Dûedi / Dîk Sîleman Û Hz. Sîleman Îsmet Bor Belkis gulê serê destana; yew vateyê a, di nêbîyenê. Çira nêbîyenê ke; merdimo sey Hz. Sîlemanî, merdimo ke kaf ra kaf huqum kerdo, mîyerdê a bi. Belkis rojêk xo bi xo vana; ez ewro Sîlemonî ra çi biwazî? Yeno vîrê a ke, cilê a purtê mîyan / meşnan ra yê, rakewtişê xo zî hend baş nîyo. Veng dana Hz. Silemanî û vana; ti vanî, ez sermîyanê teyran o, eke wîna yo, mi rê pellanê / purtê teyran ra hewt katî cilan viraze! Hz. Sîleman qasûd şaweno pîyo rê teyran rê ( gorê vatişan qasudê êy qela bîya ) û vano bîyerên pîyeser. Teyrî yenê pîyeser, Hz. Sileman vano; mi rê purtê şima lazimo, ez Beliksê rê hewt katî cilan dekena. Û perseno vano; gelo pîyorê teyran ameyo? Qasudê êy vano, Dûedeyo fişin ( o wext hema nameye Dîk Silmanî dûedeyo fişin bîyo ) nêameyo. Vindenî nê vindenî dûedeyo fişin nîno. Hz. Sîlemon eciz beno, vano; wa inî teyrî dest pê bikerî, hetanî dûedeyo fişin bîyor! Verî şewşewoke / arçîsik dest pê kena, pellanê xo rişnena. Ini beynatede dûedeyo fişin yeno. Hz. Sîleman cirîgîyeno êy ra û vano; dûedeyê min o fişin! Ti kam ca mendî. Ti nêzanî mi qasud şawito û ma paweyê to yê? Dûedeyo fişin vano; ya qralê ma, mi zanêne, vengê qasudê to ame mi, lakim mi gera verî hesabîyek bikerdên. Hz. Sîleman vano; hesabê çîyo? Duedi vano; mi va, dê ez hesab bikerî rî ye dinya de ganî zafîyê yan merdê? Hz. Sîleman vano; ee, to hesabê xo kerd? Kam het hîna zaf o? Dûedi vano; e, mi hesabê xo kerd. Yew yê ganîyan zîyedo lakim mi o zî barê merdan de hesibna. Hz. Sîleman vano; la o kamo, hem ganî yo, û hem zî ti barê merdan de hesibnênî? Dûdi vano; o ti ye. Hz. Sîleman vano; la çira ez o? Dûedi vano; eke ti merde nêbîyenî, to no teyr û tur semedeyê kêfe Belkis kerdên zit û bût? Ti nê vanî, zimistan esto, serd û puk esto, vewre esta varan esto? Inî teyrî bê purt sebenî? Hetan pîyorê purtê xo rişnenî, wa teyna purtê xo yo bêçer birişnî beso! Hz. Sîleman fikrîyeno, eh, eke dûede raşt vano. La hîn Hz. Sîleman emir dano vano; teyrên vano; teyna purtê xo yo bêçerî birişnen. Wîna bê şewşewoke êy bînî xelisîyenî. Û dûdeyo fişinî ra vano; ti hîn teyre min e, nameyê mi genî. Veng dano vano; yew taca zerên bîyarîn dîke mi sere nanî? Dûde qeyreno. Hz. Sîleman vano; ti çira bermenî? Dîk Sileman vano; la na howleya ti mi rê kenî? Eke to taca zerên mi sere nanî, ti neyzanî ez bena seyde gawon û şiwanî? Hz. Sîleman vano; lîya ti yew teyre zî, ti mi ra hîna zaf aqilê û hîna rind aqil benî gûranê dinya ser. La Hz. Sîleman emir dano vano; yew pûşî bîyaren dîkê mi sere nanî.
Posted on: Mon, 17 Feb 2014 03:44:05 +0000
Trending Topics
Recently Viewed Topics
© 2015