Choose an action...Mark UnreadDeleteDelete SelectedMove to OtherArchiveReport Spam or AbuseDanmawia Vanngiang Danmawia Vanngiang Danmawia Vanngiang (Child Guidence)BUNG 79 SABBATH – NI HLIMAWM TAK Sabbath Ngaih Pawimawh Lohna A Hluar .—Tun hun atâna thutak urhsun tak mai ring inti nu leh pa tam tak chuan Pathian tâna an fate zirtîrna hun an nei lo tih hmuhtir ka ni. Anmahni pawh an inkhuahkhirh lo va, chutianga khuahkhirh tumtute chu an ngei zâwk zêl bawk a. Rinna nung hmangin an fate chu LALPA maichamah chuan an hlan ni tin hek lo. Heng thalai tam tak hi chu Pathian ni thianghlimah hian an nuam tihzâwng apiang ûma Thupêk Palina hi bawhchhiat phalsak an ni a. Intihhlim nân Sabbath nia len vah vel mai mai pawi tihna leh inthiam lohna pawh an nei pha lo. Tam tak chu an duh duhna hmunah an kal a, an duh duh an ti a; Elia thiltih dân entawn khan nu leh pate chuan an fate chu an tithinur ang tih hlauvin an thunun ngam lo. Heng thalaite hian a tâwpah phei chuan Sabbath zahna chu an mausam vek a, inkhawm châkna emaw sakhaw thil thianghlim leh chatuan thil ngaihna pawh an nei ta lo mai thin a ni. 1 Thupêk Palinaa Thumal Hmasa Ber Hi Ngâi Pawimawh Rawh U .—Thupêk palinaa thumal pawimawh tak mai chu ‘ H r e R e n g R a w h ’ [ E x o d u s 2 0 : 8 ] tih hi a ni. Nu leh pate u, nangmahni ngeiin Sabbath ni chu in serh tha tur a ni tih hi hre reng phawt mai ula. In serh that chuan in fate chu zirtîr dân tur diktak in pe tihna a ni ang a; Pathian ni thianghlim chu an lo zah ve ang. . . . In in chhûngah khan Kristian thiamna dik hi in mamawh hlawm khawp mai a. Kârtluanin LALPA Sabbath thianghlim hi thlir rawh u; chumi ni chu Pathian rawngbawl nâna hlan nilen tur a ni si a. Hemi ni hi kan kutte khawvel hna atanga a chawlhna ni leh thlarau nunin a bik taka ngaihven a hlawhna ni tur a ni. 2 Chutiang taka Sabbath ni chuan hriat reng a hlawh ngat chuan tisa thil chu thlarau nuna a rawn inrawlh ve phalsak a ni lo va. Ni ruk chhûnga tihtur engmah chu Sabbath nia tihah khêkin a awm hek lo vang. Chawlhkâr tluan hian LALPA chawlh hahdamna ni leh A intih harhna nia A rawngbawlna lam tihlei thei lo khawpa chauvin kan tha leh chaknate kan hmang zo tur a ni lo. 3 Zirtâwpni Hi Inbuatsaihna Ni-ah Hman Tur .— Zirtâwpni hian Sabbath tâna inbuatsaihna chu zo vek tawh rawh se. Hâk mai theihin thawmhnaw peih fel a ni em? Chaw chhum lâwk ani em? tihte en fel rawh u. Pheikhawk nawh leh inbualte pawh Zirtâwpnia zawh vek tur a ni. Hei hi tum chuan a theih a nia. Dân anga in neih chuan in tithei lutuk ang. Sabbath ni hi thawmhnaw thui that nân te, chaw chhum nân te, nawmsip ûm nân te leh khawvel hnathawh nân te hman loh tur a ni. Ni tlâk hmain khawvel hna reng reng chu dah vek ni sela, chanchinbute pawh dahbo vek ni rawh se. Nu leh pate u, in thil tihdân leh in tih chhan chu in fate hrilhfiah ula, thupêk anga Sabbath in serh theih nâna in inbuatsaihna-ahchuan tel ve rawh se. 4 Chhûngkaw tam takah chuan Zirtâwpni-ah engmah tih a awm loh avangin Sabbath ni hian pheikhawk an nawt a, kawr