IS in British mi lu an tansak leh, US-in firfiakte lakah indo a puang Islamic State (IS) firfiakte chuan kar kalta Inrinni khan British mi an man mek, David Haines-a lu an tansakna video an tichhuak leh. Hemi hma hian American journalist pahnih an mante lu an tansakna video an lo tichhuak tawh bawk. Video hi minute 27 awh niin, private terrorism monitoring group, SITE website-ah dah a ni. SITE chuan he video hi IS nena inzawmna neiten an site-ah hian an dah niin a sawi. Video title-ah hian A Message to the Allies of America tih hman a ni a, British Prime Minister David Cameron chu firfiakte nena indo mek leh, Iraq rama IS laka beihpui thlak mektu, United States a thawhpui avanga an demna thu an sawi. IS-in video a tihchhuah tharah hian a hma ang bawkin, an mi man David Haines bakah amah thattu, firfiak pakhat hmai tuam a lang tel a ni. Haines-a thattu chuan British PM vauna thu sawiin, IS do turin US i thawhpui a, i hmaa mi Tony Blair-a hnung i zui ve leh a ni, British prime minister-te hian America hnial ngam loh hi tihdan phungah an nei tawh a ni, a ti. America an thawhpuina chuan an chhiatna tur kawng zawhna a ni tiin, British mipuite chu indona rapthlak takah an hnuklut a ni, a ti. IS chuan British mi an la hren mek dang pakhat chu thahah an la vau zui bawk. Kum 44 mi, David Haines hi chhawmdawl hna thawktu, Agency for Technical Cooperation and Development (ACTED) hnuaiah thawkin, Balkan, Africa leh Middle East-ah chhawmdawl hna thawkin a lo kal tawh a ni. Nikum March thla khan Syria-ah IS firfiakte hian manin an hreng zui a, tun thla tira American journalist Steven Sotloff lu an tansakna video an tihchhuahah khan firfiakte hian Haines hi an thah hmabak a nih thu an sawi a ni. British Prime Minister David Cameron chuan David Haines thah a nih dan chu misual tawp thiltih a ni, a ti. Tualthattu mana, an phu ang hremna pek an nih ngei theihna turin a ṭul ang apiang an tih tur thu a sawi. US President Barack Obama pawhin Britain mipuite a tawrhpui thu sawiin, IS pawl chetdan chu an dem thu a sawi. US sorkar chuan IS firfiakte lakah indo a puang. White House thupuangtu, Josh Earnest chuan an ram mi pahnihte mana, an lu tansaktu, Islamic State firfiakte laka indo an puan thu hi a sawi a ni. US President Barack Obama pawhin IS firfiakte chu Iraq ramah chauh ni lo, Syria ramah pawh an beih tur thu a lo sawi tawh a, he pawl hi Middle East himna tichhe thei pawl hlauhawm leh lian ber an ni tawh a ni, a ti. Obama chuan IS chetdan leh, an mi mante an tihhlum dante chu kum zabi 21-naa thil thleng âwm pawh a ni tawh lo, tiin anmahni nuai chimih tura beih let chu nakin hun zel atan thil dik zawk a ni dawn nia a ngaih thu a sawi. Australia Prime Minister Tony Abbott chuan US kaihhruaina hnuaia IS firfiakte beihna tura ṭangrual sipai siam tumnaah, Australia chuan sipai 600 a tir dawn tih a sawi. Heng sipaite hi ṭangrual pawlte zawm tur hian United Arab Emirates-ah an kal ang. US chuan Iraq leh Syria-a firfiakte bei turin ṭangrual pawl din a tum mek a, hemi atan hian ram hrang hrangte thawhpuiah a sawm mek a ni. Arab ram hrang hrangte pawhin US hi thlawp an tum thu an lo sawi tawh bawk. - See more at: vanglaini.org/khawvel/24711#sthash.Sh7WOlCM.dpuf
Posted on: Mon, 15 Sep 2014 07:28:13 +0000
Trending Topics
Recently Viewed Topics
© 2015