Aruba, Pabien ...! Ayera nochi diaranson 13 di november 2013, e agrupacion legendario BLP, a extrena nan senciyo promocional den e programa Na Drempel di Fin di Aña di Magic FM, Sigui pe radio Bo Guia riba frecuencia 88.9 fm y nos ta keda pendiente pe promocion den e otro radio emisoranan local pa asina aki laga Aruba henter cera conoci cu e tema bendiciona:Nos Deseo...!y sin duda, di comparti cu tur habitante e mensahe positivo y poderoso di e cancion aki, ademas di sigui drama bendicion riba nos planeta tera y e deseo pa busca solucion pa un mundo mas miho, manera nos tur ta desea y merece...! Un pabien masha grandi ta bay pe famia completo di Banda la Paranda pa cun otro exito mas riba mercado musical pe temporada di Fin di aña cu e tema promocional: Nos Deseo...! pa asina aki aporta grandemente cu e repertorio musical di Pasco y Fin di Aña. Un danki special ta bay pa Janaika Henriquez, Nicole de Kort, Charise Arends, Adeline Gomes, Franksjen Vos, Roland Jansen, Shamouk Greaux, Wiwi Maduro, studio di grabacion MrLabasose di Dimitri Frans y tur cu a haci di e cancion aki uno posibel. Sin lubida Marlene Lampe, Natalia De Windt pe bunica design di e caff pe cd aki...! Letra di e cancion: Nos deseo...! Intro: E Niño Dios a a nace pa nos tur, pa nos por haya bida y salvacion, pa nos por siña biba sin rencor, den un bida nobo yena cu pordon. Ta pasco awe ban nos tur celebra, y demostra na otro nos amor, pa biba un bida cu paz y union, cu Cristo bibo den nos curason. Tur esaki ta pasco…..! Solo: Dios, abo cu ta nos Tata Fiel y Creador, cu nos canto, nos ta pidi pa Bo scucha nos oracion, pa nos mundo por haya un cambio, nos ta bayendo den perdicion, solamente tin envidia, desunion, odio y rencor. Señor, scucha nos plegaria cu atencion, nos planeta, ta bibando den un crisis sin solucion, nos a perde tur confiansa y tur nos norma y nos balor, ta perdiendo y nos ta bibando sin amor y sin pordon. Coro: Nos deseo ta pa nos tin un mundo miho, sin envidia, un mundo yen di comprension, cu husticia, positivismo, cu hermandad, paz y pordon, sin frontera, cu husticia y mas union….! Nos deseo ta pa nos caba cu tur rencor, pa nos biba cu mas confiansa y sin dolor, pa nos pinta un mundo nobo, cu energia y mas color, pa nos haya for di cielo nos bendicion…! Instrumental Solo: Hesus, Abo cu ta nos Mensahero y Salvador, nos Mesias, e Rey di tur e Rey y e Principe di Amor. Nos deseo ta pa bo nace y manifesta den nos curason, pa nos biba un bida nobo, cu amor, paz y bendicion. Maestro, guia nos riba e caminda di sanacion, siña nos, pa nos tur por haya e forsa di oracion, salva nos di tur peliger, no laga nos cay den tentacion, pa nos tur por haya un bida di santidad y salvacion. Solo: Ruman, awe ta temp’i pasco bin duna mi un man, pordona mi, si algun dia m’a ofende bo of cuestiona bo. importante ta bo ta mi amigo, esun mas fiel, mi bon ruman, danki pa tur e confiansa, pa bo sosten y bo bondad. Coro: Nos deseo ta pa nos tin un mundo miho, sin envidia, un mundo yen di comprension, cu husticia, positivismo, cu hermandad, paz y pordon, sin frontera, cu husticia y mas union….! Nos deseo ta pa nos caba cu tur rencor, pa nos biba cu mas confiansa y sin dolor, pa nos pinta un mundo nobo, cu energia y mas color, pa nos haya for di cielo nos bendicion…! Mensahe final: Aruba, ta temp’i pasco ban nos tur ban reflexiona, e regalo, di mas bunita ta pa nos siña pordona, lubida di tur problema y tur tristesa lagu’e atras, cuminsa un bida nobo, di salvacion y santidad...! Letra y Melodia: Jhon Freddy T. Montoya.
Posted on: Thu, 14 Nov 2013 06:32:11 +0000
Trending Topics
Recently Viewed Topics
© 2015