an thui tha mawlh mawlh bawk a. “Sabbath ni chu thianghlim taka serh tur,” [ E x o d u s 2 0 : 8 ] tih an hre lo a ni. Zirtâwpni hian naupang thawmhnaw chu peih fel vek ni sela. Kârtluan hian an nute kaihhruainain an thawmhnaw chu enkawl ve se, tichuan buai phi chûk lo leh invin dawt dawt kher lovin Sabbath ni chuan muangchângin an insiam thei dâwn a ni. 5 Zirtâwpni hian tihtur dang a la awm cheu. Hemi ni hian kan unau, kan chhûngkaw zinga mi emaw kohhran unaute emaw nena kan inrem lohna zawng zawngte chu dah bo vek tur a ni. 6 Sabbath Ni Chu Chhûng Inkhawma Bul |an Tur A Ni .—Zirtâwpni tlâk hmain chhûngkaw m e m b e r zawng zawng chu Pathian thu chhiar a, zai hova, tawngtai turin thu khawm rawh se. Mi tam tak an dawngdah lutuk avangin hetah hian insiam that a tul hle. Pathian hnenah leh keimahni zinga inpuan pawh kan mamawh hle bawk. Chhûngkaw m e m b e r tinin Pathian malsawm Sabbath ni hi châwimâwi tura an inbuatsaih theihna nân engemaw thil bik takte pawh ngaihtuah thar tur a ni. 7 Sabbath Ni Hi Kan Ta Ni Lovin Pathian Tâ A Ni .—Pathian chuan ni ruk zet keimahni hna thawh min phalsak a, A tân chuan ni khat chauh A hauh a ni. He ni hi kan tân malsawmna ni – khawvel thil zawng zawng dah bova Pathian leh vanram lamah chauh kan ngaihtuahna kan sawrbingna ni lo ni rawh se. 8 Sabbath a lo intan hian kan thiltih leh kan tawngkamte vêng tha ila, chuti lo chu LALPAN A tâ ni tura A hauh ngheh tlat Sabbath ni hi Pathian rûksakin kan duhzâwng tih nân kan lo hmang palh ang e. Keimahniin emaw, kan fate emaw pawhin kan eizawnna hna leh hnathawh ni, ni ruk chhûnga kan thawh theih chi thil reng reng chu thawh miah loh tur a ni. Zirtâwpni hi inbuatsaihna ni a ni a. Hei hi Sabbath atâna inbuatsaihna leh kan hna chungchâng ngaihtuaha sawi hona hun a ni. Vanram mithmuha Sabbath thianghlim bawhchhiatna ni thei awm chi reng reng chu tih loh tawpa sawi loh tawp tur a ni mai. Pathian chuan Sabbath ni hian hnathawk lo ringawt turin min phût lo va, kan rilrute hi thupui thianghlim chauh ngaihtuah tura thunun turin min duh a ni. Thupêk palina hi khawvel thil hlir sawia thil ho mai mai leh nuihzat thlâk lam titi nâna hmangin bawhchhiat ani deuh vek zâwk a. Kan thusawite hi kan rilrua lo awm reng tawhte an ni zel a. Chuvangin kawng dik atanga kal pênna reng reng chuan min phuar ang a, thiam loh min chantir bawk ang. 9 Sabbath, Mut Bo Nân A Uihawm Lutuk .—Tumah hi kârtluana mahni duhzâwng ringawt ngaihtuah a, Sabbath pawh hmang tha hlei thei lo leh Pathian rawngbawlna pawh tithei lo khawpa chau hnêpa khawvel hlâwkna ûm tur chuan inphal suh se. A ni thianghlimah pawh Amah chibai bûk peih lo khawpa kan intih chauh hian LALPA chu kan rawk tihna a ni. Keimahni pawh kan inrawk tihna ani ve tho; a chhan chu hlim taka \hian kawm te kan mamawh bâkah Kristian dangte finna leh an thil tawnte kha chakna atân kan mamawh em em a ni. 10 Sabbath hun hlu tak hi mut bosan mai mai lo vang u. Sabbath ni chuan hmâ takah thawh tur a ni. Thawh tlai hian tukthuan buatsaih leh Sabbath sikul inkhâwm dâwn velah buai phili chûk chûk a awl thin. Kan hmanhmawh a, kan intur a, thin a chhe tûk a; tichuan chhûngkuaah ngaihtuah bawlhhlawh a lo lût a. Sabbath thianghlim chu ngainat a hnêkin ni ninawm leh tihbaiawm tak a lo ni ta thin a ni. 11 In Fate chu Mipui Zîngah Inkhawmpui |hîn Rawh U .