Goodison Park-ah Arsenal an lut dawn Zanin dar 10:00 hian Goodison Park-ah Everton tlawhin Arsenal an zin chhuak dawn a, mi tam tak chuan hmanni lawka UEFA Champions League playoff-a Turkey-a tal hah Arsenal hian beisei an phak loh an ring. Mahse, Everton boss Roberto Martinez chuan an mikhual tur team hi a hre chiang a, midweek match neih vanga buai tur an niin a hre lo a, Everton hi chan ṭha zawka dah ngawt theih an nia a hriat loh thu a sawi. Arsenal hi Turkey-a inkhel hahthlak tak an hmachhawn aṭanga ni li chiah a liam tihin Everton khel turin an zin chhuak dawn. UCL playoff-ah hian Istanbul khawpuiah tharum nasa taka hman ngaihna Besiktas nen an inkhel a, goal inpe loin an inhnehtawk. April thla khan Goodison Park-ah hian Everton chuan Arsenal hi 3-0 in an lo hneh tawh a, tun ṭumah hian Arsenal-in season thara Premier League-a an away game hmasaber an hmachhawn dawn a, an intawn hnuhnun ber ai hian inkhel a awlsam sawt phah dawn chuang lo. Mi tam tak chuan Martinez-a naute hian Arsenal-in kar khat chhung vela an game thumna an khelh dawn avangin chance an nei sang zawkah an ngai. Martinez chuan a ṭawm pui ve lo a, Hei hi chu kan thlir dana zir a ni mai ang chu. Kei chuan Arsenal hi an tawnhriat neih tawh dan te, an theihna te ka thlir a, Thawhlehni zana an game neih khan engmah a nghawng ka ring lo. Anni pawhin hei hi season ṭan hma khan an hre lawk vek dawn a, hetiang hmachhawn thei tur khawpa squad lian hi an neih ngei ka ring. Kawng lehlama en phei chuan an inkhelh hnem na na na chuan match fitness an nei dawn tihna a ni a, hei hi anmahni tana ṭha zawngin an hmang daih thei. Hetihrual hian Arsenal-te anga team ṭha hi chu season tir lamah, an nih tur ang tak tak an la nih chhuah hmaa khelh hi thil duhawm ber chu a ni fo. Turkey-a an inkhel ente chuan in hriat vek ka ring a, tunah hian an theihna tak tak hmangin an khel chhuak ṭan der tawh niin a lang a, kan tan chuan thil pawi a ni thei tlat. Kan inhmachhawn hunah hian Goodison-a kan inkhelh hnuhnun bera kan khelh anga khelh chhuah leh kan mamawh dawn a ni, a ti. An inhmachhawn hnuhnun bera an result chu thuhran ni se, Everton hian inelna zawng zawngah Arsenal hi game 14 chhung an hneh thei lo tawh. Everton hian Premier League-ah season bul an ṭan ṭha tawk lo a, an game hmasa berah King Power Stadium-ah kai thar Leicester City nen 2-2 in an inhnehtawk. Arsenal hian an top flight league season chu chakin bul an ṭan thung a, Crystal Palace nen inhmachhawnin hun tawp dawna Aaron Ramsey-a goal thun hmangin 2-1 in an chak hram. Ramsey hi Besiktas an hmachhawn ṭumin hnawhchhuah a ni a, hei vang hian Besiktas nen UCL playoff second leg an khelh hunah a inlan thei dawn lo a, zanina Everton hmachhawntu team-ah erawh a inhliam a nih loh chuan a tel theih lohna chhan tur a awm lo. Arsenal midfielder Mikel Arteta chuan a team hlui hi a hmachhawn thei dawn lo a, Ataturk Stadium-ah hian a ke a tina. A aiawh turin Mathieu Flamini chuan midfield lai a luah lum tura ngaih a ni. Arsene Wenger chuan World Cup-a an champion hnua chawlh a pek rei bik a German player pathum - Per Mertesacker, Mesut Ozil leh Lukas Podolski-te chu a chhawr tawh dawn nge la chhawr dawn lo a enchhin tur thu a sawi. Hetihlai hian Kieran Gibbs chu a malpui tha nat vangin a khel thei dawn lo a, a malpui tha nat vanga Istanbul-a kal thei lo Yaya Sanogo erawh chhawr theih tawh tura ngaih a ni. Arsenal squad-ah hian David Ospina, Abou Diaby, Theo Walcott, Ryo Miyaichi leh Serge Gnabry-te chu inhliam vanga chhawr theih loh chiangsa an ni. Premier League kartawp fixtures August 23, Inrinni Zan Aston Villa 5:15 PM Newcastle United Chelsea 7:30 PM Leicester City Crystal Palace 7:30 PM West Ham United Southampton 7:30 PM West Brom Swansea City 7:30 PM Burnley Everton 10:00 PM Arsenal August 24, Pathianni Zan Hull City 6:00 PM Stoke City Tottenham Hotspur 6:00 PM QPR Sunderland 8:30 PM Manchester United August 25, Thawhtanni Zan Manchester City 12:30 AM Liverpool
Posted on: Fri, 22 Aug 2014 18:51:04 +0000
Trending Topics
Recently Viewed Topics
© 2015