Gum Lox Krai Tax Pang Daux Bang Kum 2009.417 Gum Lox Kraix Tax Pang Okkathax Asoyax Meung Vax Daux Bang: Kum:YaogYaw Naog Krax Yien:Yawg Meung Vax (20) Num, Meung Man Hak Tiex Baux (2). • Nab Yam: Yung Yi: Ka Ciao: Tang: To Asoyax Meung Man Ku Kaux Daux Pui. • Nab Yam: Yung Yi: Ka Ciao: Tang: To Asoyax Meung Hawx Ku Kaux Daux Pui. Nab Yam: Yung Yi: Ka Ciao: Tang: To Cub Caw Pūx Aik Kawn: Keeing: Ku Kaux Daux Pui, Nyo Sinie Khan: Kix, Ciao: Giex Kaing: Naing Pati Rob Rom, Kawn: Lien:, Tax Yiiex Mīex Keeing:, Cub Caw Bun: Dai:, Si Miēx Khawm: Uik Khawm: Leeing:, Kīeh Pex Lang: Ju Pu Rhang:, Brax Kua: Ku Kaux Daux Pui Liak. In: Singāix Māwh Singāix Pa Ting Pa Lhaong: Pa Grum Naog Mai: Koe: Buan: Son: Naog Krax Yien: Yawg Meung Vax (20)Num Heue. Māwh Singāix Pa Kied Koe: Dee Bleeh Son Kawn: Pui Ku Ceu Pa Ot Daux Meung Vax, Aux Tang: To Asoyax Meung Vax, Pui Hak Tiex (16)Ceu Pa Ot Dah Dee Prāix Baux (2) Pon: Sien: Haoh, Sim: Si Kaux Laux Si Miang Daux Asoyax, Nyo Si Nie, Ciao: Kaing: Naing Lien: Pati Rob Rom, Aux Si Mie Tix Paoh Klap Rieb Hoek Pex Khawm Gāux Rhawm: Gāux Rhi:, Si Mie Tix Ah Lāoh Lie Ting Buan: Son: Ka Pex Ku Kaux Daux Pui Heue. Kawn: Vax Hoik Māwh Nang: Pui Prim:, Pa Hoik Dawg Koe: Dix Dix, Māwh Ceu Pui Tix Ceu Pa Dawg Rheung Dah Dha: Pa Ang: Krup Ang: Kheet Bāux Ot Bāux Koe: Pāox Kawn: Pui Tix, Ka Daux Kaing: Rheung Num Kaoh Khaing: Hak Tiex Gawng Lua Tibiet Meung Hawx. Hoik Ot Nang: Si Greung Hak Tiex Meung Man Kaing: Yiieh Num, Khaix An: Ex Ot Ceng Mai Meung Thai, Daux Ex Meung Man, Ex Ot Tachilek, Ceng Tung, Baoh Prāix An: Ex Kawx Hoik Sum: Tix Ot Nyiiex Yaong:, Mai: Ot Prāix An: Kaing: Yiieh Num Heue. Tax Du, Yiiex Du Ex Son Sang Im: Sang Klawd Kix Tix Māwh Pui, Kix Tom Gaih Tix Luan Khaing: Ceng Tung, Haok Plak Blaong Mai: Sum: Tix Koe: Yiiex Prāix Dee Ot Ex Yam In: Heue. Si Toe: Tix Ot Hoek Tom Ju Tax Ju Yiiex, Yam In: Ex Kawn: Vax Jung Pui Hoik Bāox Haok (10) Sien: Kaux Haoh, Ot Ling Chang, Phu Eu Hak Tiex Meung Hawx Heue. Meung Thai Prāix Ceng Mai, Daux Meung Man Ex Ot Cing Tung, La Shio Mai: Tachilek Prāix An: Khan Kix Heue. Ex Ka Māwh Nang: Cub Nyiiex Ceu Pui Tix Ceu Pa Laig Daux Cub Nyiiex Pui Ka Piang Bee Hak Tiex Heue. Ka Daux Krax Yien:Yawg(20)Num Meungvax Hoik Awm: Plu Pliak Tiex