Nakasuway na ba mo ug adto sa usa ka lugar nga ponu sa mga laysho (social) nga tawo. Well sorry na lang, kay nakatambong na jud ko ug laysho nga panagtipon… in ul peyrness! Nahitabo kini sa Marco Polo Hotel sa Lahug diin nidiretso mi pagkahuman ug tambong sa usa ka kasal sa may Archbishop Palace. Pag-abot namo didto, nahingangha ko tungod sa kanindot sa maong lugar. Sa tinud-anay lang, fers taym pa nako tong mitaak sa nindot kaayo nga hotel, and teyk note ha… Marco Polo pa jud! Angayan jud ipanghambog… unsaon na lang ning taga-sitio Mantayapan oy, hahaha. Sa laby (lobby) pa lang, heaven na jud! Nakaingon nalang ko sa akong kaugalingon, susmaryosep!. Pagkanindot gayod sa palibot ug sa kalit lang nahinumdom ko sa among payag nga busloton nga gianay ang sawg nga kawayan. Wala lang, nitipas lang ug kalit akong huna-huna…managlahi ra jud kaayo nga kalibutan (sa hubog pa, nidles to sey… of kurs!). Dihang nisulod na’mi sa usa ka ‘function room’, nabulit ang agianan niini sa mga mahalong karpet (carpet), gasilak-silak mga lamisa ug lingkuran sama sa bulawan nga pareho jud sa lingkuranan sa hari ug rayna. Ibabaw sa mga lamisa makita usab ang mga silber nga kutsara, tinidor, kutsilyo ug mga mabuakong gamit nga pagkalami gayod bitbiton pauli sa Borbon. Ug sa dihang nahiluna na tanan sa lamisa (prawd pa kaayo ko, kay amoa rang lamisa naay tatak nga reseyrb), wala madugay nisugod dayon ang usa ka programa nga nagpaila sa mga gikasal. Uldo (Although) wala ko kaila nila apan niapil na lang ko ug pakpak, para dili mahalata nga wala koy labot sa okasyon (sampid ra man gud akong imbitasyon…hahaha..kuyog baboy!). Makita jud nimo sa akong panagway ang pagka-hingangha sa sitwasyon maong sigi na lang jud ug kuhit akong amigo sa akong kilid ug moingon… go wid da plow! …sebor da moment! …enjoy da sitwesyon! …daghan pa nga wala nako maminaw…hahahaha. Ambot lang, wala jud ko nagpapiri. Dihang nisuroy ang mga silbidura (waiter/waitress) nga laysho sad kaayo, nga naka-uniporme nga mora’g mga trabahante sa banko. Bitbit nila mga mabuakong panaksan nga dunay sabaw ug giapod-apod sa mga bisita. Kuyog niini mga kaging kaayong pan (garlik breyd daw ang tawag), nga maoy pares sa sabaw (ingon nila…hahaha). Sa dihang nisugod na ug sakdap ang akong mga kaubanan ug nihigop sa ilang mga sabaw… wala usab magpa-ulahi ang nagada oy. Gani ang sobrang pan sa akong amigo, ako pa jud gitilok. Sa akong huna-huna, dapat lang mamawi sa pila ka oras ug agwanta sa kagutom kay nilakaw baya mi nga wala pay pani-udto, tiwas na gani sa panihapon. Kadaghanan sa mga bisita mora lang ug nitilaw pila ka kutsara ug ang uban wala pa gani mahuman ug higop namalik na sad ang mga silbidura ug gihipos ang mga nahabilin sa lamisa. Maayo gani kay nahurot jud nako akoang bahin. Mora ra gud ga sound-check ang tingog sa akong dug-ab tungod sa kabusog nga natagamtam sa sabaw nga fers taym pa sad nakong natilawan… pero in peyrness, lami pa jud ang utan ni lola oy! Wala magdugay, nangabot na sad ang mga silbidura bitbit niini ang mga dagkong plato nga hitik kaayo sa mga lamiang pagkaon ug usa-usa na sad gibutang kada lamisa. Nakaingon ko sa akong kaugalingon, maypa wala ko mohigop ug maayo sa sabaw da! Naa pa man diay gasunod. Uldo (although) wala ko kasabot sa mga sud-an pero baho pa lang…mora ug maglaway jud ka. Ingon akong amigo, meyn kurs ang tawag ato… foie grass & cheese grits, sauteed shrimps & lobster, brik chicken with garlic & thyme, tenderloin beef with butter croutons, beef ‘estragonuf’(ambot sakto ba ang spelling), vegetable & garlic fried rice. Ambot asa nako gisulod ang uban kay nahurot nako ang naa sa akong plato ay…hehehe. Fers Taym! Siguro tungod sa kagutom mao nga mga bakante sa akong tiyan, paslak. Ug nagtuo mo nga diri ra kutob ang tanan? Wala pa matagbaw ang mga silbidura, nagbitbit na sad ug lami kaayo nga pagkaon, kolor yellow nga humok-humok tan-awon nga pong pa sa akong amigo “New York Cheesecake” ang tawag daw ato. Wala pa gani katugpa, hawan dayon ang plato. Kong makasulti pa lang ang New York Cheesecake, maka-ingon siguro nga mopauli na lang siya ug balik sa New York! Grabe, nindot kaayo ang akong na-experience atong higayona bisan ug fers taym. Hangtod pag-uli nako sa balay, gitagamtam ko gihapon ang kalami sa mga sud-an ug ang kanindot sa mga talan-awon kay kahibalo ko nga inig ka-ugma, ginamos ug buwad na sad ang akong maaninaw sa among lamisa. Men kurs man gud na permi sa akong lola kada-adlaw! Kamo diha, naa ba sad moy laysho experience pareho kang Ronald?
Posted on: Fri, 22 Nov 2013 01:23:16 +0000
Trending Topics
Recently Viewed Topics
© 2015