Giòbia 5 de cabudanni 1 editzione 1. Traballu e fogos: sighit sa cuntierra intre s’Assessore a s’Ambiente de sa Regione Autonoma de Sardigna Andria Biancareddu e sos consigeris de su Pdl Anghelu Stocchino, Pedru Pittalis e Antoneddu Peru chi ant fatu una proposta de lege pro istabilizare sos traballadores precàrios de su setore forestale. Sa proposta de sos consigeris regionales de su Pdl agradat meda a sos sindacados. S’Assessore Regionale Biancareddu at declaradu chi bisongiat a bìdere si sas leges vigentes e istatales ant a permìtere de istabilizare sos traballadores. S’ispesa previdida dae sa lege est de 12 miliones de euros. Un’ispesa chi at a permitere cun sa preventzione e sa innettadura de sos litos pro sa preventzione de su fogu. 2. in sas dies passadas sa Commissione Autonòmia de sa Regione Autònoma de Sardigna at aprovadu sa modifica de s’art. 43 de s’Istàtutu Sardu chi in paris cun sa Costitutzione Italiana aiant assignadu a sa Regione Sarda, sas tres provìntzias istòricas de Casteddu, Tàtari e Nùgoro. Ammentamus chi sa Provìntzia de Aristanis est istada istituida cun d’una lege ordinària de s’istadu in s’annu 1974. Cun custa modifica at a èssere sa Regione a istabilire in deroga cale ant a èssere sos entes territoriales intermèdios novos pro amministrare sos territòrios. Totu custu ca su referendum de su 6 de maju 2012 aiant cantzelladu deretu totu sas provìntzias sia cussas istòricas chi cussas novas chi fiant istadas istituidas dae sa Regione in s’annu 2001. A dies de solu sas provìntzias de Aristanis, Nùgoro e Tàtari ant mantesu su Consìgiu Provinciale. Sas àteras chimbe, imbetze dae su mese de trìulas de ocannu sunt amministradas dae unu commissàriu. 3. Sutzessu mannu eris sero in Bosa, pro su primu addòviu prevididu dae su progetu “Bilinguismu Creschet”, chi previdit lìneas de interventu pro s’educatzione bilingue de sos pitzinnos. Reladore printzipale at a èssere sa Prof.ssa Antonella Sorace de s’Universidade de Edimburgu. S’addòviu est organizadu dae s’Ufìtziu Limba Sarda de sa Pienalza e de su Montiverru. Custu sero in Iscanu a sas oras 16.30 b’at a èssere su segundu addòviu in su teatru “Nonnu Mannu”.
Posted on: Thu, 05 Sep 2013 16:02:50 +0000
Trending Topics
Recently Viewed Topics
© 2015