Mai: Ma: Pāox Tix, Krax Ot Kawn: Pui Hoik Mhawm:, Phan: Jhak Plak Been Ex Hoik Pon Plaoh Been Pa Jhan: Riang Heue. Kaing: Ting Ex Ka Hoik Koe: Pati, Daux 1988 Num Khix 12-20 Ngāix, To Kaux Aux Mai: Tax Lai: Khrawm: Pāox Pa Sidu Rhawm Mai: Yiiex, Mai: Sum: Pati Rob Rom Heue. Phan: Māwh Pati Rob Rom In:, Daux Krax Daux Grawng: Kaing Ah Ex Tix Yūh Mai: Si Mu Khan Kix Hoik Koe: Ka Daux Heue. Son Sau Riang Sau Rao Tix Yūh Kaing Pa Sang Yūh Tix Ka Hoik Koe: Ka Daux Heue. Yam In: Pui Pa Laig Daux Pati Rob Rom Hoik Koe: (8000) Kaux Haoh, Kix Māwh Cub Pa Māwh Khaox Joh Rong: Jhan: Pui Hak Tiex Meung Vax, Kaing Ku Plak Ku Vang Daux (20) Num Kix Hoik Māwh Ciao: Pa Rīex Pa Kua: Ka Daux Kaing Hak Tiex Ex Heue. Pati Rob Rom Meung Vax Ka Daux (20)Num, Ka Hoik Pon Tat Lox Tix Blah Son Bēeh Glawm: Pa Bak Tix Yūh. Kaing: Ting Kieh Hak Tiex Prāix Klawng: Yien: Yawg, Nyawm Ot Si Ngēh Koe:, Phan: Māwh Son In: Ex Hoik Pon Yūh Kaux Yūh To: Līh Heue. Khaix Hoik Pon Kieh Ex (B.K.P)Nāwx Kaing Hak Tiex Pa Yūh Kix, 1989 Num, Daux Khix (5) Ex Pon Kum: Kawng: Ka Lox Si Kah Mai: Asoyax Meung Man Son Yūh Krax Yien: Yawg Koe: Si Nax Ex Heue. Ex Hoik Bre Tix Hawt Yūh Si Dawng: Awm: Lox Pa Hoik Tat Ex Khawm: Ra: Plak, Yam Kum: Son Krax Yien: Yawg Heue. Phan: Krax Yiien: Yawg Mai: Krax Pa Nhim: Ang: Koe: Ka Ang: Doh Pon Sang Hak Tiex Awm: Yam: In: Phan: Māwh Ex, Ex Si Mie Tix Ot Daux Pa Nhim: Pa Yien: Te Te Heue. Meung Vax Māwh Meung Tix Mu Pa Ang: Chix Gūah Tix Khaing: Meung Man, Meung Vax Ang: Doh Rud Doh Gūah Tix Māwh Nawng:,Ang: Doh Yiieh Meung Man Lāux, Ex Giex Been In: Yam Jāuh Hoek Tom: Si Dāuh Heue. Ex Joh Jhan: Kaing (Democracy) Ciie Asoyax Meung Man Son Krax Yiien: Yawg Kaux Cong: Tom Si Dāuh, Khaix In: Sax Ex Kawx Ang: Chix Tīeh Chix Loh Tix Bawg Kawx Heue. 1990 Num, Yam Ang: Krax Yax Yeen Tang: Meung Lai Koe:, Son Sang Grai: Ceu Pa Yoek Pa Awp Ex Hawt Yūh Awm: Grawng: Pa Yūh Meung Ka Piang Ca: Hak Tiex, Son Sang Pon Thai Loh Ka Been Pa Dēuh Rhawm: Tix Ka Kaing Sum: Phen Nong: Nong:, Son Krax Nyawm Ot Si U: Koe:, Krax Sak Vaig Naog Tu Pui Ku Ceu Pa Ot Daux Meung Vax, Son Sang Haok Huan: Kaing Gha: Ma: Yūh Kawn Pui, Jāuh Tix Tat Lox Yūh Nin:, Jāuh 15-20 Num Daux Meung Vax, Phen: Ceu Pa Yoek Pa Awp, Khawm: Rīah Khawm: Rawng Ang: Lai