—Nu leh pa chuan an fate chu mipui zinga Sabbath ni hmang ngei turin ti sela, an dân siam chu anmahni pawhin zawm rawh se. Abraham anga kan fate leh kan chhûngkua hrim hrim chu kan hnung zui tura awp hneh tur a ni. Kan nun leh thupêk hmangin sakhaw zirtîrna pawimawizia hi an rilru-ah tuh nghet bawk ila. Baptisma thutiam la tawhte reng reng chu puithu takin Pathian rawngbawlna atân an inhlan tawh a; chuvangin an fate nen Kristian nun thang zela infuihna leh tihphurna an dawn theihna hmun apianga indah chu an bat a ni. 12 Mahse Pathian chibai bûk hi hna ninawmah kan ngâi tur a ni lo. LALPA Sabbath hi keimahni leh kan fate tâna malsawma-ah kan chantir tur a ni. Sabbath hi ni hlimawm tak, Pathian tihthianghlim ni angin en sela; tha taka kan kaihhruai chuan a en pawh an en mai ang. 13 Biak Inah Nalh Taka Inchei Tur .—Sabbath inkhawmnaa inchei dân turah hian mi tam tak chu hrilh fin an ngai khawp mai. Kârtluana an thawmhnaw hâk pângngai nen Pathian hmâ-ah an inlan tur a ni lo. Mi tinin Sabbath nia hâk tur leh Pathian biak ina rawngbawlpui tlâk thawmhnaw bik nei theuh rawh se. Khawvel mite anga inchei tur ni lo mah ila pâwn lama kan lan dân ngaihthah lutuk tur chu kan ni bik lo. Tlereuhte inbel ve chêk chûk lo mah ila kan nalhin kan ti zaih tur a ni. Pathian fate chu chhûng lam leh pawn lamah thianghlim hle rawh se. 14 Naupangte Hnenah Sabbath Nia Sermon Hrilhfiah Tur .—Rawngbawltutehian hna urhsun leh thianghlim tak an thawk a, mahse an thusawi ngaithlatute chungah pawh mawhphurhna thianghlim chu a innghat ve tho bawk. Chatuan nunna nei tawhten a taka an nunpui tur inkaihhruaina chu zawm ve ngei tumin ngaithla rawh se. Ngaithlatu apiangin Bible châng an chhiar apiang chu a hnena Pathian thuchah, rinna nena dawn a, ni tina nunpui tur angin an ngaithla theuh tur a ni. Nu leh pate chuan an faten an hriat thiam theih nân pulpit atanga thusawi chu a taka an nunpuia khawngaihna leh thlamuanna nasa tak petu tur hriatna an neih theih nân hrilhfiahsak rawh se. 15 A Bîka Chaw Ei Buatsaih Tur .—Sabbath nia kan eitur siam chu ni dang aia tam emaw, tui deuh zâwk emaw ni lo sela. Nih a hnêkin kan chaw ei chu mâwl zâwka buatsaih ni rawh se. Thlarau lam thil hre thiam tura rilru a fim theih nân leh a harhvân theih nân ni dang aia ei tlêm zâwk tur a ni. Ei tam luat hian thluak a tibuai a. Thu pawimawh ber berte chu ngaithla mah ila ei leh in dik lovin rilru chu a tihbuai avangin kan ngai pawimawh tak tak thei lo. Sabbath nia ei tam luat avang hian mi tam takin an rin aia nasain Pathian an timualpho a ni. Sabbath ni-ah ei rawngbawl loh tur tih hi chaw dai ei tur tihna a ni kher lo. Khua a vawh chuan a hmâ nia chhum sa chu tihlum mai tur. Chaw chu mâwl têa siam ni mah sela a itawmin ei a châkawm hle tur a ni. Duhsakna anga ngaih theih ni danga ei ngai zen zen lohte pawh siam tel rawh u. 16 Inkhawm Ban Hnu A Pawimawh .