Zoč su sve moju pisme, statusi u stvari jedno veliko "ZOČ"??? Jer se ne mogu pomirit sa ničin.... Zato se uvik hiton u "nika druga vrimena" ili "nikin drugi svit"....i stalno ću se ponovjat..bez fermat! NEDIJE MOJEGA DITINJSTVA.... Nemojte zamirit, ali nison volila nediju... Zoč? Jer se tukalo inparat u finu robu i pravac pod Skrušiju! Ča su me gledoli dica ča su liti dohodili smijali mi se ispod sebe i čudili zoč nedijon u štof izahodin iz kuće, a oni pul kuponja u krotke gaće, jer jin je bome bilo vruće! Mojko moja da se bilo s njima minjat i umisto pri Bogu, poč se banjat.. Grop mi je i sad štumku kad se sitin koju mi je to dovalo muku... Oboj bi bilo, ako bi me dozvon čapo doma, jer ko će ol sroma intrat u crikvu soma! I tako naježena, dvi ure prin ni jist, ni pit jer ko će!? Tukalo se pričestit! Jedino si mogo čogod na justa stavit ako si se prin zore uspi iz posteje izbavit... čikaru bile kafe popit i kojugod galetinu u nju namočit... Onda...na ruku stavit zlotni bracoljet, u takujin "za ol sveca" složit novi faculet.. čogod munite bi nona za lemozinu dola; ma ne puno, jerbo son bila mola... Pasti, a koje je evanđelje bilo; ko će to zapontit!? Je po Povlu, Ivanu ili Matiju? jer ko će se doma vrotit ako ne znoš, mogo bi čapat koju biju.... Mi ženskice smo priko mise imale čo činit jer kako vrime ubit? Od faculetih smo činili kušin i boršicu i činjale se koja imo lipju krunicu... A ča smo drugo mogle činit, kad od predike, Bože mi prosti, ništa nismo mogle kapit... Don On bi govori, govori i govori... a meni se i sad pari da ga niko ni od velih ni kruto kapi.. Kogod bi kunjo, kogod spo, kogod čini fintu da ga slušo.. a digod bi se kogod i afano... Oto tako je to nikako bilo.. isto bi dola ne znon čo da bi se ponovilo... Lipo bi bilo se tornat i doživit sve to "nanovo" i još kojin put čut ono: "Počuli ste slovo Panovo"... :) :) :)
Posted on: Sun, 21 Jul 2013 08:35:01 +0000
Trending Topics
Recently Viewed Topics
© 2015