Kīeh Koe: Daux Hak Tiex Ot Ex, Hoik Tat Tix Yūh Kaing Ceu In: Khan: Kix Heue. Kaing Pa Lheu Yūh Ex Plak Nie, Māwh Son Sang Grai: Ceu Pa Yoek Pa Awp Khaing: Meung Ex Heue. Jāh 2005 Num, Khix Līah(26) Ngāix, Hoik Pao: Hoik Krai Kawn: Pui Ka Piang Ca: Hak Tiex Mhong: Si Dawng:, Hoik Kīeh Meung Vax Māwh Dee Loig Dee Singax Can Ceu Phen: Pa Yoek Pa Awp Heue. Kaoh Khaing: Rom Tix Ced Kia: Mai: Dah Dee Hak Tiex Ciao: Ex Mai: Meung Plak Prāix Ceu Pa Yoek Pa Awp Tom: Līh Tix Ang: Lai Koe: Hoek In: Singāix Heue. In: Māwh Buan:Son: Pa Kied Si Daing: Ting Lhaong: Son Pa Yūh Cub Caw Pa Sawg Tix Preet Phen: Ceu Pa Yoek Pa Awp Ka Piang Ca: Hak Tiex Son Kawn: Pui Meung Vax Heue. Hoik Māwh Khaox Lhak Sag Se Son Kaing Pa Preet Tix Tik Ceu Pa Yoek Pa Awp Tix Grawng Daux Bawg Yam In:, Ang: Lai Sum: Phen:, Ang: Lai Plih Ceu Pa Yoek Pa Awp, Pui Yawt Pui Ih Ceu Pa Yoek Pa Awp Ang:Lai Kīeh Koe:, Sau: Riang Rao Tix Yūh Kaing Ceu In: Ang: Jud Ang: Jai Heue. Bēeh Glawm: Pa Rheung Pa Lang: Pa Bak Pati Rob Rom Tix Yūh Māwh Son Sang Yāox Kawn: Pui Hak Tiex Tix Kud Sawm: Nyawm Prīex Sak Vaig Naog Tu Mai: Nyawm Ot Si U: Koe: Ngie Heue. Kheu Jao Kaing Pa Co: Ca: Ex Tix Yūh Daux (20)Num, Krax Ot Grawng: Koe: Kawn: Pui Hoik Kied Thai Loh Tix Mhawm:, Viang Māwh Kawx Nan:, Son Sang Hoek Ot Daux Bawg Yam Sak Vaig Naog Tu, Haoh Lheu Priex Ih, Kraung Ceep Eep Sawm: Kawn Kied Lo Kied Cha: Te Te Heue. Ex Kawn Caw Tix Co:Ca: Hu: Ku Kaux Daux Pui, Co: Ca: Son Pon Ran: Tix Kīeh Kawn Pui Hak Tiex Kub Paw: Ka Prīex Pa Ih Tix, Mai: Kraung Ceep Eep Sawm: Tix Si Voe Hah Heue. Ka Daux (20) Num Ex Kīeh Kaing Yūh Laih Lai Māwh Kaing Pa Ting Ceu, Paoh Si Vīex Son Hoek Plak Prāix, Plaik Num: Nghox Mau Tix Laig, Kok Pui Pa Koe: Ping Nyia Cu Yi: Hoek, Pui Pa Chix Pa Keut Ping Nyia Cu Yi: Hoek, Kaing Son Sang Haok Huan: Meung Vax Ex Kawx Hoik Deuh Been In: Koe: Daux Ex Heue. Māwh Ngie SiToe: Tix Yūh Plak Laih Cau, Mai: Laih Lai Hu: Si Voe Ngai: Ex Sax Heue. Ang: Gūah Ceu Pui Nie, Pui Tūx, Ex Kīeh Si Du Awm: Pāox Tix, Kīeh Khaw: Pāox Tix, Ra: Lai: Gau Sawn: Mai: Pāox Tix, Haok Huan: Tau, Ang: Jhoeng: Māwh Tieb Tie Kieh Kang: Ka Been Teei Ceu Pui Ting Tix Ting, Been Pa Si Khawp Si Khiep Pa Ang: Māwh Ang: Jiet, Pa Teei Tix Ting Ving Tix Vīeh Pa Lang: Laoh Kaoh Cung