DI HLUI HLIMTHLA Khua a nuam lo bawka, khawinge vawiin chu awmni kham meuhin suilung muhnu leh luahloh lungdi sulhnu infang dawn teh ang hmiang. Amah Lianthangpuian a lo tih ang deuhin he fur khawchhe hnawm tak karah hian ka suihlung muhnu aleng miau a lawm le, tu han dem theih ngawt nge ka nih bik teh lul ang ni. A mi leng zawngten an pawmlai tingtang nen di zûn ngaih thu, hla a an chantir mek lai hian kei zawng sulhnu chhui leh nunhlui ngaih zawng awmkhua a va har lua em! Tih hi ka tuipui leh lo thei thin si lo. Ni e, kha hun liam ta kha au kir tumin awrawl tawp pawhin au mah ila a sawt tawh lova, ka au ding zo tawh dawn nahek lo, kum sangbi thar lo herchhuak zel hian a herchhuahpui dawn lova, kum sangbi hlui hi a her tawh ngai dawn nahek lo, chu chu vanlalremruat a nih miau avângin he hringnun duhthusam hian a her danglam ngai dawn si lo. A ni tak a sin, he hringnun kawng kan zawh dunlai khan kan hma huna lo thleng turte hi hre lawkin hmu lawk ila chuan he ka hringnun kawng min zawhpui tur che hian ka thlang ngai hauh lovang che, a chhan chu maw? Nangmah avânga nat hi ka duh ngai lo a sin, mahse, kan hmahun lo thleng tur kha ka thlîrlãwk thiam bik loh avâng erawh chuan min ngaidam ang che. Hmangaihna rinawm chu parte ti a tiamthu an sawi laiin keini zawng thenni kawl eng kan tih a ngai ta si, mahse maw, kei chuan kan tiamthu zawng kha ka la vawng reng a sin, Dt/*/*/**) zan khan hmangaihna kawng bumboh taka ta tal chhuaka biahthu tin sep dun turin Branch YMA ten sumtuakna atana an siam ZODINPUII tih kha kan veng hall-ah en turin kan pahnih-in kan kal a nih kha, mahse, kha zan khân i chhungten min lo châng reng tih rêng ka hre silo, thlanglam pang tukverh bulah inhnaih takin kan thu dun a, mi dang sahawk leh ri hulh hulh karah chuan nunchan kan zira naupang thuawih ang maiin kan thu hle hle a nih kha, beisei phak loh leh rin lawk loh tak maiin i nu leh pa, nangma nu leh pate ngei mai kha an lo lang ta si a, an ruala haw lo thei lo chein an siam ta che a nih kha. Rilru nuam lo tak leh khingbai takin ka thil en lai chu ka en a, ka en zo ka haw tur chuan ka rawn hmu leh che a nih kha i la hre ve ngei ang tiraw? i lam ka rawn pan a, mahse, i nu leh i pa an lo lang ve si, engmah sawina hmun pawh a awm tawh mawlh si lova, kal sawn ka tum lai tak mai chuan i nu, nangma nu ngei mai khan a fanu i nih chhunga min neih theih loh tur thu a sawi kha vawiin ni thleng hian ka bengah a la ri nawn tluk tluk a sin. Hmangaihnaah hian a tawng vanneite an awm a, a vanduaite pawh an awm ve châwk rêng a ni, chûng hmangaihna a vanneite chu Khuanu samsuih kan ti hial reng a ni, chûng mite tan chuan khawvel hi a va mawiin a va nuam dawn tak em! Hmangaihna dik leh tluantling leh khuanu samsuih kan tih hialte pawh hian e, harsatna tam tak an paltlang fo thin a ni ngai a sin, chung harsatna an paltlang avâng chuan khuanu samsuih kan tih phah hial rêng a sin. Mahse, he khawvel a awm chhung zawng hian nang leh kei hi tumahin khuanu samsuih min ti ngai dawn ta lo a ni. Hmangaihna hi a mit a del an ti fo thin a, nang ka hmangaihna che phei hi chu hmangaihna mitdel mai ni lovin hmangaihna mit nei lo hiala mawi a ni a sin, kha zan kan chhuahdun hnu atang che khan i hmel hmuh tumin a rukin ka zawng reng thin che a, mahse, nang chu ka hmaah reng i inlan duh lova, tih theih nei chuang hek lo le, ka insawh ka insawh a, a tawpah zawng i thiante kâ atangin ka hre ta, kei hi min hmangaih lo turin i nu leh i pa, i unauten an thlemna che chu i lo pawm ta a, ka chantur reng dawn lovin min kalsan ta a nih kha, chu thu ka hriat tluka na chu ka la tawng ngai lova, ka thinlungah hian zawhna tam tak a rawn lang zut zut a, chung zingah chuan he thu HMANGAIHNA KAWNG BUMBOH TAK KARAH HIAN MI DAWIHZEPTE TAN HMUN A AWM VE LO tih hi a lian bera, tun thleng hian a la lian ber fo a sin. Kha hun liam ta te kha vawiin hian ka ngaihtuah thar leh a, nang ka hmuh hma che khan he hmangaihna kawng hi ka dai ngai lova, a awm tih pawh hi ka hre hek lo, nang chuan chu hmangaihna kawng bumboh takah chuan min hruai lut a, a kawng chu min zawhpui i intiam a, mahse, kawng kan zawh dun dawn chauh emaw ka tih laiin nang chuan chu kawng ka la zawh ngai miah loh-ah chuan min hnuchhiah a, min pen bosan a, ka hnena lo let a, chu kawng chu zawh dun turin ka lam reng ilo hawi tawh silo. A kawng chin pawh engmah min hrilh silo, vawiin ni thleng hian kha kawng kha keimahin mal takin ka la zawh ve beuh beuh a sin. I tel lo chuan he kawng hi ka zawh thiam lova, kal zir tantir kha nangin min pen bosan tak atang khan ka kal sawt thei lova, ka hnung a mi ten min rawn tlanpel fo a sin. Chu kawng min zawhpui hnu ngei maiah khan min hnuchhiah avângin vawiin ni thleng hian ka la tâng reng a, chu kawng chu zawh chhuak turin chakna reng ka nei tawh lova, ka chakna ber nangin min kal san miau avângin ka tha hian chakna reng a nei ta lo. Han dawn ve la i tel lova he hmangaihna lamtluang ka zawh tur hi, i tel lova zawh chhuak thei tur hian min ring rêng em ni le?
Posted on: Mon, 22 Sep 2014 14:40:01 +0000
Trending Topics
Recently Viewed Topics
© 2015