—Sabbath sikul leh inkhâwmna pângngaite hi chuan Sabbath nia hun tlêm zâwk an chang a. A bâk zawng chhûngkaw chan hi Sabbath nia hun hlu ber leh thianghlim berah chantir tur a ni. Hemi hun tam zâwk hi nu leh pate chuan an fate bulah hmang rawh se. 17 Lehkhabu Chhiar Tur Inhmeh leh Sawi Ho Turte Ruahman Ula.—Sabbath ni hi chawlhkar tluana ni duhawm ber leh nuam berah siam lul teh u. . . . Nu leh pate chuan an fate chu an ngaihven thei a, an ngaihsak bawk tur a ni. Bible thawnthu ngaihnawm tak takte chhiarsakin Sabbath ni chu zah hle tur leh thupêk anga vawng turten zirtîr rawh se. Hei hi nu leh paten an fate ngaihsak chu phurrita an neih loh chuan tih theih ani a ni lo va. Mahse kawng dik an zawh chuan Sabbath ni hi nuam takah an siam thei thung a ni. Naupangte hi lehkha chhiar atangin emaw tha taka titi hona atangin emaw an chhandamna ngaihve hle tura siam theih an ni bawk. Kan pianpui thinlung hi chuan Pathian emaw, vanram emaw, van lam thil hrim hrim emaw khi a ngaina ngawt ngai lo va. Khawvel lam âwn tlatna leh sual tihchâk tlâtna hi nemkir reng a, kan thinlungah hian van êng chu luhtir tur a ni. 18 Naupangte Thiltih Ngaihthah Loh Tur .—Sabbath ni hian tam tak chuan engmah an ngaihtuah lo va, an faten engnge an tih a, khawiah nge an awm pawh an hre lo. 19 Nu leh pate u, thil dang zawng aiin Sabbath ni hian in fate chu enkawl ngun rawh u. In fate Sabbath in bawhchhiattîr hian in bawhchhe ve nghal a, an duh duhna hmuna an vah vêl leh an infiamte in phal hian Pathian chuan Sabbath bawhchhetute angin A en reng che u a ni. 20 Pâwn Lamah Lên Ho Tur —Nu leh pate chuan an fate chu Pathian thilsiamte en pui turin an hruai chhuak thei ang. Pangpâr vul chêk chûk leh a kuhmum lo parh chhuak mêkte, thingbuk sâng tak tak leh hnimhnah mâwi tak takte chu kawhhmuhin Pathianin heng zawng zawngte hi ni ruk chhungin A siam zo va, a ni sarihnaah chawlin A tithianghim tihte zirtîr tur a ni. Tichuan nu leh pate chuan an kaihhruaina atâna an zirlai chu an fate-ah chuan an phuahkhawm thei ang a, heng naupangte hian leilunga thilsiamte an hmuh apiangin heng zawng zawng Siamtu ropui tak chu an hre chhuak ziah tawh ang. An rilru chu thilsiamte Pathianah chengin, kan khawvel siam a nih lâi te, Sabbath lungphûm phûm a nih lâi te leh Pathian fate zawng zawng lawma an au lâite kha an thlir kir ang. Chutiang chu kan fate rilrua kan tuhtur zirlaite chu an ni. Kan fate hi hlim lo taka Sabbath hmang a, dâia len chhuah khapsak bur tur an ni lo. Krista pawhin A zirtîrte chu dil kamahte hruaiin A zirtîr a. Sabbath nia A s e r m o n -te kha in chhûnga A sawi an ni vek lo tih a lang reng a ni. 21 Thilsiam Atanga Zirlaite—Thil Hmuh Theih Atanga Zirlaite Chu .