Been An: Khan: Kix Ex Hoik Yūh Ang: Lai Koe: Awm: Lox Pa Hoik Tat Hoik Krai Ex Tix Dēuh Heue. Hoik Yūh Khaw: Hoik Yuh Brieb Mai: Lox Tat Heue. Son Ang: Meung Man Grai: Grhup Jiieh Lāux Pu Prat Pu Prang: Ang: Lai Tang: Gūah Meung Vax, Been Li Pa Ang:Vīex Si Brawm Kaing Hak Tiex Chix Tix Krub Vai Ka, Ex Kawx Hoik Tat Tix Dēuh Been Ah Nin:, Ot Brawm: Ngawm Dia: Yiien: Yiien: Yawg Yawg, Muih Rhawm: Ka Meung Pa Dēx Pa Dawd Mai:Tix, Si Toe: Tix Mai: Tang: Meung Ka Hoik Dēuh Been Koe: Heue. Ex Hoik Pon Yūh Pon Kīeh Pa Nhim: Pa Yien: Yawg Koe: Mai: Meung Ka Praok Paw: Tix Koe: Heue. Ka Daux(20)Num Kaing Pa Bak Ex Tix Yūh(5)Num, Ex Hoik Pon Yūh Hoik (4)Bawg, Ka Daux Kaing Ku Plak Ku Vang Hoik Pon Pa Gāux Rhawm: Mai: Krax Haok Haun: Heue. 1. Krax Laux, Krax LaiLing IngTiang Pon Kīeh Phai Doh, 1989 Num Krax LawLi Pau Koe: (300)Lhak Khaing:, Yam In: Hoik Koe: (3000)Lhak, Ca: Ah Dee Yawm Daux Kaung:(Sien), Daux Veng(Chi), Daux Eeng(Sieng) Krax Law Li Hoik Doh Ka Heue. Ka Daux Krax In: Khan: Kix Krax Griex, Krax Hoik Tawm Si Māox Hoik Koe: (800)Lhak Heue. Krax Laux In: Khan: Kix Hoik Kied Koe: Buan: Son: Plak Lai Ling Ting Tiang Te Te, Krax Lai Ling Ing Tiang Kawn: Pui Hak Tiex Ka Pāox Tix Kawx Kied Si Daing Yiie Son Kix Te Te Heue. Hoik Bāox Riang Rao Ex Son Yūh Laih Lai Mai: Tang: Meung, Bāox Riang Rao Meung Vax, Son Laih Lai Mag Mi Heue. 2. Kaing Gau Sawn: Ngai: Leg Ngai: Lai Ka Kied Si Daing: Koe: Krax Haok Krax Huan: TeTe, 1989 Num, Meung Vax Khawm Tāoh Khawm: Jaw Nyiiex Cawng Gau Lai Pau Koe: Ngie(20)Lhang: Khaing:, Nyawm Cawng Si Mex/Bon: Pau Koe:Ngie(500)Kaux Ang: Hoek, Yam In: Cawng Gau Lai Ku Ceu Koe: (360)Lhang:, Nyawm Cawng Simex/Bon: Khawm: Uik Hoik Koe:(36700)Kaux Haoh Heue. Glawk Greung Mai: Glawk Lhaong: Hoik Koe:(10)Lhang:, Hoik Pon Ghaok Pon Yaog Ngai: Leg Lai Haok Huan: Heue. 3. Plak Sidah Si Nai Son Krax Brax Kua: Ka Kied Si Daing Koe: Krax Haok Huan:, 1989 Num, Meung Vax Khawm: Tāoh Khawm: Jaw Nyiiex Pai: Saux, Lawg Jhak Saux, Lawg Tawx Si Dah Pau Koe: (20)Lhang: Haoh, Yam In: Nyiiex Pai: Saux, Lawg Jhak Saux, Lawg Tawx Si Dah Hoik Koe:(190) Lhang: Haoh Heue. Hoik Pon Prawng Pon Yūh Son Pon Pai: Pui Hak Tiex Pui Haoh Pui Hun: Hoik Lheu Mhawm: Khaing: Voe In: Dix Heue. 4. Pon Bāox Sum Cag RiangNgu