HMANGAIH BER CHU...? My Dear Watson, A vawi hnih nan aw.... He thu pakhat avanga lei anchhedawng pawh hlimna run nuama a chan thin dan te,tahna pawh nuihna in a chhem ban theih ziate; lungngaihna ruam meuhah pawh lunglawmna thlifim a thawt hiau hiau dan te chu khawvel hian thup tum mah- se tlâng sanga pho ang maiin a chianga,chhiar theih in a chiang si thin...! Anchhedawng rama anchhia dawng ve lo he thu pakhat hi hringnun tawite ah hian a hlutna hi sawifiah phak bak leh a pawimawhna hi hrilhfiah thiam rual ava ni lo em!A mawina hi lei mit hian a hmu mawi zo lo lek lek thin. Mahse..tihna ramah hian;ani,famkimlohna hmunah hian he hmangaihna tia kan sawi thin pawh hian-hlimna karah hliam atawka,lawmna zam vel hnuaiah buaina chhumin a zin hnana;nuihna ânkâ chipin tahna mittui a pai tel bawk si..! Anih leh,he inthenna ramah hian hmangaih ngawih ngawihte kan inthena;kumtluang atan tia kan biahthu di inhlan chuan a kumtluan zo ngang lova; awmlai lunglian hran hma hauhin kan tawnah hmangaihna chuan mual aliama,zalh ania;parvul tur chu a chuai si thin.. Mahse,hmangaihna chuan zawldawhin hmangaih ber awm phal lo turin hmangaih tur dang min lo chhawpchhuahsak leh mai thin.Hmangaih ber awm chu nise lei khawvel hi ava buai dawn em...hmangaih ber chu pakhat ai tam ani dawn silo... Khuanu chuan a ber awm lo tur ang rêngin hmangaih tur dang alo ruat reng zawk alo ni.Chuti nilose,hmangaihna hi a hlu lo ngei ang.Hmangaih ber pakhat chauh neih tumin kan buai anga,kan thei vek dawn silo.. Nang leh kei pawh hi kan piang kher ang em...!!??
Posted on: Sun, 23 Nov 2014 14:14:42 +0000