuan Bible pawhin ‘hnathawktu chu a hlawh hmu tlak a ni’ a lo ti a, lawmpui tur zawk pawh an ni hial ang. Tun inthlan lo awm turah pawh hian a vawikhatna atana MLA nih tumte zingah mi nawlpui te aia dinhmun tha, sum nei zawkte an awm nual a. Dinhmun chhe zawkte an tanpui tak tak thei dawn a nih chuan thil lawmawm tak a ni ang a, a lo nih lohva MLA thenkhat te anga an neihhlut zawng pung tual tual tur anga zawnga an kal ve leh ringawt dawn a nih erawh chuan a manganthlak lam a ni ang.Anmahniin an tarlan atanga rosum nei tam te pahnih chungchang behchhanin, anmahni sawiselna ni lo, ngaihtuah zui atan thil pakhat rawn sawihawn ka tum dawn a. Anmahni ngei pawhin lo ngaihtuah nawn leh se thil tangkai thei a nih ka beisei. Pu Chalrosanga Ralte – Pu Mavala hi ka pu Nithanga’n khan a tennis khelhnaa min hruaiin tum khat chu a inkhel ka en fuh a. A sam a la sei lai lehnghal kha a nia. A tennis khelh thiamzia chu turu tak a ni. Pa hausa Pu Rothangpuia fapa a nih bakah Pu Hawla monu nuta a nih leh Minister Pu Zodintluanga nau a nih bak hi a chanchin hetia inthlan dawna chhiar tura chhawp chhuah ho hi ka lo hriat ve chhun chu a ni mai a. Politics ah Zoramin kan la hmelhriat loh avangin a that dawn leh dawn loh lo hriat a har. Dr.Lalmalsawma Nghaka – A pa Rev.Vanlalnghaka ka hria. Ka pa leh ka pu avangin ‘pa Nghaka’ tiin ka ko. St.Edmund’s College a BA ka zirlaiin a nau kan junior a ni. Pa Nghaka hian Australia a Pathian Thu a zirpui, a thian tha tak phei chu Sydney a ka chhuk tirh khan kan lawina kohhranah pastor a lo ni nghe nghe a. An inhriat avangin ka nel phah sawt. Mala hi Congress ah a lo active ve viau tih ka hriat hmaa a chanchin ka hriat chu MBBS a zir zawhin Aizawlah sumdawnna bul a tan a, a hlawhtling hle tih a ni a. Sumdawng leh agent lian dang te an awm thup tawh laia market share tha tak nei theia a sumdawng thei kha ka lo ngaisang khawp mai a. Sumdawn dan (marketing strategy) thiam tak a ni tih a lang. Shillonga Presbyterian leh Baptist kohhran te kan inkhawm chhawk changa biakin tuala ka hmuh ve bak kha chu amah hi ka hre tlem khawp. Anni pahnih hian entir pawimawh 3 an nei a. 1-naah chuan Pathian malsawmna dawng chhungkua atanga seilian an ni. 2-naah chuan la thalai, rilru nei tak an ni. 3-naah chuan anmahni puala sum leh thil neih nei tha tawk an ni. Eiruk mamawh tawh lo dinhmuna ding tihna an nih ber chu. Lo tling ve ve ta se MLA iaiawm loh tak an nih ka ring. Mahse, ka han ti teh ang. Engatinge Mizo te hi hetia nei nung ve deuh kan awm hian kan sum leh theihna te hi politics ah kan luanluh tir deuh zel le? Kan ram leh hnam tana thawk ve tur hian politics ah chauh lo hian contribution nei thei lovin kan inhria em ni? Kan ram politics kan pu te hovin an kalpui dan phei chu awmzia tak tak a awm lo tih kan hre tlang theuh a. Term hmasa a mifel anga khawtlangin a ngaih tuna ruling party in a han lawr a, an han tlin pawh khan thil ‘tih dik duh miahlohna’ a awm tlat avangin awmzia an nei zik tluak lo tih pawh kan hria. Party tina ‘mi thate’ hi an senior te mitmei vengin thil diklo au chhuahpui ngam pawh an awm mang lo chu a nih hi. A chhehvela thahnemngai taka lo ti ve lauh lauh atan an pu te hian an dah tawk vel lek te pawh a ang. Hetia party politics tangkailo taka in tat lut lo hian Pu Mavala leh Dr.Mala te ang hi chu rilru an lo pekna kal mek, an sumdawnna lian tham takah hian hei aia thanglian lehzual tur leh mi tam zawkin eizawnna awmze nei an lo hmuh theih nana bei zawk turin an va han itawm zawk tak em! Party politics thlawh kana ram economy tichak tur Ratan Tata-a ang te hi Mizo zingah hian sum nei ho hi an awm tan a tul, politics ti leh ringawt zel lo hian.
Posted on: Tue, 19 Nov 2013 08:35:33 +0000