Sah,1989 Num Daux Meung Vax, CagNgu Sah Pa Koe: Riang (40)Wat Pau Koe: Ngie Tix Lhang: Khaing:, Daux (20)Num In: Cag Ngu Sah Hoik Pon Bāox Sum: (8)Lhang:, Koe: Riang(13590)Wat, Hoik Pon Kham: Pon Klawm: Kaing Sum: Kaing Sang Meungvax Heue. Hoik Pon Kied Krax Ot Grawng: Koe: Pui Haoh Pui Hun: Mhawm: Ot Singēh Koe: Heue. 5. “Son Sang Grai: Kaing Pa Sum: Pa Van: Ka Phen:, Dūx Dee Ot” Kaing Pa Kied Ting Ceu Yūh Nin:, Jāuh 1999 Num Dūx Pui Yūh Ma: Kaung: Pa Sum: Phen Tix Sien: Kaux Hu: Ot Plak Seh Heue. Yam: In: Hoik Pon Dūx Pui Yūh Ma: Kaung:(8)Mheen: Kaux Hu: Ot Plak Seh Heue. Son Sang Pon Krup Bawg Yam Bak Tix Ang: Lai Sum: Phen, Mai: Yūh Kaux To: Līh Koe:, Son Sang Pon Luan: Pui Yūh Ma: Kaung: Ex Ka Hoik Pon Sawg Daux Krax Son Kix Heue. 6. Sau:Riang Sau:Rao Tix Daux Kaing Pa Plud Tix Sum: Tang: Ang: Lai Sum: Phen: Giex Kaux To: Pa Hoik Pon Son Preet Tix Tik Ceu Pa Yoek Pa Awp Mai: Ang: Lai Sum: Phen:, Bre Tix Kīeh Kaux Cong: Jheeing: Jheeing:, Son Sang Pon Līh Luan: Pui Yūh Ma: Kaung: Khaing: Kaing Sum: Phen Jāuh 1995 Num, Ex Krai Pui Haoh Pui Hun: Mai: Kom Pa Ni(Kung: See) Tang: Meung, Sum: Khaox Yang Yeet, Khaox Chax, Mai: Can Ceu Khaox Ox Pa Koe:Plix, Khaox Pa Chix Pon Mau Khri: Ka An: Khan: Kix, Sum: Daux Meung Vax, Kheu Gaux Rhawm:Riien: Lāoh Pui Tix Sum:, Yam:In: Meung Vax Plak Laong: Mai: Plak Seh Hoik Pon Sum: Khaox Yang Yeet(5)Sien Mu Haoh, Khaox Chax Hoik Dēx Koe: (2)Sien: Mu, Yang Yeet Tix Blah Hoik Jāuh Tix Līh Pēeh Heue. In: Māwh Kaing Pa Jāuh Tix Kīeh Ceu Pa Pon Ex Tang: Ang: Lai Sum: Phen Te Te Tix Lai Heue. 7. Ma: Kaung:, Phai:, Rawng Rawm: Hoik Haok Huan: Meu Pie Keung Tix Haok Huan:, Plak Laong: Mai: Plak Seh, Hoik Tawng Tix Yūh Ma: Glawk Bawng:, Pan Phai:, Lawd Rawng Rawm:, Tawng Tix Sum: Van: Si Mie Pa Si Ngax Pa Mhawm:, Tawng Tix Shiao Phon Dhat, Hoik Pon Loh Been Prim:, Soh, Rhawm:, Nong: Yu Keeig Ka Ngu Mai: Sum: Van: Nyhox Khawx Ka Daux, Jao Pon Thai Loh Tix Yūh Nin: Prīex Pa Pon Kawn: Pui Ka Haok Huan: Tang: Heue. 1989 Num Pau Kub Priex Ih Been (6)Khix Ngie, Yam In: Prīex Ih Hoik Kub Hoek (8)Khix Heue. 8. Son Priex Riien Pau Gox To: Kaux Ciao: Tix Mai: Son Meung Man Ex Hoik Puing Naing (6)Num Mhawm: Mhiem:, Rom Tix Mai: Asoyax Meung Man Mai: Puing: Cub Caw “ Khun Sa” Pa Yūh Meung Man