—Naupangte chu thilsiam atanga Krista chu hmu turin zirtîr rawh u. Pawn thingbuk hnuaiah leh huanahte hruai chhuak ula; thilsiam mak tak tak atangte hian A hmangaihna lo lan chhuah dân chu zirtîr ang che u. Thil nung zawng zawng thununtu dân A siam ang bawkin dân min siamsak a, chung dânte chu kan hlimna leh lâwmna atâna siam anni tihte zirtîr ula. Rei deuh deuh tawngtaina leh thusawi rei ninawm deuh deuhin naupangte chu tichau lo ula, thilsiam hmuh theihte hmang hian Pathian dân zawm tur kan nihziate zirtîr zâwk rawh u.22 Pathian Nungchang Dik Tak Hriatna Dik Pe Rawh U .—Engtin nge naupangte hian Pathian hriatna dik chu an dawn theih ang a, an rilru chu pawna an awm mai mai leh an infiam mai mai aia an nu leh pate bula an awmin hneh a nih theih zâwk ang? An rilru naupang tak chu thilsiam mâwi tak tak atang hian Pathian nen inzawm sela; Pathian hmangaihna aiawhtu chhinchhiahna A thilsiamahte hi kawhhmuh ni bawk sela, tichuan an rilru chu hipin a awm ang a, an tuipui zui bawk ang. Pathian nungchang chu fir tak leh khirh tak anga an hmuh a hlauhawm tawh lo ang a; mihringte hlimna atâna A thilsiam mâwi tak takte an han thlir meuh chuan hmangaihna leh nun nêmnaa khat Pa angin an hmu tawh zâwk ang. A fiahna leh A thupêkte chu A thiltihtheihna leh thuneihna entir nân mai ni lovin A fate hlim nâna A tih vek anni tihte an hmu bawk ang. Pathian mizia chuan hmangaihna te, malsawmna te, mawina te leh mi hip theihna te a neih avangin Amah hmangaih tura hruai an ni zel bawk. An rilru chu sava mâwi tak tak hram chil chel leh hnimhnah kûr siau siau te, boruaka pangpâr mâwi rimtui lêng chem chem lamah chuan in hruai thei a. Heng zawng zawng hian van Pathian hmangaihna leh A kut themthiamzia puangin A ropuina chu an entir a ni. Nu leh pate u, engvangin nge thilsiama Pathianin zirlai ropui tak min pêk, kan fate hnena A nungchang diktak kan hrilh theihna hi in hman tangkai loh ang? Tlawmna nun aia incheina chhuak thar ûm ho leh thilsiam mawina hre thei lo tura inkhar khumhote chu a thlarau mi tak tak thei lo. A thilsiamte atangin Pathian thiltihtheihna leh remhriatzia te an hre thiam thei lo va; chuvangin an thinlung chu hmangaihna leh hamthatna tharten an tiphuin an khawih pha tawh lo va, thilsiama Pathian an hmuh ve pawhin mak tihna leh zahna pawh an nei pha chuang lo. 23 Eden Nun Channa Nî.—Zirna hmanrua atâna Sabbath hlutna hi chhût phâk a ni lo. Pathianin kan laka A thil phût reng reng chu A ropuina nen tihmasawna tidanglamin min kir leh vek a ni. . . . Sabbath leh chhûngkua hi Eden-ah khan inang renga din niin Pathian tum dân chuan then hran theih loh khawpa inzawm nghet an ni. Hemi ni hian ni dang zawng aiin Eden nun kha a chan leh theih a ni. Pathian remruat dân chuan chhûngkua chu hnathawk ho va, zir ho va, Pathian chibai bûk ho tur leh intihhlim ho zel tur an ni a. Pa ber chu chhûngkaw puithiam ni tur leh nu leh pa chu an fate tâna zirtîrtu leh thian tha tak ni tur an ni bawk. Mahse sual avangin mihring nun dân chu a lo danglam ta a, hei hian chhûngkaw inlungrualna tur a dal nasa ta em em mai a ni. Kârtluan hian pa ber chuan a fate hmêl chu a hmu ngai ta meuh lo va. Fate kawmna hun leh zirtîrna hun pawh a nei lo ani ta ber mai e. Mahse Pathian hmangaihna chuan thawhrimnate hi tâwp chin neiin A siam a. Sabbath-ah hian A zahngaihna kut chu A dah a. A Sabbath ni-ah ngei hian chhûngkaw tâna Amah leh A thilsiam hnaihna hun leh chhûngkaw inpâwl hona hun te A siam ta a ni. 24 Sabbath Nî Hi Hlimna Nî-ah Siam Rawh U .