Assalamu ‘alaikum di awa kato, salam kaganti siriah pinang, ibaraik rokok nan sagulunang, pangarang bungo baso-basi, pambukak rundiang karang banyak, rela jo ma’af pamanuhi. Tapi samantang pun bak itu… Nyampang kok kurang lamak manih,racik bawangnyo nan tak haluih, rono pucek dek kurang kunyik , tahamba talambiak matah, maafkan kami tantang itu. Maklumlah mak , lado dipacik urang darek karambia jauah di pasisia, bawang maha hari pamaneh kami nan tindak ado dayo. Satatang silik silang jo gawa, kok Talenggok adat sopan santun, tuah pangulu kok takirai martabat tuangku kok talinteh, lapehkan kami dari kaua mak, sangkuik sumangkuik dalam bathin salah nan indak disangajo. Pado Allah taubatlah kami. Kinari bukan kinari sajo Kinari nakrang padang panjang Kamari bukan kamari sajo Gadang mukasuik ka di rantang Adopun kato ka di sampaikan Bakeh dunsanak tolan sudaro Lah satahun MBB bajalan Minggu 23 juni alek ulang tahunnyo Kok dapek pintak jo pinto Taniaik di kami nan ma undang Mohon datang sanak basamo samo Sambia manyambuik ramadhan datang Rencana alek kito saminggu Untuak tak ado halang rintangan Malam partamo di status Minang Basatu Malam barikuiknyo masih dalam pancarian Jam 9 pagi acara di bukak Jam 8 malam hoyak statusnyo Jo hati suci kami maintak Bagurau kito saminggu nangko Di siko kato kami sudahi Salah jo jangga mohon ma afkan Samo bado’a bakeh Ilahi Mudah2 umua kito samo di panjangkan Wassalam
Posted on: Sat, 22 Jun 2013 17:35:07 +0000
Trending Topics
Recently Viewed Topics
© 2015