Lāux Ka Ceu Pa Yoek Pa Awp Ang: Lai Kīeh Kix Koe:, Dee Nghoik Nawh Yāox Ang: Tix Doh Pēx Ka Ex, Nawh Hu: Grēux Ngawng Mai: Ap Kraung Naing Tix Ka Asoyax Meung Man Heue. Naing In: Sawn: Hoik Māwh Yūh Ex Kaing Pa Koe: Buan: Son: Son Sang Yien: Yawg Mai: Son Sang Rom Meung Man Tix Māwh Tix Mu Khaing: Heue. Daux (20)Num, Yūh Kaing Kaong Maw: Khri Maw: Mau, Sum: Nyiiex Yaong: Sum: Veng, Yūh Kaing Son Pui Hun:, Yūh Laih Lai, Viang Ang: Krax Haok Huan: Awm: Pāox Tix Kawx Khaw Tix Haok Huan: Mie Ding Hoik Haok Huan: Nang: Heue. Ka Daux Bawg Yam Pa Yien: Yawg (20)Num An:, Ra: Lai: Plih Num: Mau Khri: Tix Plaik Pui Pa Koe: Ping Nyia Cu:Yi: Laig, Pon Khrawm: Mau Khaing: Pui Hun: Nie Nie, Pui Ku Ceu Pa Ot Daux Meungvax, Kix Ang: Teei Riang Tix, Kix Hoik Teem Kaing(10)Sien Haoh Heue. Ceu Pa Pon Pa Yāox Ex In: Singāix, Ang: Chix Gūah Tix Khaing: Ciao: Lai Kaoh Plak Praix, Riang Rao Kaing Kaoh Khaing: Plak Prāix Mai: Ciao: Hak Tiex Ex, Pa Yūh Kaing Pa Koe: Buan: Son:, Ex Tom: Pon Pēx Kaing Yūh Tix Heue. Pa Sang Bāox Krai Tix Grawng:, Māwh Son Sang, Sang Ex Meung Tix, Mau Pa Cai: Pa Shiao Ex Plak Krax Nie, Māwh Shiao Plak Sum: Veng:, Mai: Nyiiex Yaong: Ka Daux (20)Num, Māwh Ih Krax Jhak Kia: Teem: Coi Pati, Ciao: Giex Kaing: Naing Mai: Lien: Khawm: Pui Pa Yūh Kaing Tab, Kaing Lum, Ang: Sax Koe: Mau Riang Khix, Mau Teem: Coi Awm:Pāox Tix Uik Heue. Mau Teem: Ka Kied Si Daing: Thiiem, Tix Kaux Pui Ang: Tie Hoek (150)Mheen: Mau Hawx, Māwh Kheu Kied Si Daing: Yawm Mau Pa Pon Phan: Ex Tawx Mau Riang Khix, Kaing Pa Sang Sum: Sang Kaw: Hak Tiex Dee Ot Ex Māwh Ngie Kīeh Ex Bēeh Glawm: Pui Hak Tiex Nie Lheu Ciien Khaing: Heue. Son Sang Yūh Meung Vax Haok Huan:, Pui Kaing Mheen: Ang: Lai Keud Son To: Kaux Ciao: Tix, Yūh Kaing Pa Koe: Buan: Son: Ka Daux (20)Num, Sok Rhawm: Yūh Nin: Kied Koe: Buan: Son Te Te, Kaing Pa Yūh Nin: Ka Kied Nu Tix Brieb Ka Meung Ku Meung Heue. Yūh Bang Kum: Ting(Nyi La Kham)(10)Num Haoh , Ex Meung Vax Ka Ploi: Ciao: Tang: To Tix Laig Yam Jāuh Hoek Tom: Si Dāh Heue. Cub Ciao: Tang: To Ex Ka Hoik Krai Pa Rawg Mhaing: Ex Si Dawng: Laing Laing, Ex Mhaing:(Pi Nie) Ka Prāix Ot Ex Kawn: Vax, Dee Si Dah Asoyax Meung Man, Pau Tawx Glawk (Taing:) Pa Tang: Giex Kuang: Ciao: Ex Vax, Kix Ang: Tawx Pa Mhaing:Ex Tix Blah, Son