—Pathian hmangaihtute chuan Sabbath ni hi ni hlimawm, ni thianghlim leh ni zahawmah siam rawh se. Hei hi Pathian phal loh thila hlimna an zawn erawh chuan an ti thei lo vang. Mahse an chhûngkua chuan Sabbath chu châwi sângin kâr khata ni ngaihawm berah an siam thei a ni. Kan faten Sabbath ni an ngainat theih nân hun pawh inpêk luih deuh mai tur. Khawlai lêng hovin phaitualhnimahte nilum aiin thu ho ila, an naupanna rilru za cheng thinte chu Pathian hnathawhte sawipuiin hrai tlai ila, tin, leilunga thilsiam mâwi tak takte chu kawhhmuhin Pathian hmangaihna leh zahna nei turin kan chawk phur thei a ni. Sabbath chu kan chhûngkaw tâna ni ngaihawm tak, a lo inhêr chhuak leh tur pawh hlim taka lo hmuah tlâkah siam tur a ni. Nu leh pate hian an chhûngte hnena kaihhruaina fel tak an pêka, thlarau lam thil tuipui tura an tih theih a, Pathian nungchang thlirna diktak an pêk theih bawk a, Kristian nungchang famkim neihna tura Pathian min phûtnate leh chatuan nunna nei tura thil tulte an hrilh theihna hmanrua ni lo thil dangin Sabbath ni hi an châwi sângin an châwimâwi thei lo. Nu leh pate u, Sabbath ni hi ni hlim awm tak, in fate pawhin an thlir reng leh an thinlunga an lawm em emah siam rawh u. 25 Tawngtaina leh Zaia Sabbath Thlahna .—Sabbath ni a lo tlâk dâwn chuantawngtaina leh fakna hlain chu hun thianghlim chu khâr sela, Pathian chu kârtluana min awmpui turin sawm nghal ni rawh se. Hetiang hian nu leh pate chuan Sabbath hi a nih dân tur ang takin chawlhkâr khata ni hlimawm berah an siam thei a ni. An fate chu he ni hi ni zawng zawnga ni hlimawm ber, LALPA ni thianghlimna, chawimawi tlâk anga ngâi turin an hruai thei a nih chu. 26 _______ 1. Testimonies for the Church, vol. 5, pp. 36, 37. 2. Manuscript 57, 1897. 3. Testimonies for the Church, vol. 6, p. 354. 4. I b i d ., pp. 355, 356. 5. Manuscript 57, 1897. 6. Testimonies for the Church, vol. 6, p. 356. 7. I b i d ., pp. 356, 357. 8. Manuscript 3, 1879. 9. Testimonies for the Church, vol. 2, pp. 702, 703. 10. Review and Herald, June 13, 1882. 11. Testimonies for the Church, vol. 6, p. 357. 12. Review and Herald, June 13, 1882. 13. Manuscript 3, 1879. 14. Testimonies for the Church, vol. 6, p. 355. 15. Manuscript 41, 1903. 16. Testimonies for the Church, vol. 6, p.357. 17. I b i d ., p. 358. 18. Review and Herald, Apr. 14, 1885. 19. Review and Herald, Apr. 14, 1885. 20. Review and Herald, Sept. 19, 1854. 21. Manuscript 3, 1879. 22. C h a t u a n N g h à h f ã k , pp. 516, 517. 23. Testimonies for the Church, vol. 2, pp. 583, 584. 24. Education, pp. 250, 251. 25. Testimonies for the Church, vol. 2, pp. 584, 585. 26. I b i d ., vol. 6, p. 359 .
Posted on: Sun, 27 Oct 2013 10:04:05 +0000
Trending Topics
Recently Viewed Topics
© 2015