Compensation ngaraicha eina mikhavai Pangal Political Forumna demand sahaira Imphal, Jan. 11: Pangal (Manipur Muslim) Political Forumna Sikh riot li thikahai wuivang shorkarna compensation khami thada thuikahai atamli Meitei-Pangal khonkazar (riot) li sazakahai-thikahai binglila ngaraicha kahai compensation mi khavai state shorkarna union shorkarli recommend sami phalungrada demand sahaira. Aja Manipur Press Club, Imphalli paomebing eina press conference kapam atamli MI.Khan Spokesperson, Pangal Political Forum na phongshoka, thui kahai May 3, 1993 thang kakhalop (rumours) eina Meitei-Pangal khonkazar shokahaina. Khonkazar kashok atam chili mi 140 sathat kahaina kala mi 25 saza kahainada hanga. Khonkazar shok kahai chili victims family bingli compensation khami chi yangkheikahaina. Atam chili phongkasa shorkarna kakhanang samphang kahai shimkhurbingli lupa 20,000 each mang compensation sada khamina. Kha thuikahai atamli Sikh riot kashok atamli thikahai shimkhur bingli lupa 5 lakh each hi centre shorkarna compensation sada khamina. Hithada compensation mashun athishurda mamithura. Meitei-Pangal riot li thikahai shimkhurbingli Sikh riotli thikahai shimkhur bingli khami thada miphalungrada demand sahaira. Ajijulhaqe Khan, President of PPP na hanga, North East India wui mibingli mathalak eina yangsangmirada Prime Minister Modina hangkahai khaleina. Ana hangkahai athishurda North East India naobingli otsak eina sami kharanada hanga. State shorkar hina otshot hiwuivang Union Government li recommend samiphalungrada demand sahaira kalikha sada state shorkar eina Union Government na darkar salak kahai hi mami akha ngaraicha kahai compensation mikhavai ainwui khangachon khuilaga ngasungra kachila phongshok haira.
Posted on: Mon, 12 Jan 2015 06:18:08 +0000
Trending Topics
Recently Viewed Topics
© 2015