Sang Kaux Cong: Meung Man, Son Sang Haok Huan: Democracy, Prawng See: Si Nax Ceu Kawn: Pui, Daux Si Kah Mhawm: Jhawm: Jiet, Son Kaing In: Ex Koe: Rhawm: Si Mie Tix Kum: Kawng: Mai: Asoyax Heue. Ex Moh Rhawm: Phan: Kum: Kawng: Tau Yūh Nin:, Teu Riien Pon Prawng Pon Ah Khaw Caw Mhawm: Mhiem:Heue. Bawg Yam Kaw: Yam Sang Ex Meung Vax Ku Plak Ku Vang Daux (20) Num, Okkathax Tax Than Shwe, Ciao: Pa Jhawp Kaing:, Kaing Krax Yien Yawg Mai: Kaing Plak Haok Huan:,Okkathax Nam Bad (2) Tax Maung Aye, Won Ci Chok Tax Thein Seng, Ciao Pa Jhawp Kaing Ku Ceu Tax Ti Hax Tu Rax Ting Aung Mint U: Si Miang An:Khan: Kix, Ciao Pa Ting Daux Meung Man Mai: Pa Seeb Seeb Toe: Toe: Tix Yūh Taing: Mu: Ku Kaux, Krax Pa Kia: Ngien, Priex Rien Ka Ex Yam Kum: Kawng; Mai: Krax Joh Jhaong: Teem: Coi Kix, Kawn: Pui Meung Vax Ang: Doh Chix Pi Awm: Koe: Daux Rhawm: Ex Leeing: Ju Leeing: Pan Heue. Kaing Kaw: Kaing Sang Meung Vax Ku Plak Ku Vang Ka Daux (20)Num, Aso:Yax Meung Hawx, Daux Yuing Nan, Cub Caw Pa Sawg Tix Preet Phen: Mai: Ceu Pa Yoek Pa Awp, Asoyax Daux Veng Linchang, Asoyax Daux Veng Phu Aw, Cub Caw Pa Sawg Tix Preet Phen: Mai: Sidah Ceu Pa Yoek Pa Awp Daux Phu Aw, Asoyax Sip Sawng Panna, Cub Caw Ciao:Pa Sawg Tix Preet Ceu Pa Yoek Pa Awp Daux Veng Sipsawng Panna, Can Dah Dee Glawk Mawx Glawk An:, Mai: Pāox Grawm Krax Teem: Coi, Pa Kia: Ngiien, Tawng Rhawm: Ka Piang Ex, Ex Ka Hoik Pon Khaing: Kix Heue. Meung Man Hak Tiex Bāux (1)(Ko Kang) Meung Siem, Krax Lih Singāix Hak Tiex Bāux (4) Mai: Cub Caw Pux Aik Krax Yien Yawg Mai: Cub Caw Krax Moh Rhawm:, Khaing: Cub Caw An: Khan: Kix Ex Ka Pon Pa Teem: Coi Mai: Pa Joh Jhaong: Heue. Cub Caw Lum Kam Pha Ciao: Sawg Tix Preet Ceu Pa Yoek Pa Awp, Cub Caw Lum Kam Pha Plak Krax Haok Huan:, Cub Caw Lum Kam Pha Ciao: Pa Teem Gaox, Cub Caw English Ang: Gūah Meung Plak Sidah Si Nai Meung Jamane Matisa Plak Si Dah Sinai, Brax Kua: Ang: Gūah Meung Cub Caw Ping Tid Plak Ciao: Pai: Saux Ngia, Cub Caw Jamane Ciao: Pa Gau Sawn: Plak Kaing Sum: Ma Kaung:, American Cub Caw Taoh Teem:, Cub Caw I Ta Li Plak Moh Khrawm: Priex Rien Nyiiex Yaong:, Awsitelia: Cub Caw Moh Rhawm: Ka Meung Piang Hak Tiex, Mai: Meung Japan Can Meung An: Khan: Kix Krax Kia: Ngiien, Krax Tawng Rhawm: Rhi: Mai: Krax Teem: Coi Pa Kied