Saop vs. saop 1 patay Ni Darrel A. Carumba/WC (Banat) | Updated July 31, 2013 - 12:00am CEBU, Philippines - Gidunggab patay sa usa ka saop ang iyang kauban nga saop tungod sa bangi bahin sa ilang gibantayan nga luna ug pananom didto sa Sityo Gingi-otan barangay Casoy siyudad sa Toledo niadtong Lunes sa alas 10:15 sa buntag. Ang biktima mao si Renante Bernaldez, 33, taga lungsod sa Dalaguete, samtang ang suspetsado nailhan usab nga si Richard Amaro, 19, ulitawo, lumad nga taga sitio Anibung, barangay Ayongon, Negros Oriental, apan anaa kini magpuyo sa yuta nga iyang gitikad. Ang biktima ug suspek pulos nagtikad sa yuta nga gipanag-iya ni Victor Parang. Si PO3 Jehazeil Huyo-a sa Toledo City Police Station mibutyag sa Banat News nga samtang nanghinlo sa ilang tagsa-tagsa ka uma ang biktima ug ang suspek, nagkalalis kini. Matud pa sa suspek dihang nahinabi sa Bantay Radyo nga buot siyang dunggabon sa biktima nga nagbitbit og sundang niadtong tungora. Hinungdan nga iya kining gi- unhan og bunal sa bara nga iyang gigunitan ug natumba ang biktima. Diha-diha giilog dayon sa suspek ang sundang sa biktima nga maoy iyang gigamit sa pagdunggab upat ka higayon sa naulahi. Naigo ang tiyan sa biktima ug mibuhagay pag-ayo ang dugo niini gumikan sa kalaglom sa samad linubaan. Ang biktima nahubsan sa dugo hinungdan nga namatay kini nga wala na makadangat sa tambalanan. Ang suspek kinsa nagdali sa pag-ikyas, nadakpan ra gihapon sa kapolisan atol sa hot pursuit operation niini ug nabalhug na karun sa karsel samtang gihikay ang kasong ipasaka batok kaniya. (BANAT NEWS) philstar/balita/2013/07/31/1031971/saop-vs.-saop-1-patay
Posted on: Wed, 31 Jul 2013 03:47:31 +0000
Trending Topics
Recently Viewed Topics
© 2015