Embeyecemento di L.G. Smith Boulevard a mehora e area pa comerciante y publico Sr. Hardeveld: “Ami ta mir’e hopi positivo” Como un di e puntonan mas visibel y transita riba nos isla, hopi ta ripara e cambio drastico. E strip di L.G. Smith Boulevard for di stacion di Valero pa unda antes Super Food tabata. ta wordo renoba y embeyece. Pero e diferencia ta mas grandi ainda pa esnan cu dia aden dia afo ta traha ey dilanti y wak con henter e esfera di e area a bay dilanti tanto pa nan como pa nan clientenan. E proyecto ta cubri un area di 3.8 kilometer di ‘prime property’ cu añanan tabata sclama pa haya poco atencion. Finalmente Gabinete Mike Eman a atende e peticion y den su vision di mehoracion di nos infrastructura, a duna ordo na Departamento di Obranan Publico pa tuma e trabou relativamente chikito aki, na su encargo. E prome fase for di stacion di gasolin pa rotonde ta cla y awor ta cabando cu e di dos parti. Sin embargo ya caba comerciante y empresarionan di e area tin lunanan disfrutando di e cambionan haci no solamente visual, pero tambe den e sistema di transito y ta expresa cu animo nan satisfaccion. Un ehempel ta sr. Humphrey Hardeveld, director Big Twin Aruba N.V. e agencia representante di Harley Davidson. El a splica cu esaki ta algo cu e hunto cu otro biciñanan semper a boga p’e. “Ami ta mir’e hopi positivo,” e ta bisa añadiendo cu “nan a pone trottoir ambos banda, e yerba pa embeyece y el a trece algo hopi positivo pa e peatonnan. Pa nos como comerciante mi ta hay’e un ‘added value.’” Sr. Hardeveld a conta cu clientenan ta contento pasobra parkeo a bira mas facil. Tur auto ta organisa y no ta subi stupi mas pa haya luga. E ta ripara cu antes automobilistanan tabata gewoon crusa e stupi pa subi boulevard. Nan no ta haci esey mas. Esey ta hustamente e efecto cu Gabinete Mike Eman kier trece den comunidad. Dor di drecha scolnan, hospital, caminda, trottoir, etc. no solamente ta brinda un luga mas bunita pa biba, pero tambe un luga cu hende ta aprecia y cuida mas tambe.
Posted on: Wed, 28 Aug 2013 02:15:34 +0000
Trending Topics
Recently Viewed Topics
© 2015