Koe: Buan: Son: Yūh Nin:, Kawn: Pui Daux Hak Tiex Meung Vax Ang: Doh Chix Pi Awm: Ot Koe: Daux Rhawm: Kix Leeing: Ju Leeing: Phan Heue. Yam In: Meung Vax , Khaix Preet Tix Tik Phen: Caw Tix Māwh Bawg Yam Pa Kied Si Daing Nu Son Pon Yūh Awm: Griang Pak Peung Plak Magmi Heue. Hoik Jāh Tix Pon Buan: Son: Son Kaing Pa Plud Tix Sum: Tang: Phen:, Ang: Nyiang Pon Kīeh Kraung Ceep Eep Sawm:, Prīex Ih Kawn: Pui Kub Naog, Yam In Kied Si Daing Lo Krax Teem: Krax Coi Khaing:: Plak Prāix Te Te, Son Kaux Cong: Kaing Hoik Yūh Khaix Ang:Lai Sum: Phen: Phan: Pon Pa Teem: Coi Tom: Tag Pon Kīieh Krax Ot Kawn: Pui Meung Nyawm Ot Si U: Koe: Kub Sawm: Nyawm Prīex Heue. Son Cox Khrex Kaing Poi Yaog Yaw Naog Krax Yien Yawg(20)Num, Kied Yāox Pa Nu Pa Ciien Ka Mau Pa Shiao Pa Cai: Te Te, Mawh Kheu Nan: Aux Tom: Khrawm: Yix Ku Cub Ku Caw, Nhie Kix Sau: Mau Tan Mau Lu Ku Kaux Daux Pui, Pon Pa Kied Gāux Rhawm: Mhawm: Ngai Mai: Teem: Coi Joh Jhaong: Kix Ku Kaux Daux Pui, Pon Mau Hawx(100)Sien: Haoh Heue. Aux Kied Simie Tix Ah Laoh Lie Ting Buan: Son Te Te Heue. Ka Daux Pa Co:Ca: Tix Yūh Ang: Jud Ang: Jai, Daux (20) Num, Son Been Daux Krax Pa Tat Pati, Daux Krax Pa Jhi: Pati, , Ku Plak Ku Vang Ex Ka Pon Pa Joh Jhaong: Pa Tawx Riang Rao Khaing: Pui Hak Tiex Ku Ceu Pa Ot Meung Vax Heue. Hoik Nie Krai Pui Hak Tiex Sau: Riang Rao Yūh Tix Ih Kaing Jhaw:, Sum: Tix Ot Nyiiex Yaong:, Yam In: Kawn: Pui Meung Vax Hoik Nyawm Ot Si U: Koe:, Pui Ku Ceu Hoik Ih Rhawm:Rhi: Paox Tix, Plak Pa Ih Pa Un: Prīex Preem Hoik Haok Huan:, Pui Haoh Pui Hun: Hoik Hoek Daux Pa Nyawm Ot Si U:Koe: Heue. Asoyax Meung Vax Mai: Pui Hak Tiex Pui Haoh Pui Hun: Ot Greem: Pa Thong: Bung: Asoyax Meung Man, Ex Koe: Rhawm: Si Toe: Tix Yaog Chix Krax Yien Yawg Mai: Krax Haok Huan:, Giex Kaux Kaux Cong: Cong: Son Priex Riien Krax Yien Yawg Daux Meung Man, Priex Rien Krax Moh Rhawm Mai: Meung Pa Dēx Dawd Praok Paw: Tix, Democracy Daux Meung Man, Krax Haok Huan: Son Mag Mi Mai: Krax Nyawm Ot Si U: Koe: Meung: Man, Son Pon Sum: Nyiex Yaong: Pa Mhawm: Griang Ex Co:Ca: Mai: Rom Tix Yūh Tau Mai: Cub Caw Pūx Aik Krax Yien: Yawg Heue. Ting Buan: Son: Mai Rhawm NapYungyi 2009 Num, Khix 4, 17, Ngaix.
Posted on: Thu, 22 Aug 2013 03:19:34 +0000
Trending Topics
Recently Viewed Topics
© 2015